وتكەن سارسەنبى كۇنى دەنساۋلىق ساقتاۋ مينيسترلىگىندە پرەمەر-ءمينيستردىڭ ورىنباسارى ەربول ورىنباەۆتىڭ توراعالىق ەتۋىمەن دەنساۋلىق ساقتاۋ جونىندەگى ۇلتتىق ۇيلەستىرۋ كەڭەسىنىڭ 15-ءشى وتىرىسى بولىپ ءوتتى. كەڭەس وتىرىسىندا سوزىلمالى ينفەكتسيالىق ەمەس اۋرۋلاردىڭ الدىن الۋ جانە تەمەكى شەگۋدى, الكوگولدى ىشىمدىكتەر ءىشۋدى ازايتۋ, دەنە شىنىقتىرۋ جانە دۇرىس تاماقتانۋ بويىنشا سەكتورارالىق ىنتىماقتاستىق ءرولىن ارتتىرۋ سىندى ماسەلەلەر تالقىلاندى.
ەربول ورىنباەۆ ەڭ الدىمەن كەڭەس وتىرىسىندا كوتەرىلىپ جاتقان ماسەلەلەردىڭ اسا جاۋاپتى ەكەنىنە توقتالدى. ونىڭ ايتۋىنشا, قازاقستان حالقىنىڭ دەنساۋلىعىنا بايلانىستى ماسەلەلەردىڭ كوبى ازاماتتاردىڭ وزدەرىنە ءاتۇستى قارايتىندىعىنان تۋىنداپ وتىرعان كورىنەدى ۇكىمەت باسشىسىنىڭ ورىنباسارى ءوز سوزىندە: «ينفەكتسيالىق ەمەس اۋرۋلار ءماسەلەسى قازىرگى ۋاقىتتا ءبۇكىل الەم ءۇشىن اسا وزەكتى بولىپ وتىر. الداعى قىركۇيەك ايىنىڭ 19-20 كۇندەرى نيۋ-يوركتە جوعارى دەڭگەيدە ينفەكتسيالىق ەمەس اۋرۋلار جونىندەگى عالامدىق سامميت وتپەكشى. بۇل باسقوسۋدا دا ينفەكتسيالىق ەمەس اۋرۋدىڭ نەگىزگى ءتورت ءتۇرى, اتاپ ايتقاندا, جۇرەك-قان تامىرلارى, قاتەرلى ىسىك, سوزىلمالى وكپە جانە قانت ديابەتى مىندەتتى ءتۇردە ءسوز بولۋى ءتيىس», دەدى. ول سونداي-اق مينيسترلىكتەر مەن ۆەدومستۆولاردىڭ جانە جەرگىلىكتى اتقارۋشى ورگانداردىڭ تىعىز بايلانىستا بولۋى قاجەتتىگىن نازارعا سالىپ, «سالاماتتى قازاقستان» باعدارلاماسىنىڭ ءساتتى جۇزەگە اسىرىلىپ جاتقاندىعىن دا تىلگە تيەك ەتتى.
سوڭعى جىلدارى مەملەكەت باسشىسى قازاقستان حالقىنىڭ دەنساۋلىعىنا مەيلىنشە كوپ كوڭىل ءبولىپ وتىرعاندىعى بەلگىلى. سونىڭ ناتيجەسى وڭ وزگەرىستەر اكەلۋدە. بۇعان ناقتى مىسال كەلتىرەر بولساق, بيىل ەلىمىز بويىنشا بالا تۋ كورسەتكىشى 25 پايىزعا ءوسىپ, ءولىم 11 پايىزعا ازايعان. ال ءومىر ءسۇرۋ كورسەتكىشى 2 جىلعا ارتقان ەكەن.
دەنساۋلىق ساقتاۋ ءمينيسترى ساليدات قايىربەكوۆا ءوز بايانداماسىندا قازاقستاندا قانت ديابەتىنەن قايتىس بولعاندار سانى 24,7 پايىزعا ازايعانىن, ال بۇل دەرت ەلىمىزدە 100 مىڭ ادامعا شاققاندا 6,7 پايىزدان كەلەتىندىگىن ايتىپ, جۇقپالى ەمەس اۋرۋلاردىڭ 60 پايىزىنىڭ بەتىن قايتارۋعا بولادى. تەمەكى شەگۋ, الكوگولدى ىشىمدىكتى پايدالانۋ, قانداعى حولەستەريننىڭ شەكتەن تىس كوپ بولۋى, سەمىزدىك, جەمىس-جيدەكتەر مەن كوكونىستەردى از پايدالانۋ جانە دەنە شىنىقتىرۋمەن اينالىسپاۋ سىندى جاعدايلاردا جوعارىدا اتالعان دەرتكە ادام تەز شالدىعادى دەدى مينيستر ءوز سوزىندە جۇقپالى ەمەس اۋرۋلاردىڭ كەڭ تارالماۋىنا جانە ولاردىڭ الدىن الۋ ءجونىندەگى ساقتىق ارەكەتتەرگە ارنايى كوڭىل ءبولدى. بارلىق ماسەلەنىڭ ءتۇيىنى «سالاماتتى قازاقستان» باعدارلاماسىن جۇزەگە اسىرۋمەن بايلانىستى ەكەندىگىنە توقتالدى. سالاماتتى ءومىر سالتىن قالىپتاستىرعان كەز كەلگەن جان اۋرۋعا شالدىقپايدى. سول سەبەپتى دە اۋىرىپ ەم ىزدەگەننەن, اۋىرمايتىن جول ىزدەگەن الدەقايدا ءتيىمدى دەدى.
اراي ۇيرەنىشبەكقىزى.