سوڭعى جىلدارى قۋاڭشىلىقتىڭ زاردابىن شەككەن شارۋا ادامى قاشان جاز ورتاسى بولعانشا كۇپتى كوڭىلدە جۇرگەنى شىندىق. ىلعالدى كوكتەم جاڭبىرلى جازعا ۇلاسقاندا عانا كوڭىلىن دەمدەپ, تابيعات بەرگەن مول ىرىزدىقتى جەتكىلىكتى جيناپ الۋدىڭ قام-قارەكەتىنە بىلەك سىبانىپ كىرىسكەن-ءدى. قولداعى مالعا قاجەتتى جەم-ءشوپتى جيناپ الۋدىڭ ءوزى كۇشكە تۇسكەن وتكەن جىلدىڭ اششى ساباعىن ۇمىتا قويماعان اۋىلدىقتار ءشوپ ءپىسىپ-جەتىلىسىمەن شابىندىققا شالعى سالدى. ءوڭىردى تەگىس قامتىعان جاۋىن-شاشىننىڭ مولدىعىنان قۇماقتىڭ, ساي-سالانىڭ, قويناۋ-قولاتتىڭ ءشوبى بيىل ايتارلىقتاي قويۋ دا بيىك بولىپ ءوستى. سوندىقتان دا بولار مال ازىعىن دايىنداۋ جۇمىستارى العاشقى كۇننەن قارقىن الىپ, ءپىشەنشىلەردىڭ ەڭبەگى ونىكتى بولدى.
بۇعان وبلىستا مال ازىعىن دايىنداۋدىڭ ەكپىندى ەكى ايلىعى جاريالانۋى دا كادىمگىدەي سەرپىن بەردى.ۇستىمىزدەگى جىلدىڭ 13 ماۋسىمى مەن 7 تامىزى ارالىعىنداعى ەكپىندى ەكى ايلىق كەزىندە وبلىستا 1,5 ميلليون توننا پىشەن دايىنداۋ كوزدەلۋدە. ءار اۋدانعا ەكپىندى ايلىق كەزىندە دايىنداۋى ءتيىس پىشەن مولشەرى بەلگىلەنىپ, ناقتى تاپسىرما بەرىلدى. تاپسىرمانى ورىنداۋىنا قاراي اقشالاي سىيلىق تا بەلگىلەندى. مۇنىڭ ءوزى ەكىجاقتى تيىمدىلىكتى تۇسىنگەن پىشەنشىلەردى ىجداعاتتى قيمىلداۋعا ىقپال ەتتى. وبلىس پىشەنشىلەرى ۇستىمىزدەگى جىلدىڭ 10 شىلدەسىنە 806,6 مىڭ توننا مال ازىعىن دايىنداپ ۇلگەردى. بۇل تاپسىرمانىڭ 53,8 پايىزى ورىندالدى دەگەن ءسوز. مال ازىعىن دايىنداۋ جۇمىستارىن ۇتىرلى ۇيىمداستىرعان ايتەكە بي, قوبدا جانە ويىل اۋداندارىنىڭ كورسەتكىشتەرى بۇدان دا جوعارى.
ەكپىندى ەكى ايلىقتىڭ ەكى اپتاسىنىڭ تاپسىرمالارىن بارلىق اۋداندار اسىرا ورىنداۋعا قول جەتكىزدى. كوش باسىنداعى قوبدا اۋدانى ەكى اپتالىقتىڭ تاپسىرماسىن 124 پايىز ورىنداسا, ويىل اۋدانى 118,6 پايىز, اقتوبە قالاسى 114 پايىز جۇزەگە اسىردى. قوبدا اۋدانىندا 164 ءشوپ بريگاداسى جۇمىس ىستەيدى. مۇندا ناۋقاندىق جۇمىسقا 270 ءشوپ شاباتىن اگرەگات, مىڭعا جۋىق ادام جۇمىلدىرىلعان. اۋدانداعى مال ۇستايتىن 4284 جەكە قوجالىقتىڭ 1200-ىنەن استامىنا قازىردىڭ ءوزىندە قىسقا جەتەرلىك مال ازىعى ءتۇسىرىلدى. جاقىندا ويىل اۋدانىنىڭ قاراوي اۋلىندا بولعانىمىزدا بيىلعى ءشوپتىڭ شىعىمىنا كوڭىلىمىز تولدى. اۋىلدىقتار قۇماقتاعى شابىندىقتىڭ گەكتارىنا 10 تسەنتنەردەن استام ءتۇسىم بەرىپ تۇرعانىنا, بيىلعى جازدىڭ بەرەكەلى بولعانىنا قۋانىشتارىن جاسىرمادى. اۋىلداعى شارۋا قوجالىقتارى ءشوپتىڭ ءنارلى كەزىندە قىزۋ قيمىلداۋعا جۇمىلعان. شالقار اۋداندىق اۋىل شارۋاشىلىعى ءبولىمىنىڭ باس مامانى باۋىرجان بازارباەۆ تا بيىلعى شابىندىقتىڭ ونىمدىلىگىنە ءتانتىلىگىن جاسىرمادى.
– جاۋىن-شاشىن مول, جەر ءىرىپ تۇر. شارۋا ادامىنا قىسقا جەتەرلىك مول جەم-ءشوپ قورىن جاساپ الۋعا ەش كەدەرگى جوق. ارزانداتىلعان باعامەن جانارماي ءبولىندى. قازىرگى قارقىنمەن تاپسىرمانى اسىرا ورىنداۋدىڭ مۇمكىندىگى مول, – دەيدى ول.
قازىر شارۋالار وزدەرىنەن ارتىلعان پىشەندى ساتىپ, قارجى تابۋعا داعدىلانىپ الدى. شارۋاشىلىق قۇرىلىمدارى, شارۋا قوجالىقتارى پىشەن بيزنەسىنە قۇلشىنا كىرىسكەن. بارلىق اۋدانداردا بۇعان ءمان بەرگەندىكتەن ساتىمعا شىعارىلعان پىشەننىڭ باعاسى دا تۇسە باستادى. ءباسەكە ءجۇرگەن جەردە باعانىڭ ارزانداۋى زاڭدىلىق. بۇل پىشەن دايىنداۋعا ءوز كۇشى جەتپەيتىن مال ۇستايتىن شارۋا ادامىنا تيىمدى بولىپ تۇر. ياعني, مال باسىن كوبەيتۋدىڭ دە مۇمكىندىكتەرى مولايا تۇسۋدە.
ساتىبالدى ءساۋىرباي,
اقتوبە وبلىسى.