سىرت ادامعا ءار جەردىڭ تاريحى مەن مادەنيەتى, ايتۋلى تۇلعالارى اۋەلى ەسكەرتكىشتەر ارقىلى تانىلاتىنى ءمالىم. وسى ورايدا قاراعاندى ايماعىنىڭ ومىرىندە وشپەس ءىزى بار ادامدار كىمدەر ەكەنى قازىر قالانىڭ كورىكتى تۇستارىنان ايقىن اڭعارىلادى. قازىر دەيتىنىمىز, تاۋەلسىزدىككە دەيىن جامبىل بابامىزدىڭ ەلەۋسىزدەۋ بۇيىردەگى مۇسىنىنەن باسقا حالقىمىز ماقتانىشتارى بەينەسىن ەستە ۇستارداي ەسكەرتكىشتەر بولماي كەلدى. ەندى بۇگىندە شاھاردى ارالاساڭىز جاسىل جەلەككە ءبولەنگەن ەڭ ادەمى مۇيىستە اباي, ءوز اتىنداعى باس كوشە بويىندا بۇقار جىراۋ تۇر ويلانىپ, ءسوز زەرگەرلەرى ساكەن مەن عابيدەن اينالاعا كوز تىگەدى ءسۇيسىنىپ. ال تاياۋ كۇندەردە ولەڭ ونەرىنىڭ سۇڭقارى قاسىم قوسىلادى ارالارىنا.
ساكەن كوشەسى قيىلىسىنان ورتالىق ساياباققا كىرەبەرىس جەردە تۇرعىزىلۋى اياقتالىپ قالعان اقىن ەسكەرتكىشى 9 قىركۇيەكتە اشىلعالى وتىر. بيىكتىگى 8 مەترگە جۋىق. جىر جۇلدىزىنىڭ تۇتاس ءمۇسىنى قولادان قۇيىلعان. ونى ەلىمىزگە تانىمال ساۋلەتشى, قازاقستان سۋرەتشىلەر وداعىنىڭ مۇشەسى جەڭىس مولداباەۆ جاساعان. وسىعان بايلانىستى مۇسىنشىلەر بايقاۋىندا ۇسىنعان جوباسى وزىق شىعىپ, تاڭداۋ سوعان تۇسكەن ول اقىندى ولەڭدەرىندەگىدەي ءورشىل تۇلعادا بەينەلەگەن. ەسكەرتكىشتىڭ جان-جاعى اسەم بەزەندىرىلىپ, كوپشىلىك سۇيسىنە دەمالار, سەيىلدەر ورىن بولماق.
ايقىن نەسىپباي, قاراعاندى.