قازاق ۇلتتىق اگرارلىق ۋنيۆەرسيتەتىندە «ۇبح «قازاگرو» اق-تىڭ قاتىسۋىمەن «اگرارلىق يننوۆاتسيا مەن ءوندىرىستى نارىق ارقىلى – قۋاتتى قازاقستاندى بىرگە قالايمىز» اتتى ەكى كۇندىك رەسپۋبليكالىق عىلىمي-ءتاجىريبەلىك سەمينار ءوتتى. اۋىل شارۋاشىلىعى مينيسترلىگىنىڭ ماماندارى, ەلىمىزدىڭ 14 ايماعىنان شارۋا قوجالىقتارى مەن فەرمەرلەر, الەۋمەتتىك كاسىپكەرلىك كورپوراتسيا وكىلدەرى قاتىسقان جيىندا ءۇيدب-ءنى جۇزەگە اسىرۋ جانە استانا مەن الماتى قالالارىندا ازىق-ت ۇلىك بەلدەۋىن قالىپتاستىرۋ شەڭبەرىندەگى كوكەيكەستى ماسەلەلەر قارالىپ, اتالعان جوو-مەن اگرارلىق عىلىمي-وندىرىستىك كونسورتسيۋم قۇرۋ جونىندە مەموراندۋمعا قول قويدى.
اۋىل شارۋاشىلىعى سالاسىنا جوعارى ءبىلىمدى ءارى بىلىكتى ماماندار دايارلاپ, اگرارلىق ونەركاسىپ كەشەنىندەگى مەملەكەتتىك يندۋستريالىق-يننوۆاتسيالىق دامۋ باعدارلاماسىنىڭ تالاپ تۇرعىسىنان ءىس جۇزىنە اسۋىنا اسا جوعارى جاۋاپكەرشىلىكپەن اتسالىسىپ كەلە جاتقان اگرارلىق ۋنيۆەرسيتەت عالىمدارىنىڭ ايتۋىنشا, بۇل قادام اۋىلشارۋاشىلىق ونىمدەرىن ساپالى دايىنداپ, الەۋەتىن ارتتىرۋدا اگرارلىق وندىرىسكە ىقپال ەتپەك. مەموراندۋم اياسىندا تاراپتار وتاندىق اگروونەركاسىپ كەشەنىندە عىلىمي وندىرىستىك كونسورتسيۋم قۇرۋعا نيەتتى بولىپ, ۇاۋ-دا باس قوسۋىنىڭ سەبەبى – ۋنيۆەرسيتەت قابىرعاسىندا قازاقستان-جاپون يننوۆاتسيالىق ورتالىعى, 6 عىلىمي-زەرتتەۋ ينستيتۋتى جانە 31 ىزدەنۋشىلەر زەرتحاناسى جۇمىس ىستەپ, مۇنداعى عالىمدار سوڭعى جىلدارى اۋىل شارۋاشىلىعى سالاسىندا كوپتەگەن يننوۆاتسيالىق جوبالار ۇسىنۋىندا. وسى رەتتە سەمينار بارىسىندا اتالمىش وقۋ ورنىنداعى قازاق-جاپون يننوۆاتسيالىق ورتالىعىندا بىرلەسىپ جۇزەگە اسىرعان جانە جوسپارلانىپ وتىرعان جوبالاردىڭ, عىلىمي-زەرتتەۋ ورتالىقتارى مەن يننوۆاتسيالىق زەرتحانالاردىڭ, ۋنيۆەرسيتەت عالىمدارىنىڭ بىتكەن عىلىمي جۇمىستارىنىڭ تۇساۋكەسەرى ءوتتى. ونىڭ ءۇستىنە, ازىق-ت ۇلىك قاۋىپسىزدىگىن ساقتاۋدا ەل ۇكىمەتى دە كوپتەگەن تىڭ جوبالاردى جىل ساناپ ىسكە اسىرۋدا. سونداي-اق مۇندا وتاندىق اۋىلشارۋاشىلىق ونىمدەرىن تەك ىشكى رىنوكقا تاۋەلدى ەتپەي, سىرتقا شىعارۋعا دا الەۋەتىمىز جەتەتىنى ايتىلدى.
جيىندا قازۇاۋ رەكتورى تىلەكتەس ەسبولوۆ ەلىمىزدەگى ازىق-ت ۇلىك قاۋىپسىزدىگىن قامتاماسىز ەتۋدە اگرارلىق يننوۆاتسيا مەن ءوندىرىستى رىنوك ارقىلى قالىپتاستىرىپ, ونىڭ ماسەلەلەرىن شەشۋدە بار مۇمكىندىكتەردى بىرىكتىرۋ قاجەتتىگىن اتاپ ءوتتى. ال «قازاگرو» ۇبح» اق باسقارما توراعاسىنىڭ ورىنباسارى قايرات ايتۋعانوۆ قازۇاۋ-دىڭ عالىمدارى, اكك جانە «قازاگرو» اراسىنداعى يننوۆاتسيالىق زەرتتەۋلەر جۇرگىزىپ, ونى ىسكە اسىرۋداعى ارىپتەستىك قارىم-قاتىناس وزەكتى ماسەلە بولىپ سانالاتىنىن, سونداي-اق بولاشاقتا اۋىل شارۋاشىلىعى سالاسىندا اتقارىلار ىستەر كوپ ەكەنىن العا تارتتى. «ءبىزدىڭ بولجام بويىنشا, تەك ءىرى قارا ەتىن ەكسپورتتاۋدى 2016 جىلى 60 مىڭ تونناعا, 2020 جىلى 200 مىڭ تونناعا جەتكىزۋدى كوزدەپ وتىرمىز. قازىردىڭ وزىندە مەملەكەت بىرتە-بىرتە جاقسى كورسەتكىشتەرگە قول جەتكىزە باستادى. وسىنىڭ بارلىعى بۇگىنگى اۋىل شارۋاشىلىعىنداعى عىلىم مەن تەرەڭ ءبىلىمنىڭ جەمىسى, – دەدى ول.
سەميناردىڭ ەكىنشى كۇنى «اۋىل شارۋاشىلىعى وندىرىسىندەگى اگرارلىق عىلىمنىڭ جەتىستىگى» اتتى دوڭگەلەك ۇستەل ءوتىپ, وندا عىلىم مەن وندىرىستەگى ءتيىمدى ءىس-قيمىلدىڭ, ەكونوميكاداعى اگرارلىق سالاعا دەگەن قوعامدىق قىزىعۋشىلىقتى ارتتىرۋ, رەسپۋبليكانىڭ اگروونەركاسىپ كەشەنىندەگى جوبالاردىڭ دامۋىنا دەم بەرۋ ماسەلەلەرى دە تارازى تالقىسىنا سالىندى.
گۇلزەينەپ سادىرقىزى.