ورال قالاسىندا اباي, رايىمبەك باتىر, سىرىم, ماحامبەت, يساتاي, قۇرمانعازى, دينا سىندى ۇلتىمىزدىڭ ۇلى تۇلعالارىنىڭ كەلبەتى بەينەلەنگەن داپتەرلەر شىعارىلا باستادى.
ەل تاۋەلسىزدىگىنىڭ 20 جىلدىعىنا وراي «نۇر وتان» حدپ بقوف-تىڭ «جايىق پرەسس» جشس-داعى باستاۋىش ۇيىمىنىڭ مۇرىندىق بولۋىمەن اتالمىش سەرىكتەستىكتىڭ باسپاحاناسىندا باسىلعان بۇل ءداپتەرلەردىڭ ارقايسىسى ازىرگە 500 دانامەن شىعىپ, كوپشىلىككە جول تارتتى. 36 بەتتىك ءداپتەردىڭ باعاسى – 65 تەڭگە. «قازىر وقۋشىلار نەگىزىنەن شەتەلدىك ەسترادا, سپورت جۇلدىزدارىنىڭ سۋرەتتەرى بەينەلەنگەن داپتەرلەردى الاتىنى راس. ول بولاشاق ۇرپاعىمىزدىڭ تاربيەسىنە دە اسەر ەتەدى, –دەدى وسىناۋ وتاندىق ءونىمنىڭ تۇساۋكەسەر شاراسىندا «جايىق پرەسس» جشس باس ديرەكتورى جانتاس سافۋللين. – ءبىز ءوزىمىز وعان بالاما رەتىندە ەشنارسە ۇسىنباي وتىرىپ, بۇل جايتقا رەنجي المايمىز. مىنە, وسى ولقىلىقتىڭ ورنىن تولتىرۋ باعىتىندا جاڭا ءىستى قولعا الىپ وتىرمىز».
تۇساۋكەسەرگە قاتىسقان ورال قالالىق ءبىلىم بەرۋ ءبولىمىنىڭ باستىعى جانسۇلۋ تورەمۇراتوۆا وقۋشىنىڭ نەگىزگى قۇرالىندا بابالار بەينەسىنىڭ سالىنۋى وتانسۇيگىشتىك سەزىمدى قالىپتاستىرۋعا وڭ ىقپال ەتەتىنىن تىلگە تيەك ەتتى. ال داپتەر مۇقاباسىنداعى اباي مەن ماحامبەت سەكىلدى ۇلىلارىمىزدىڭ ءبىر اۋىز ولەڭىنىڭ ءوزى جاستارعا وي سالىپ, تۇلعالاردىڭ ومىردەرەگى جايلى اقپاراتتار دا بالالاردىڭ جادىندا تەز جاتتالاتىندىعىنا ءمان بەردى.
ورال مەديتسينالىق كوللەدجىنىڭ ديرەكتورى, قالالىق ءماسليحاتتىڭ دەپۋتاتى ماقسوت بەرگەن ساباق كەزىندە وقۋشىلاردىڭ الدىندا تۇراتىن داپتەرىنىڭ العاشقى بەتىندە داڭقتى اتا-اجەسىنىڭ كەسكىن-كەلبەتى بەينەلەنۋى, ولاردىڭ ونەگەلى ومىرىنەن سىر شەرتىلۋى جاس ۇرپاقتىڭ بويىنا ۇلتتىق رۋحتى دارىتۋعا سەبەپشى بولاتىنىن ايتتى.
وتاندىق تاۋاردىڭ تانىستىرىلىمىنا «نۇر وتان» حدپ بقوف, وبلىستىق تىلدەرى دامىتۋ باسقارماسىنىڭ وكىلدەرى, ءبىلىم ءجۇيەسىنىڭ قىزمەتكەرلەرى, اتا-انالار مەن جۋرناليستەر قاتىستى.
تەمىر قۇسايىن,
باتىس قازاقستان وبلىسى.