ۇستىمىزدەگى جىلدىڭ 12 شىلدەسىندە «ەگەمەن قازاقستان» گازەتى قازاقستان مۇسىلماندارى ءدىني باسقارماسى جانە ورتا ازيا مۇفتيلەر كەڭەسىنىڭ ءتوراعاسى, باس ءمۇفتي, شەيح ءابساتتار قاجى دەربىسالىنىڭ كاسىپكەرلەر مەن ەل حالقىنا جولداعان «جارىلقاۋشى ايدا جۇرتقا جەڭىلدىك جاسايىق» اتتى ءۇندەۋىن جاريالاعان بولاتىن. ءبىز بۇگىن سول ۇندەۋگە بايلانىستى رەداكتسياعا كەلگەن ءبىر توپ وقىرمان حاتىن جۇرت نازارىنا ۇسىنىپ وتىرمىز.
ساۋاپتى ىستەر جاساۋعا شاقىرادى
بارشا قازاقستان حالقىن وتانىمىز ءۇشىن ايتۋلى كەزەڭ بولىپ تابىلاتىن, مۇسىلمان بالاسى اسىعا كۇتەتىن, ون ەكى ايدىڭ سۇلتانى, قاسيەت نۇرى توگىلگەن – رامازان ايىنىڭ باستالۋىمەن قۇتتىقتايمىز.
ەگەمەندىك العان از جىلداردىڭ ىشىندە ەلىمىز نەبىر كەدەرگىلەرگە قاراماستان, اياعىنان تىك تۇرىپ, ءار قادامىن انىق باسىپ, قارقىندى دامۋدىڭ داڭعىل جولىمەن العا باستاپ بارادى. حالقىمىزدىڭ الەۋەتى ءوسىپ, داۋلەتى ارتتى, اق-نيەتى وڭ بولىپ, ىنتىماعى ورنىقتى, ىزگىلىكتىڭ جولىن تاڭداپ مەرەيى تاسىدى. قازاق ەلى شارتاراپتى قاۋىپسىزدىك پەن ىنتىماقتاستىققا قاراي باستادى. بيىل, مىنە, يسلام ىنتىماقتاستىعى ۇيىمىنىڭ تىزگىنىن قولعا الىپ, يسلام الەمىنىڭ بىرلىگىن نىعايتۋعا قاجىرلى كۇش جۇمساۋعا بەل بۋىپ وتىرمىز. بارشا الەمدى تاتۋلىق پەن ىزگىلىككە شاقىرعان قازاقتىڭ بايتاق دالاسى بەيبىتشىلىك پەن كەلىسىمنىڭ التىن ۇياسىنا اينالدى. تاۋەلسىزدىك جىلدارى وتانداستارىمىز تاريحپەن بىتە قايناسقان رۋحاني باستاۋىمىزعا دەن قويىپ, اتا ءدىنىمىز – يسلامعا ەتەنە بەت بۇردى.
تاۋەلسىزدىگىمىزدىڭ 20 جىلدىعىن الەم الدىندا ابىرويمەن, تولاعاي تابىستارمەن جانە بەرەكە-بىرلىك, ىنتىماقپەن قارسى الىپ وتىرۋىمىز حالقىمىزدىڭ مارتەبەسىن اسقاقتاتىپ, ءاربىر وتانداسىمىزدىڭ ماقتانىش سەزىمى مەن قۋانىشىن تاسىتارى ءسوزسىز.
ءبىز وسى تابىستارعا حالقىمىزدىڭ مەيىرىمدىلىگى مەن يماندىلىعى, كەڭپەيىل دە جومارت بەيبىتشىلىكسۇيگىش دارحاندىعى, ءاربىر قازاقستان ازاماتىنىڭ ولشەۋسىز قاجىرلى ەڭبەگى مەن ەل مۇراتىنا دەگەن ادال نيەتىنىڭ ارقاسىندا قول جەتكىزىپ وتىرمىز.
ەجەلدەن كەمەڭگەر حالقىمىز رامازان ايىندا ورازاسىن ۇستاپ, ەلدىڭ تىنىشتىعىن, ىنتىماعىن, ىرىس-بەرەكەسىن تىلەپ, كەدەي مەن جەتىمگە, قارىپ پەن اۋرۋعا شالدىققاندارعا كومەك كورسەتكەن. بۇل ايدا بارشا جۇرت جات قىلىقتاردان اۋلاق بولىپ, اينالاسىنا مەيىرىم مەن شۋاعىن توگىپ, اۋىز اشار داستارحانىن كوپشىلىكپەن بولىسۋگە اسىعادى. رامازان ايى ادامزاتتى قاتە جولدان ساقتاپ, سەنىمىن نىعايتىپ, ەلدىڭ بىرلىگى مەن ىنتىماعىن ارتتىرادى.
قازاقستان حالقى اسسامبلەياسى بارشا قازاقستان حالقىن, ءاربىر وتانداسىمىزدى قاسيەتتى ايدا ەل ىرىسى ءۇشىن جاقسى ىستەر, ساۋاپتى امالدار جاساۋعا شاقىرادى.
ۇستاعان ورازالارىڭىز قابىل بولسىن!
ەلىمىز تىنىش, تاۋەلسىزدىگىمىز ماڭگى بولسىن!
قازاقستان حالقى اسسامبلەياسىنىڭ كەڭەسى.
ءدىنىمىزدىڭ اجارىن اشار قادام
ءدىنباسىمىز ءابساتتار قاجىنىڭ ەل حالقىنا ۇندەۋىنىڭ الەۋمەتتىك تەرەڭ استارى, ءمانى مەن ماعىناسى بار ەكەنى ايداي اقيقات. كۇمانى كوپ, باعىتى بۇلدىر ءارتۇرلى ءدىني اعىمدار كوبەيە تۇسكەن بۇگىنگى كەزەڭدە مۇنداي يگى ىستەر ءداستۇرلى ءدىنىمىزدىڭ اجارىن اشا تۇسەدى دەگەن ويدامىز. سونداي-اق ءوز ۇندەۋىندە شەيح مۇمكىندىگى بار وتانداستارىمىزدى وسىناۋ قاسيەتتى دە بەرەكەگە تولى ايدا ەل-جۇرتقا شاپاعاتى تيەتىن يماندى ىستەردى مەيلىنشە كوبىرەك جاساۋعا شاقىرىپتى. ورازا كەزىندە ازىق-ت ۇلىك پەن باسقا دا كۇندەلىكتى تۇتىناتىن تاۋار تۇرلەرى باعاسىنىڭ يمانتارازى بولعانى ءجون ەكەنىن جەتكىزىپتى. بۇل تارماقتىڭ ەل ىرىسىن ەسەلەۋگە ۇلەس قوسىپ جۇرگەن ءبىز سەكىلدى كاسىپكەرلەرگە دە قاتىسى بار دەپ تۇسىنەمىز.
ءارى باس ءمۇفتي ءابساتتار دەربىسالىنىڭ ۇندەۋىن قولداۋعا رەسپۋبليكاداعى بارشا ارىپتەستەرىمىزدى شاقىرامىز.
كاسىپكەرلەر: ءسابيت وتەباليەۆ, ريشات حايرۋللين,
حامزات يساەۆ, ءبىرجان قوجاقوۆ,
تەمىرعالي قۇرمانعاليەۆ, ساعات ىدىرىسوۆ.
باتىس قازاقستان وبلىسى.
رامازان ايىندا جەڭىلدىك جاسايدى
ءابساتتار قاجى دەربىسالىنىڭ ەلىمىزدەگى كاسىپكەر ازاماتتار مەن مەكەمە باسشىلارىنا رامازان ايىنا بايلانىستى زور ساۋاپقا كەنەلەر ءىس-شارالار اتقارۋعا شاقىرىپ, بۇكىل مۇسىلمان اتىنان جولداعان ءوتىنىش-تىلەگىندە جانى ىزگىلەرگە جومارتتىق جاراساتىنىن ايتقان ەدى. مىنە, الماتى وبلىسىنىڭ جۇرتشىلىعى ۇندەۋدە ايتىلعان يگى ۇسىنىستاردى قۋانا قابىل الىپ, قۋاتتايتىندىقتارىن ءبىلدىرىپ, قاسيەتتى رامازان ايىنىڭ قۇرمەتىنە ءبىر اي بويى حالىق تۇتىناتىن ازىق-ت ۇلىك, قۇرىلىس ماتەريالدارىن, جانار-جاعارمايدى, سونداي-اق حالىققا قىزمەت كورسەتۋ ورىندارىنىڭ باعاسىن تومەندەتىپ جاتىر.
بىلتىر دا رامازان ايىنىڭ قۇرمەتىنە اۋدانداعى «راحات» ساۋدا ۇيىندە كيىم-كەشەك ساتاتىن كاسىپكەر باۋىرجان سارسەنوۆ, ءتاتتى سۋسىن ونىمدەرىن شىعاراتىن «باشەنوۆ» جشس باسشىسى قاسەنحان باشەنوۆ ءوز تاۋارلارىنىڭ قۇنىن تومەندەتسە, «اۋىلتەحنيكا» اق باسشىسى سەيىلحان بەكوۆ مۇقتاج جاندارعا كومەك قولىن سوزىپ, حالىققا ساۋدالايتىن كومىرىنىڭ باعاسىن ارزانداتىپ, ەكى مەشىتتى كومىرمەن قامتاماسىز ەتسە, «ۇشتوبە اۋداندىق ەلەكتر ستانساسىنىڭ» باستىعى ىرعايبەك جاپارقۇلوۆ رامازان ايىندا اۋداندىق ورتالىق مەشىتتىڭ ەلەكتر تولەمى قۋاتىن تولىقتاي ءوز موينىنا العان بولاتىن.
قاراتال اۋدانىنىڭ ءبىر توپ كاسىپكەرلەرى بيىل دا باس ءمۇفتي ءابساتتار قاجى دەربىسالىنىڭ ۇندەۋىنەن كەيىن باعانى ارزانداتىپ, تۇرمىسى تومەن وتباسىلارعا قارجىلاي كومەك كورسەتىپ, وتىن-كومىرىن ارزان باعامەن ساۋدالاپ, حالىقتى ءبىر قۋانتىپ تاستادى. ناقتىراق ايتساق, «اۋىلتەحنيكا» جشس باسشىسى سەيىلحان بەكوۆ, «تاماس» جشس باسشىسى اسىلبەك پۇسىرمانوۆ, «باشەنوۆ» جشس باسشىسى قاسەنحان باشەنوۆ جانە تاعى باسقا ءيمانجۇزدى ازاماتتارعا جۇرتشىلىقتىڭ العىستان باسقا ايتارى جوق.
اسحات ومىرباەۆ, جۋرناليست.
الماتى وبلىسى,
قاراتال اۋدانى.
قۋاتتايمىز
ءدىنباسى ءابساتتار قاجى دەربىسالى بارشا قازاقستان جۇرتشىلىعىن رۋحاني جانە سالاماتتىلىق تۇرعىدان جاقسىلىققا شاقىردى. وتكەن جۇما نامازىندا جەزقازعان ايماعىنىڭ وكىل يمامى قوندىباي قاجى سەرىكباي ۇلىنىڭ سول ۇندەۋدى حالىققا تانىستىرىپ, رامازان ايىنداعى ساۋاپتى امالدار مەن ءاربىر مۇسىلماننىڭ ول ايعا دەگەن قۇرمەتى مەن ادەپتەرى جايلى ءتۇسىندىردى. ءيا, شىن مانىندە وسى ءبىر بەرەكەلى دە قاسيەتتى اي رامازاندا مۇمكىندىگى بار وتانداستارىمىزدىڭ ورازا ايى مەن ورازا ۇستاۋشىلاردى قۇرمەت تۇتىپ, ىشكىلىكتىڭ ىشىلمەۋى, سونىمەن قاتار, وسى اي بويى مۇسىلمان قاۋىمى مەن بارشا كوپشىلىككە دۇكەندەر مەن قوناق ءۇيلەردە, شاشتارازدار مەن ءتۇرلى قىزمەت كورسەتۋ ورتالىقتارىندا, كوممۋنالدىق تولەماقىلار مەن تەلەكوممۋنيكاتسيالىق بايلانىس تاريفتەرىن ءتومەندەتۋ شارالارىن ۇيىمداستىرۋ – وتە ساۋاپتى ءىس بولار ەدى. ءبىز ءبىر توپ جەزقازعان قالاسىنىڭ كاسىپكەرلەرى رامازان ايىنىڭ قۇرمەتىنە ءوز كاسىبىمىز سالاسىنان 10 پايىز جەڭىلدىكپەن قالا مۇسىلماندارىنا قىزمەت كورسەتۋ نيەتىندەمىز.
ايگۇل يشانحانقىزى,
عالىمجان قالمانباەۆ,
داستان جاقاەۆ,
جەزقازعان قالاسىنىڭ جەكە كاسىپكەرلەرى.
ادال ىسكە اسىعايىق
قاسيەتتى رامازان ايى قارساڭىندا ءابساتتار قاجى دەربىسالىنىڭ بۇكىل قازاقستان جۇرتشىلىعىنا رامازان ايىندا ازىق-ت ۇلىك تاۋارلارىنا 10 پايىز جەڭىلدىكتەر جاساۋعا, دۇكەندەردە ىشىمدىكتەردى ساتپاۋعا, ال مۇسىلمان حالقىن حارام ارەكەتتەردەن اۋلاق بولۋعا شاقىرعان ۇندەۋىن شىن جۇرەكتەن قولداي وتىرىپ, اللا تاعالانىڭ قۇدىرەتىنە بۇكىل يمانىمىزبەن بويۇسىنۋعا شاقىرامىز!
ورازالارىڭىز قابىل, يماندارىڭىز كامىل بولسىن, اعايىن!
ورازبەك سارسەنباي ۇلى, جازۋشى;
جارىلقاسىن نۇسقاباي ۇلى, جازۋشى,
«ءبىلىم» باسپاسىنىڭ ديرەكتورى;
اشىربەك كوپىش, جازۋشى-پۋبليتسيست,
«ونەر» باسپاسىنىڭ ديرەكتورى;
تاجىگۇل سەرىكباەۆا, قازاقستانعا ەڭبەگى
سىڭگەن مادەنيەت قايراتكەرى;
جارىلقاسىن داۋلەت, سازگەر-اقىن,
مادەنيەت قايراتكەرى.
شاپاعاتتى ايدا شاراپاتتى ىستەر كوبەيسىن!
مىنە, تاۋەلسىزدىككە دەگەن سەنىم وتى سونبەگەن حالىقتىڭ اقىرى تامىلجىپ تاڭى اتتى. مىڭ ءولىپ, مىڭ تىرىلگەن قازاق حالقىنا اللاتاعالانىڭ شاپاعاتى ءتۇستى. بۇگىندە قازاقستان ورتالىق ازيانىڭ ايماڭداي ەلىنە اينالدى. ءبىز حالقىمىز بۇرىن-سوڭدى بولماعان وسىناۋ يگىلىكتەرگە تەك تاۋەلسىزدىكتىڭ ارقاسىندا عانا جەتە العانىن ەستەن شىعارماۋىمىز كەرەك.
بيىل تاۋەلسىزدىككە 20 جىل تولدى. ەلباسى باستاعان قازاقستاندىقتار 20 جىلدا عاسىرلاردىڭ ۇلەسىنە ءتان ءىس تىندىردى. سارىارقانىڭ ءتوسىنەن ساۋلەتتى استاناسىن تۇرعىزىپ, اتا-بابادان قالعان ۇلان-عايىر دالانىڭ شەكاراسىن بەكىتتى. بۇل ءبىزدىڭ تاريحىمىزدا بولماعان كەرەمەت جەتىستىك!
ءبىز ورتەڭنەن ونگەن قاراعايداي زەڭگىر كوككە شانشىلا, جان-جاعىمىزعا جاسىل جاپىراق جايىپ, تەرەڭگە تامىر تارتۋدامىز.
حالقىنىڭ 70 پايىزى يسلام ءدىنىن ۇستاناتىن ەلىمىزدە يسلامنىڭ وركەندەۋى دە وسى تاۋەلسىزدىك جىلدارىندا. ءبىر سوزبەن ايتقاندا, تاۋەلسىزدىك اتا ءدىنىمىزدىڭ دە ارقاۋى بولدى. كەشە اللانى اۋىزعا الۋعا الاڭدايتىن قازاقستاندىق مۇسىلماندار بۇگىندە اتا دىنىمەن قايتا قاۋىشتى. يسلام قۇندىلىقتارى وركەن جايدى.
بيىل قازاقستان يسلام ىنتىماقتاستىعى ۇيىمىنىڭ تىزگىنىن ءوز قولىنا الدى. دۇنيەدەگى ءبىر ميلليارد مۇسىلماننىڭ باسىن قوساتىن ۇيىمنىڭ تورىنە كوتەرىلۋى ەلىمىزدىڭ يسلام الەمىندەگى ورنىن ايقىنداي تۇسەدى. وسىنداي ەلەۋلى وقيعالارمەن تۇسپا-تۇس كەلگەن بيىلعى قاسيەتتى رامازان ايى ورايىمەن قازاقستان مۇسىلماندارى ءدىني باسقارماسى جانە ورتا ازيا مۇفتيلەر كەڭەسىنىڭ توراعاسى, باس ءمۇفتي, شەيح ءابساتتار قاجى دەربىسالى حازىرەت قاسيەتتى رامازان ايىنا بايلانىستى جولداعان ءۇندەۋىندە مۇباراك ايىندا باعالاردىڭ كۇرت قىمباتتاپ كەتەتىنىنە قىنجىلاتىنىن بىلدىرە كەلىپ, كاسىپكەرلەردى ازىق-ءتۇلىك پەن قوناق ۇيلەر ءجانە قوعامدىق قىزمەتتەر باعاسىن 10 پايىزعا تومەندەتۋگە شاقىرادى. ول سونداي-اق, قاسيەتتى رامازان ايىندا مەيرامحانالار مەن جيىن-تويلاردا ىشكىلىكتىڭ ەشبىر ءتۇرى ىشىلمەسە, ساتىلماسا دەگەن تىلەگىن دە بىلدىرەدى.
ءبىز جۇرەگى تازا مۇسىلمان ءارى كاسىپكەر رەتىندە باس ءمۇفتيدىڭ ۇندەۋىن جان-تانىمىزبەن قولداپ, ءوز تاراپىمىزدان وسى ايدا ازىق-ت ۇلىك باعاسىن مۇمكىندىگىنشە تومەندەتىپ ساتۋعا نيەتتىمىز جانە باسقا كاسىپكەرلەر دە ساۋابى مول شاراپاتتى ءىستى قولدايدى دەپ سەنەمىز.
ىسقاق نۇراحمەت, ايشاگۇل ساندىباەۆا,
تەكەلى قالاسى.
يگى باستاما
ءدىنباسىمىزدىڭ كوتەرىپ وتىرعان ماسەلەسى وتە ورىندى جانە ۋاقىتىندا قولعا الىنعان يگى باستاما ەكەنى داۋسىز. مۇنداي تىڭ باستاما وبلىس, اۋدان باسشىلارى, كاسىپكەرلەر, ءتۇرلى مەكەمە جەتەكشىلەرى تاراپىنان ءۇلكەن قولداۋدى قاجەت ەتەدى. ۇندەۋدە ايتىلعانداي, كاسىپكەرلەر مەن مەكەمە باسشىلارى از دا بولسا قاراپايىم جاندارعا كوڭىل ءبولىپ, حالىقتىڭ مۇددەسىن ويلاسا, اللا الدىندا ۇلكەن ساۋاپقا يە بولارى ءسوزسىز.
ءبىزدىڭ كوكسۋ اۋدانىنىڭ مۇسىلمان جاماعاتى حازىرەتتىڭ ۇندەۋىن قولداپ وتىرمىز. الداعى ۋاقىتتا ۇندەۋ ءوز قولداۋشىلارىن تاۋىپ, جىل سايىنعى داستۇرگە اينالادى دەپ سەنەمىز.
رامازان ساۋدا ەمەس, ساۋاپ ايى ەكەنىن ءتۇسىنىپ ەل تۇتىنۋشىلارى ءۇشىن وسى ايدا ءتيىمدى جاعدايلار جاساۋدى باستاپ كەتكەن يماندى كاسىپكەرلەرىمىزگە اللانىڭ نۇرى جاۋسىن!
كوكسۋ اۋدانىنىڭ مۇسىلمان جاماعاتى اتىنان:
داۋلەت مۇستافاەۆ, كاسىپكەر; سايلاۋ ۋرين, كاسىپكەر; مانات تاستانوۆ, مەكەمە باسشىسى; ەدىلبەك ەرىمبەت, اۋداننىڭ باس يمامى; مالگاجدار جىلقىشىباي, نايب يمام; مۇحامەتكەرىم ەدىلباەۆ, اقساقالدار القاسىنىڭ مۇشەسى; اسحات يبراگيموۆ, اقساقالدار القاسىنىڭ مۇشەسى; ءشارىپحان جۇمادىلوۆ, اقساقالدار القاسىنىڭ مۇشەسى.
الماتى وبلىسى.