13 شىلدە كۇنى حالىقارالىق دارەجەدەگى سپورت نۇسقاۋشىسى, الپينيست ەربول ورازالين ەكى سەرىگىمەن بىرگە 9-15 جاس ارالىعىنداعى ءبىر توپ ءجاسوسپىرىمدەردى ەرتىپ سايرام-وگەم ۇلتتىق پاركى ارقىلى سەرۋەنگە شىققان.
نۇسقاۋشىلار تاجىريبەلى, ادامگەرشىلىكتەرى جوعارى جىگىتتەر. بالالاردىڭ اتا-انالارى ۇلاندارىنىڭ تۋعان ەل تابيعاتىنىڭ عاجايىپتارىمەن تىنىستاپ, ارقالانىپ قايتۋىنا قارسى بولمايدى. شىنىعىپ, شيراپ قايتسىن دەپ ويلايدى.
ون كۇننەن كەيىن ورالۋعا ءتيىس توپ سول كەتكەننەن قۇمعا سىڭگەن سۋداي جوق بولعان. سويتسە 14 شىلدە كۇنى سايرام سۋ كەمپينگى ارقىلى وزەن باستاۋىندا تۇرعان مايدانتالعا ءوتىپ, كەرى بۇرىلماق بولعان توپتى وزبەكستان شەكاراشىلارى ۇستاپ, شەكارا بۇزۋشىلار دەپ راسىمدەپ, بوستاندىق اۋداندىق پوليتسيا ءبولىمىنە وتكىزگەن.
شىمكەنتكە ورالۋعا ءتيىس بالالارىن كۇتكەن اتا-انالاردىڭ جان كۇيزەلىسىن سوزبەن جەتكىزۋ قيىن. تاۋ ساياحاتىمەن اينالىساتىن, تۋعان جەر تابيعاتىن ناسيحاتتاپ جۇرەتىن بەلگىلى جۋرناليست كەڭەس يسمايىلوۆ باس بولىپ, بالالارعا ىزدەۋ جاريالاعان. ءاۋ باستا كۇدىك وزبەك شەكاراشىلارىنا تۇسكەنىمەن, جەكەلەگەن ادامداردىڭ ارالاسۋى ارقىلى بالالاردىڭ بوستاندىق پوليتسيا بولىمىندە قامالىپ وتىرعاندىعى بەلگىلى بولعان.
تاۋدا ارنايى تارتىلعان شەكارا بەلدىگى جوق. مىنا مەتر قازاقستاندىكى, مىنا جارتى مەتر وزبەكستاندىكى دەي المايسىڭ. ءوزبەك شەكاراشىلارىنىڭ اسىرەقىراعىلىق تانىتۋى بۇل ءبىر ەمەس. سوناۋ جىلدارى ەكى ەل شەكاراسىن بەلگىلەۋ كەزىندە ارنايى كەلگەن پارلامەنت دەپۋتاتتارى مەن التىن پوگوندى گەنەرالدارىمىزدىڭ كوزىنشە سولاردى ءتۇسىرىپ ءجۇرىپ, اڭداۋسىزدا وزبەك شەكاراسىنا ەكى-ءۇش قادام كىرىپ كەتكەن وپەراتورىمىزدى ولاردىڭ الىپ قاشقانىن كورىپ ەدىك.
قازاقستاندا 400 مىڭعا جۋىق وزبەك دياسپوراسى تۇرادى. ءبوتەنسىڭ دەگەن ەشكىم جوق. جاعدايلارى وتە جاقسى. پروبلەمالارى شەشىلگەن قازاق ولارعا تۋىسقانىم دەپ قارايدى.
تۋىسقاندىق ەكى جاققا بىردەي بولۋى كەرەك. ەڭ بولماسا حابارلاپ ايتپاي ما؟ ءار نارسەنىڭ تالابىنا ساي ءتارتىبى دە بولادى عوي. شەكارادا اسىرەارەكەتتەر جاسايتىن وزبەك ساقشىلارىنىڭ وسىنى ويلامايتىنى وكىنىشتى.
باقتيار تايجان,
وڭتۇستىك قازاقستان وبلىسى.