كوپشىلىككە قولايلى قولداۋ

قاراعاندىدا اۋىل تۇرعىندارىنىڭ تۇرمىسىن تۇزەۋ قولعا الىندى بۇل الىس ەلدى مەكەندەردە تۇراتىن جۇرتشى­لىققا قۋانىشتى جاڭالىق بولىپ وتىر. ول ءۇش باعىتتا ىسكە اسىرىلۋ ۇستىندە. اتاپ ايتقاندا, وقىتۋ جانە قايتا وقىتۋعا, نەسيەلىك كومەككە, تۇرعىن ۇيمەن قامتاماسىز ەتۋگە نەگىزدەلگەن. وندا كوزدەلگەندەي, ءبىرىنشى كەزەكتە  جۇمىسسىزدار مەن تابىسى تومەن وتباسىلارعا قولداۋ كورسەتىلەدى. ءبىز بىلگەنىمىزدەي,  قازىر كەلەشەگى جوق دەپ سانا­لاتىن اۋىلداردى انىقتاۋ جۇرگىزىلىپ جاتىر. ونداي­لار­دىڭ قاتارىنا جەرى قۇنارسىز, كوممۋنيكاتسيالىق قۇرىلىمى ءالسىز, جول قاتىناسى كۇردەلى اۋماقتار تۇكپىرىندەگى از ءتۇتىندى قونىستار ەنگىزىلۋدە. وبلىس بويىنشا ازىرگە انىقتالعان 9 ەلدى مەكەننىڭ 5-ءۋى ۇلىتاۋ, 2-ءۋى شەت جانە ءبىر-بىردەن اقتوعاي مەن نۇرا اۋداندارىندا ورنالاسقان. ەكونوميكا جانە بيۋدجەتتىك جوسپارلاۋ باسقارماسىنىڭ ءبولىم باس­تىعى گۇلبادان سۇلەيمەنوۆانىڭ ايتۋىنشا, سون­داي-اق, ەكونوميكالىق كۇش-قابىلەتى تومەن 63 سەلو نازارعا الىنعان. بۇل تىزىمدە اباي, اقتوعاي, قار­قا­رالى, شەت اۋداندارىنداعى يۋجنىي, توراڭ­عىلىق, ەگىندى­بۇلاق, اقجال, اقشاتاۋ, مويى­نتى كەنت­تەرى دە بار. زەرتتەۋلەر كورسەتكەنىندەي, ونداعى تۇرعىن­داردىڭ كوبى جۇمىسسىز, باسپاناسىز. ولاردى اۋدان ورتا­لىق­تارى مەن قالالارعا قونىس­تان­دىرىپ, ەڭ­بەككە قامتۋ اتالعان باعدارلامانىڭ باستى ماقساتى. بۇعان بايلانىستى قاراستىرىلعان ءىس-شارالار قانداي؟ سولاردىڭ ءبىرىن ورتاعا سالعاندا, ماسەلەن, قالالارعا قونىس اۋدارۋشى جۇمىسسىزداردى قايتا وقىتۋ ارقىلى جاڭا ماماندىقتار مەڭگەرتىلەدى. سول ءۇشىن ەڭبەككە ورنالاستىرۋ ورتالىقتارىنا ءتۇسىرىل­گەن وتىنىشتەر ەسكەرىلەدى. بۇگىندە قاراعاندىداعى قازىبەك بي جانە وكتيابر اۋداندارىندا وسىنداي 2 ءبولىم جۇمىس ىستەۋدە. 400-دەن استام ازاماتتىڭ وتىنىشتەرى قابىلدانىپ, جاس ايىرماشىلىقتارىنا, كاسىپتىك بەيىمدىلىكتەرىنە قاراي ءبىرازى 6 ايدان 1 جىلعا نەمەسە 3 ايدان 6 ايعا دەيىن وقىتىلۋدا. بىتىرگەننەن كەيىن ۇدەمەلى يندۋستريالىق-يننوۆا­تسيا­لىق دامۋ باعدارلا­ما­سى اياسىندا جاڭادان اشىلعان كاسىپورىنداردا جۇ­مىس ىستەۋگە جىبەرىلەدى. سونىمەن بىرگە باسپانالى بولۋ­لارىنا مۇمكىندىك جاسالادى. بۇل رەتتە پاتەردى جالعا بەرۋ قولدانىلادى. ال 15 جىلدان سوڭ ونى جەكەشەلەندىرۋگە قۇقىق بەرىلەدى. ەگەر قارجىلىق  جاعدايى جەتەتىن بولسا, 5 جىل ىشىندە پاتەر  ءبىرجولا ساتىپ الىنادى. ايتا كەتۋ كەرەك, 2020 جىلعا دەيىنگە ارنالعان ەڭ­بەك­پەن قامتۋ باعدارلاماسىنىڭ شاراپاتى مەملەكەتتىك قول­داۋعا تىلەۋقور باسقا دا جاندارعا تيەدى. سونىڭ ءنا­تي­جە­سىندە جۇمىسسىزدىق پەن كەدەيشىلىك دەڭگەيىن 6 پايىزعا تومەندەتۋ, الەۋمەتتىك احۋالى ءالجۋاز توپتا­عى­ل­اردى تۇر­عىن ۇيمەن قامتاماسىز ەتۋ ماسەلەسىن شەشۋ كوزدەلگەن. ەلىمىز ءوز ازاماتتارىنا جاقسىلىق جاساۋدان ايانباي وتىر. وسىناۋ يگىلىكتى شارالار سونىڭ تاعى ءبىر جارقىن كورىنىسى. كوڭىلدەرىنە قونعان, تۇرمىستىق جاعدايلارىن جاقسارتۋعا قولايلى قولداۋ تالايىن العا تارتارىنا قاراعاندىلىقتار ۇمىتتەرى ۇلكەن. ايقىن  نەسىپباي, قاراعاندى.