...«مەملەكەتتىك رامىزدەر» كومپوزيتسياسى
تاۋەلسىزدىگىمىزدىڭ 20 جىلدىعى ءىس-شارالارى اياسىندا تالشىق كەنتىندە مەملەكەتتىك رامىزدەرىمىز – تۋ, ەلتاڭبا جانە ءانۇراننىڭ ناقتى ۇلگىلەرى بەينەلەنگەن كومپوزيتسيا پايدالانۋعا بەرىلدى. ونىڭ اشىلۋ سالتاناتىندا سويلەگەن سوزىندە اۋدان اكىمى اعزام تاستەمىروۆ استانادا ەلوردا كۇنىن مەرەكەلەۋ «ەتنواۋىل» مەموريالدىق كەشەنىندەگى مەملەكەتتىك تۋدى سالتاناتتى كوتەرۋدەن باستالاتىنىن, وسى ءداستۇردى جالعاستىرۋ ارقىلى جاس ۇرپاق بويىنا وتانشىلدىق سەزىمدى قالىپتاستىرۋداعى ءمان-ماڭىزىن ايرىقشا اتاپ كورسەتتى. ونى تۇرعىزۋعا بيۋدجەتتەن 2,5 ميلليون تەڭگە ءبولىنىپ, «ارت-كوكشە» جشس قۇرىلىس جۇمىستارىن ساپالى اتقارىپ شىققان. قابىرعالارى جەرگىلىكتى گرانيت تاستارمەن كومكەرىلگەن كەشەن انادايدان كوز تارتادى. نەگىزگى تۋدىڭ بيىكتىگى – 21 مەتر.
ءومىر ەسقالي,
سولتۇستىك قازاقستان وبلىسى,
اقجار اۋدانى.
...قيىرشىق تاس زاۋىتى بوي كوتەرۋدە
شالقار اۋدانى بەرشۇگىر سەلولىق وكرۋگى مۇعالجار تاۋىنىڭ قويناۋىنا ورنالاسقان. مۇندا قيىرشىق تاستىڭ مول قورى بار. وكرۋگ اۋماعىندا قيىرشىق تاس وندىرەتىن تاعى ءبىر زاۋىتتىڭ قۇرىلىسى قارقىندى جۇرگىزىلۋدە. كاسىپورىن قۇرىلىسىن سالىپ جاتقان «اقشات-اقتوبە» جشس زاۋىتتى وسى جىلدىڭ قىركۇيەك ايىندا پايدالانۋعا بەرۋدى كوزدەۋدە. زاۋىت ىسكە قوسىلعان باستاپقى ۋاقىتتا سەكسەنگە جۋىق جاڭا جۇمىس ورنى اشىلادى.
جۇمىس پروتسەسى اۋىسىمدىق ادىسپەن اتقارىلادى. جاڭادان اشىلاتىن كاسىپورىندا جۇمىسشىلار ءۇشىن بارلىق جاعداي جاساۋ قاراستىرىلۋدا. مۇندا جاتاقحانا, اسحانا, مونشا جۇمىس ىستەيتىن بولادى. جۇمىسشىلار ارناۋلى جۇمىس كيىمىمەن جانە 50 مىڭ تەڭگە كولەمىندە ەڭبەكاقىمەن قامتاماسىز ەتىلەدى. قيىرشىق تاستى تيەيتىن ورىن, وعان دەيىن اپاراتىن تەمىرجول, اۆتوگاراج, كەڭسە عيماراتتارىنىڭ قۇرىلىسىن دا وندىرىستىك نىسانمەن قاتار اياقتاۋعا كۇش سالىنۋدا. جاڭا زاۋىتتا جىل اياعىنا دەيىن 150 مىڭ توننا قيىرشىق تاس ءوندىرۋ جوسپارلانىپ وتىر. الداعى جىلى ءبىر جەلىمەن 450-500 مىڭ توننا قيىرشىق تاس ءوندىرۋ كوزدەلسە, كەيىن ەكىنشى جەلى ىسكە قوسىلعاندا ءونىم ءوندىرۋ ەكى ەسەگە ارتادى دەپ كۇتىلۋدە.
ساتىبالدى ءساۋىرباي,
اقتوبە وبلىسى.
...دەمالىس ورنى اشىلدى
تابيعاتى كورىكتى, باۋرايى تاريحقا تۇنعان ۇلىتاۋ ءوڭىرىنە كەيىنگى كەزدە جان-جاقتان ساياحاتشىلار جيىلەپ كەلەدى. وسىعان بايلانىستى ولارعا ارناۋلى دەمالىس ءۇيىن سالۋ بىلتىر قولعا الىنعان بولاتىن. اۋدان ورتالىعىنىڭ ىرگەسىندەگى بولات سايىندا بوي كوتەرگەن 26 ورىندىق مەيمانحانا كەشەنىندە ورنالاسىپ, ەندى ولكەدەگى ەسكى ەسكەرتكىشتەرمەن اسىقپاي تانىسۋعا, تاۋلار مەن ورمان-توعايلاردى ارالاۋعا بولادى. ونىڭ قاسىندا سەگىز, التى قاناتتى ويۋلى كيىز ۇيلەر دە تىگىلگەن. تۋريستەردىڭ قالاۋلارىنا قاراي ءبىرىن تاڭداي الادى.
ايقىن نەسىپباي,
قاراعاندى وبلىسى.