قىتايدىڭ قازاقستانداعى توتەنشە جانە وكىلەتتى ەلشىسى چجوۋ لي پارلامەنت ءماجىلىسى ۇيىنە كەلدى. ول پارلامەنت ءماجىلىسى اپپاراتىنىڭ باسشىسى ەرگەن دوشاەۆپەن كەزدەسىپ, بىرقاتار ماسەلەلەر جونىندە پىكىر الماستى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋدىڭ ارقاۋى – پارلامەنتارالىق بايلانىستى نىعايتۋ. ەرگەن دوشاەۆ كورشى مەملەكەتپەن اراداعى دوستىق قارىم-قاتىناس جىل سايىن دامىپ كەلە جاتقانىن تىلگە تيەك ەتتى. ەكى ەل اراسىنداعى جوعارى دەڭگەيدەگى پىكىر الماسۋ ىنتىماقتاستىق بايلانىستىڭ قارقىن الۋىنا جول اشىپ وتىر.
سوعان سايكەس پارلامەنتارالىق بايلانىس پەن پارتياارالىق تاجىريبە الماسۋ ءىسى دامىپ كەلەدى. ماسەلەن, 2010 جىلى قاراشا ايىندا قازاقستان پارلامەنتى ءماجىلىسىنىڭ توراعاسى ورال مۇحامەدجانوۆتىڭ شاقىرۋىمەن قىتاي حالىقتىق ساياسي كونسۋلتاتيۆتىك كەڭەسى بۇكىلقىتايلىق كوميتەتىنىڭ توراعاسى تسزيا تسينلين رەسمي ساپارمەن قازاقستانعا كەلگەن بولاتىن.
بۇل جولعى كەزدەسۋدە ءۇستىمىزدەگى جىلى قىركۇيەك ايىندا قىتايدىڭ حالىق وكىلدەرىنىڭ بۇكىلقىتايلىق جينالىسى تۇراقتى كوميتەتىنىڭ توراعاسى ۋ بانگو قازاقستانعا العاشقى رەسمي ساپارمەن كەلەتىنى ءسوز بولدى. ساپار باعدارلاماسىندا ونىڭ قازاقستان پارلامەنتى ءماجىلىسىنىڭ توراعاسى ورال مۇحامەدجانوۆپەن كەزدەسەتىنى كوزدەلۋدە.