كەشە مەملەكەت باسشىسى نۇرسۇلتان نازارباەۆ ءوزىنىڭ دەمالىسى ۋاقىتىندا جۇمىس ساپارىمەن الماتى وبلىسىنىڭ ەڭبەكشىقازاق اۋدانىنداعى شارۋا قوجالىقتارىنىڭ ىرگەلى ىستەرىمەن تانىسىپ, اسى جايلاۋىنداعى مالشىلار جيىنىنا قاتىستى.
ەلباسى نۇرسۇلتان نازارباەۆتىڭ جەتىسۋ وڭىرىندەگى جۇمىس ساپارى ەڭبەكشىقازاق اۋدانى, ءبايتەرەك اۋىلىنداعى «كيم ا. گ.» كوكونىس وسىرەتىن جىلىجاي جۇمىسىمەن تانىسۋدان باستالدى.
ال الماتى وبلىسىنىڭ ءبۇگىنگى الەۋمەتتىك-ەكونوميكالىق دامۋىنا كوز جىبەرسەك, بيىلعى جارتىجىلدىقتا ونەركاسىپتە 190,6 ملرد. تەڭگەنىڭ, اۋىل شارۋاشىلىعىندا 69,8 ملرد. تەڭگەنىڭ ونىمدەرى ءوندىرىلىپ, ءونىم كولەمى ەداۋىر وسكەن. سونىمەن قاتار, جاڭادان 29 ونەركاسىپ نىساندارى ىسكە قوسىلىپ, جۇمىس جاساپ تۇرعان 6 ءوندىرىس كەڭەيتىلىپ, قوسىمشا 813 جۇمىس ورنى قۇرىلعان. ءوتكەن مەرزىمدە جالپى اۋماعى 407,5 مىڭ شارشى مەتر 2727 تۇرعىن ءۇي پايدالانۋعا بەرىلگەن. شاعىن ءجانە ورتا كاسىپكەرلىك سالاسىندا 265,1 مىڭ ادام ەڭبەك ەتسە, وسى مەرزىمدە تۇتىنۋشىعا 203,9 ملرد. تەڭگەنىڭ قىزمەتى كورسەتىلىپ, ساپالى ءونىم ءوندىرىلىپتى. مال باسى ءوز تولىنەن ءوسىرىلىپ, ءونىمدىلىگى دە ارتۋ ۇستىندە.
ەلباسىنىڭ تاپسىرماسىنا وراي قاڭتار-ماۋسىم ايلارىندا نەگىزگى كاپيتالعا تارتىلعان ينۆەستيتسيا كولەمى 147,2 ملرد. تەڭگەنى قۇراعان. جۇمىسسىزدىقتىڭ الدىن الۋ, جاڭا جۇمىس ورىندارىن اشۋ ماسەلەلەرى دە وڭتايلى شەشىلگەن. جاس ۇرپاققا باسەكەگە قابىلەتتى ءبىلىم بەرۋ, حالىقتىڭ دەنساۋلىعىن جاقسارتۋ, تاعى باسقا سالالارداعى جۇمىس ناتيجەسى دە قاناعاتتانارلىق.
وبلىستىڭ قارقىندى دامۋىنا ەڭبەكشىقازاق اۋدانىنىڭ قوسىپ وتىرعان ۇلەسى قوماقتى. سوڭعى جىلدارى اتالعان اۋدان ەكونوميكاسى قارقىندى دامىپ, حالىقتىڭ الەۋمەتتىك-تۇرمىستىق, مادەني دامۋى شەشىمىن تاپقانىن اتاپ وتكەن ورىندى. بيىلعى جىلدىڭ وتكەن مەرزىمىندە ونەركاسىپ سالاسىندا 7557,6 ملن. تەڭگەنىڭ ءونىمى وندىرىلسە, ەكونوميكانىڭ دامۋىنا بيىلعى التى ايداعى تارتىلعان ينۆەستيتسيا كولەمى ەداۋىر. ماسەلەن, وسى مەرزىمدە 21348,1 ملن. تەڭگە قارجى تارتىلىپ, ءسۇت ونىمدەرىن شىعاراتىن «كومپانيا فۋدماستەر», «اپك ادال» اكتسيونەرلىك قوعامدارى, اسەپتيكالىق ءسۇت ونىمدەرىن شىعاراتىن «كومپانيا «فۋدماستەر-اسەپتيك» سەرىكتەستىگى, ءجۇزىم شاراپتارى مەن سۋسىندارىن, شىرىن جانە مينەرالدى سۋلاردى, كوكونىس ءونىمدەرىنىڭ كونسەرۆىلەرىن شىعاراتىن «گولد پرودۋكت» اكتسيونەرلىك قوعامدارى تۇتىنۋشىعا ساپالى قىزمەتىن ۇسىنۋمەن قاتار ەكولوگيالىق جاعىنان تازا ءونىم شىعارۋدى جولعا قويعان.
قازىرگى كەزدە شاعىن كاسىپكەرلىك نىساندارىنىڭ سانى 15539 ءبىرلىكتى قۇراسا, وسى سالادا 45087 ادام جۇمىسپەن قامتىلعان. اۋداندا التى ايدا عانا 23 972,7 ملن. تەڭگە ينۆەستيتسيا تارتىلىپ, العا باسقاندىقتى بايقاۋ قيىن ەمەس. وسىنداي ىرگەلى ىستەرىمەن تانىلعان اۋدانداعى «كيم ا. گ.» شارۋا قوجالىعى 2007 جىلى قۇرىلسا, بۇگىندە قاناتىن كەڭگە جايعان. ساپار بارىسىندا ەلباسى نۇرسۇلتان نازارباەۆقا قوجالىق باسشىسى ولەگ گريگورەۆيچ كيم ءوندىرىستى جۇرگىزۋگە 12 ملن. تەڭگە جەكە قاراجاتىن جۇمساعانىن جانە القاپتاعى جۇمىس ىرعاعى جايلى ايتتى.
جالپى كولەمى 4 گەكتار جەرگە ورنالاسقان قوجالىق ەكى گەكتار جەرگە 19 جىلىجاي سالعان. مۇندا بۇرىشتىڭ بىرنەشە ءتۇرى مەن باكلاجان وسىرىلۋدە. جايقالعان ءونىمگە كوڭىل سۇيسىنگەندەي. قيار مەن قىزاناق جانە كوكونىس ءتۇرلەرى ەگىلگەن القاپتا تامشىلاتا سۋارۋ ءادىسى قولدانىلعان. كوكونىستەن مول ءونىم الۋداعى ۇتىمدى ۇيىمداستىرۋ شەشىمىن تاپقان. تۇتىنۋشىنى ەكولوگيالىق جاعىنان تازا ونىممەن قامتاماسىز ەتۋدە وتكەن جىلى ءبىر گەكتار كوكونىس القابىنان 100 توننادان استام ءونىم جيناپتى. ەلباسىنا قوجالىق جەتەكشىسى ءىس-تاجىريبەسى, قيار مەن قىزاناق, كوكونىس ءتۇرلەرىن ءوسىرۋ ارقىلى ازىق-ت ۇلىك قاۋىپسىزدىگىن قامتاماسىز ەتۋدەگى جوسپارلارى بىرتىندەپ جۇزەگە اسقانىن, ءالى دە اتقارىلاتىن جۇمىستار بار ەكەنىن باياندادى. نەگىزىنەن الماتى قالاسى تۇرعىندارىن كوكونىسپەن قامتۋدى العا قويعان شارۋا قوجالىعىندا 20-دان استام ادام ەڭبەك ەتۋدە. ايلىقتارى 45-50 مىڭ تەڭگە ارالىعىندا, باسقا دا الەۋمەتتىك ءماسەلەلەر شەشىمىن تاۋىپتى.
بۇدان كەيىنگى مەملەكەت باسشىسىنىڭ ساپارى شارۋاسى شالقىعان «ايدارباەۆ» شارۋا قوجالىعىنداعى ىرگەلى ىستەردى كورۋمەن جالعاستى. سايماساي جانە قىربالتاباي سەلولىق وكرۋگ اۋماعىنان جەر تەلىمىن الىپ, گەكتار بەرەكەلىلىگىنە جول اشقان ايدارباەۆ ەرىك سەرىك ۇلى باسقارعان ۇجىم مۇشەلەرى بيداي, ارپا, جۇگەرى, سويا, جوڭىشقا, قىزىلشانى اگروتەحنيكالىق شارالارعا ساي كۇتىپ-باپتاپ جاتقاندارىن ايتتى. ولار 70 گەكتارعا الما باعى, 6 گەكتارعا ءجۇزىم, 14 گەكتارعا ءتاتتى ءتۇبىر ەگىپ, جان-جاقتى كۇتىمگە العان. جانە 330 گەكتار جەردەگى قىزاناق پەن قيار تامشىلاتا سۋارىلىپ, قازىرگى كەزدە جينالعان ءونىم تۇتىنۋشىعا جونەلتىلۋدە. مۇندا دا 110 ادام ەڭبەك ەتىپ, ىرگەدەن تابىلعان جۇمىسقا قۇلشىنا كىرىسكەن.
شەت ەلدەن اكەلىنگەن المانىڭ 7, جەمىس-جيدەكتىڭ 35 ءتۇرى كۇتىپ, باپتالۋدا. ەرتە كوكتەمدە 230 ءتۇپ الما كوشەتتەرى, 3000 ءتۇپ المۇرت, 10 000 ءتۇپ قاراقاتپەن قاتار, 1,5 مىڭ ءتۇپ جەمىس كوشەتتەرىن ساتىپ, اۋىلداستارىنىڭ قاجەتىن شىعارىپتى. بۇل دا ولار ءۇشىن تابىس كوزى سانالادى. قوجالىق «قازاگروفينانس» اق-تان 270 ملن. تەڭگە نەسيە الىپ, تاۋارلى ءسۇت فەرماسىن قايتا جاراقتاندىرۋدى جولعا قويعان. جىل سايىن ءوندىرىس كولەمىن ارتتىرۋمەن بىرگە, ايدارباەۆتىقتار مال شارۋاشىلىعىن دامىتۋعا دەن قويعانى وسىنىڭ ءدالەلى. مۇندا 474 باس ءىرى قارا, 170 جىلقى, 300 باس قوي-ەشكى ءوز ءتولى ەسەبىنەن ءوسىرىلۋدە. تاۋارلى ءسۇت فەرماسىندا 20 ادام ەڭبەك ەتەدى. مال تۇقىمىن اسىلداندىرۋداعى جۇمىس تا جاقسى جالعاسقان.
قوجالىق جەمىس اعاشتارىنىڭ تالىمباعىن قۇرىپ, 50 گەكتار القاپقا المانىڭ 25 ءتۇرىن وسىرسە, قالعان القاپتاعى اعاشتى-بۇتالى وسىمدىكتەردىڭ تۇرلەرى كوبەيتىلۋدە. جانە 4 گەكتار تالىمباقتا گەرمانيادان اكەلىنگەن المانىڭ سيرەك تۇرلەرى باپتالىپ وسىرىلۋدە. بيىلعى جىل سوڭىنا قاراي 500 مىڭعا دەيىن جەمىس-جيدەك كوشەتىن وتىرعىزۋ جالعاسۋدا. وسىنداعى اتقارىلعان ىرگەلى ىستەردى كورىپ, جۇمىسشىلارمەن اڭگىمەلەسكەن نۇرسۇلتان نازارباەۆ ينتەنسيۆتى تەحنولوگيانى ءتيىمدى پايدالانعانداردىڭ ەڭبەگى جاناتىنىن, ءارى تابىسقا جول اشاتىنىن اتاپ ءوتتى.
قازاقستان كوكونىس پەن جەمىستى تاسىمالداۋشى ەلدەن, بۇل تاۋارلاردى ەكسپورتتاۋشى ەلگە اينالۋى كەرەك, دەپ اتاپ كورسەتتى نۇرسۇلتان نازارباەۆ كاسىپورىننىڭ جۇمىسشىلارىمەن كەزدەسۋ كەزىندە. بۇل ءۇشىن بارلىق جاعداي جاسالعان, ەڭ باستىسى, ءىستى دۇرىس ويلاستىرۋ كەرەك.
ءبىز كوكونىس پەن جەمىستى تاسىمالداۋشىدان ەكسپورتتاۋشى مەملەكەتكە اينالۋىمىز قاجەت, كەدەن وداعى ارقاسىندا شەكارا اشىق. وراسان ەكسپورتتىق مۇمكىندىكتەر پايدا بولۋدا. ەندى مۇندا كوكونىستەردى, جەمىس-جيدەكتەردى, جەمىس اعاشتارىن ءوسىرۋ مىندەتىن العا قويۋمەن بىرگە, اپورتتى قالپىنا كەلتىرۋ كەرەك. ول الماتى وبلىسىنىڭ برەندى بولادى. اپورت كوپ ەڭبەكتى قاجەت ەتەدى, 700-دەن 1000 مەترگە دەيىنگى بيىكتىكتە وسەدى, ەرەكشە كۇتىمدى, تازالىقتى قاجەتسىنەدى, الايدا, ونداي الما الەمدە جوق دەۋگە بولادى.
رەسپۋبليكانىڭ ءار وبلىسىندا كليماتتىق جانە اۋا-رايىنىڭ ەرەكشەلىكتەرىن ەسكەرە وتىرىپ, ءوڭىرلەردە ناقتى داقىلداردى ءوسىرۋ قاجەتتىگىنە كوڭىل ءبولۋ كەرەك. مۇنداي ساياسات اۋىل شارۋاشىلىعىندا ءوزىنىڭ تيىمدىلىگىن كورسەتتى, دەپ اتاپ ءوتتى پرەزيدەنت. الماتى وبلىسىن وسىعان باعدارلاۋ كەرەك, ال وڭتۇستىك قازاقستان جانە جامبىل وبلىستارىنا ءبىز سولتۇستىكتەن تاسىمالدايتىن استىقتى سۋارۋ ارقىلى ءوسىرۋدىڭ قاجەتى جوق, ماڭعىستاۋ وبلىسىندا استىق ءوسىرۋگە تىرىسۋدىڭ قاجەتى شامالى, ول جەردە بالىق ءوسىرۋ كەرەك جانە ول ءوز ناتيجەسىن بەرەدى, ال قالعانىن تاسىمالدايتىن بولادى, ياعني ءار وبلىس قايتا باعدارلانۋى ءتيىس, ءار وبلىس ءبارىن بىردەي قولعا الۋعا ۇمتىلماۋى كەرەك. استىق بىزدە سولتۇستىكتە جەتكىلىكتى, ال سولتۇستىك پەن باتىس وڭىرلەردە نە الما, نە مىناداي قىزاناقتار ءوسپەيتىنى بەلگىلى.
شارۋاگەرلەر بالىق شارۋاشىلىعىن وركەندەتۋگە دە دەن قويعان. بۇگىندە ول شەشىمىن تاۋىپتى. بالىقتىڭ بەكىرە جانە فورەل ءتۇرلەرىن ءوسىرۋ تسەحىنىڭ جالپى الاڭى 114 شارشى مەتر. ونىڭ ىشىندە 38 تەكشە مەتر سۋ سىياتىن باسسەين بار. مۇنداعى شاباقتار مەرزىمى جەتكەندە باعالى تاعام ونىمىنە اينالاتىنىن دا ايتا كەتكەن ورىندى. قازىرگى كەزدە 300 ادامدى جۇمىسپەن قامتىعان شارۋا قوجالىعىنىڭ الداعى جوسپارلارى دا جەتكىلىكتى. بالىق ءوسىرۋ تسەحتارى جىلىنا 30 تونناعا دەيىن ءونىم شىعارۋدى جوسپارلاسا, بۇگىنگى قارقىندى قيمىل وعان ناقتى دالەل بولا الادى. جالپى, جاڭاعا بەتبۇرىس, وزىق تەحنولوگيانى پايدالانۋداعى العا قويعان جوسپارلار سەرىكتەستىكتىڭ الداعى ەكونوميكالىق دامۋىنا جارقىن جول اشادى.
ەلباسى «ەسىك جەمىس-كونسەرۆى زاۋىتى» سەرىكتەستىگى ۇجىمىمەن دە ديدارلاستى. زاۋىت ديرەكتورى قانات جەلدىكباەۆتىڭ ماماندىعى اگرونوم. ول 2009 جىلى زاۋىت قۇرىلىسىن قولعا الىپتى. تارتىلعان ينۆەستيتسيا كولەمى 600 ملن. تەڭگە. زاۋىتتىڭ جالپى اۋماعى – 500 شارشى مەتر. كاسىپورىننىڭ نەگىزگى باعىتى – تومات وڭدەۋ مەن تومات سىقپاسىن ءوندىرۋ. جانە ءبىر قىزىعى, زاۋىت جىلىنا 70 تاۋلىك قانا جۇمىس ىستەيدى. وسى قىسقا مەرزىمدە 40 مىڭ توننا ءونىم وڭدەپ, ودان 4 مىڭ توننا دايىن ءونىم شىعارادى. سەرىكتەستىك بيىل ەگىستىك كولەمىن 500 گەكتارعا جەتكىزىپ, تامشىلاتا سۋارۋ ءادىسىن قولدانۋ ارقىلى جۇمىستارىن جۇيەلەگەن. قاجەتتى قۇرال-جابدىقتار يتاليادان اكەلىنسە, زاۋىت يندۋستريالىق-يننوۆاتسيالىق دامۋ باعدارلاماسى بويىنشا وتكەن جىلى پايدالانۋعا بەرىلىپتى. ەلباسى القاپتاعى قىزۋ جۇمىسقا جوعارى باعا بەردى.
مەملەكەت باسشىسى نۇرسۇلتان نازارباەۆ بۇدان سوڭ ەسىك قالاسىنا كەلدى. شاھارداعى اۋداندىق ورتالىق اۋرۋحانانىڭ الدىندا ىستىق ىقىلاسپەن قارسى العان اق حالاتتى دارىگەر قاۋىمىمەن كەزدەستى. اۋرۋحانانى ارالادى. ونداعى زاماناۋي قۇرال-جابدىقتاردى كوردى. ەمحانانىڭ باس ءدارىگەرى بولات بالاقويشيەۆ اۋداندىق ورتالىق اۋرۋحانا 2008 جىلى «100 مەكتەپ, 100 اۋرۋحانا» باعدارلاماسىمەن قۇرىلىسى باستالىپ, وتكەن جىلدىڭ جەلتوقسانىندا پايدالانۋعا بەرىلگەنىنەن حاباردار ەتتى. 250 توسەكتىك اۋرۋحانا مەن اۋىسىمىنا 500 ادامدى قابىلدايتىن ەمحانادا 700-گە جۋىق دارىگەر, مەيىربيكە, كىشى مەديتسينا قىزمەتكەرلەرى حالىققا ءمىنسىز قىزمەت كورسەتۋدە.
«ديپلوممەن – اۋىلعا» باعدارلاماسى بويىنشا تولە بي اۋىلدىق امبۋلاتورياسىندا تەراپەۆت-دارىگەر بولىپ جۇمىسىن جالعاستىرعان ايشا ماناپوۆانىڭ لەبىزى ەرەكشە اسەرلى بولدى.
قۇرمەتتى نۇرسۇلتان ءابىش ۇلى, مەن ءوزىمنىڭ تاۋەلسىز قازاقستاننىڭ ازاماتى ەكەندىگىمدى باقىت سانايمىن. الەمگە اتى تانىلعان پرەزيدەنتىمىز جاستاردىڭ جان-جاقتى ءبىلىم الۋىنا بارلىق جاعدايلاردى جاساپ وتىر. سول قامقورلىققا بولەنگەن مىڭداعان جاستاردىڭ قاتارىندا اۋدان جۇرتشىلىعىنىڭ دەنساۋلىعىن قىراعى كۇزەتىپ كەلەمىن. بيىل ەلىمىز ءۇشىن ەرەكشە جىل. بارشا قازاقستاندىقتار ءتاۋەلسىزدىكتىڭ 20 جىلدىعىن اتاپ وتەدى. وسى ەكى ارالىقتاعى جەتكەن جەتىستىگىمىز كوكىرەگىمە ماقتانىش سەزىمىن ۇيالاتادى. باقىتىمىزدى قولىمىزدا ۇستاپ, جارقىن بولاشاققا ۇمتىلۋىمىز قاجەت», – دەپ ول ەلباسىنا ارناعان ولەڭىن وقىپ, جاستار اتىنان العىسىن ايتتى. يگى تىلەك, ىستىق ىلتيپاتقا تولى لەبىزدەرىن جاس دارىگەر ديدار ايتجانوۆ, تاعى باسقالار دا ءبىلدىردى. اۋداندا جاس مامانداردى باسپانامەن قامتۋ جايى دا وڭ شەشىلگەن. بۇعان قوسىمشا تاياۋ ۋاقىتتا ۇجىمداعى 60 وتباسى قونىس تويىن تويلايتىن كورىنەدى.
نۇرسۇلتان نازارباەۆ اۋداندىق اۋرۋحانا دارىگەرلەرىنە جاڭا عاسىردا ادام ءومىرىن مەيلىنشە ۇزارتۋ, انا مەن بالا ولىمىنە جول بەرمەۋ قاجەتتىگىن العا قويدى. ويتكەنى, اتالعان سالاعا جىل ءوتكەن سايىن بيۋدجەتتەن قوماقتى قارجى بولىنۋدە. «100 مەكتەپ, 100 اۋرۋحانا» باعدارلاماسىمەن جاڭا نىساندار بوي كوتەرگەنىنە جانە 1 شىلدەدەن باستاپ مەديتسينا قىزمەتكەرلەرىنىڭ ايلىقتارى 30 پايىزعا وسكەنىنە توقتالدى. ەلباسى, سونداي-اق سوڭعى كەزدە كوپ كەزدەسەتىن جۇرەك-قان تامىرلارى مەن قاۋىپتى دەرتتەردىڭ الدىن الىپ, وعان جول بەرمەۋ قاجەتتىگىن دە ەسكە سالدى. اۋدان ورتالىعىندا ءدال وسىنداي مەديتسينانىڭ بارلىق جەتىستىگىمەن قامتىلعان عيمارات بولماعاندىعىن اتاپ, ءار ادام سالاماتتى ءومىر سالتىن ۇستانۋمەن قاتار, ساپالى قىزمەتتى پايدالانۋى قاجەتتىگىن ناقتىلادى.
ەلىمىزدە دەنساۋلىق ساقتاۋ سالاسىن دامىتۋ ءۇشىن جاسالىپ جاتقان ءىستىڭ ءبارى دە قازاقستاندىقتاردىڭ ءومىر ءسۇرۋ جاسىن ۇزارتۋ ءۇشىن قولعا الىنىپ وتىر. جاڭا تۋىلعان نارەستەلەر شەتىنەمەۋى جانە انالار ءولىمى ازايا ءتۇسۋى ءۇشىن اۋىر سوعاتىن نەگىزگى اۋرۋ تۇرلەرى, ياعني جۇرەك-قان تامىرلارى, ونكولوگيالىق, تۋبەركۋلەز اۋرۋلارى ازايىپ, ناقتى ناتيجە بولۋى ءۇشىن جۇمىستار جاسالىپ جاتىر. بۇل مەديتسيناعا, جالپى العاندا, سىزدەرگە قويىلاتىن تالاپ. وزگە ەلدەردەگى اۋدان ورتالىقتارىندا وسىنداي جابدىقتارمەن جابدىقتالعان اۋرۋحانا جوقتىڭ قاسى. قازىر الەمدە داعدارىستان كەيىن بارلىق دارىگەرلەردىڭ, مۇعالىمدەردىڭ ەڭبەكاقىلارى قىسقارتىلۋدا, بىردە-ءبىر نىسان سالىنىپ جاتقان جوق, ال ءبىز بۇعان, كەرىسىنشە, الەۋمەتتىك ساياساتقا زور كوڭىل ءبولىپ وتىرمىز, دەپ اتاپ ءوتتى مەملەكەت باسشىسى مەديتسينالىق ورتالىقتىڭ قىزمەتكەرلەرىمەن كەزدەسۋىندە.
پرەزيدەنت كەشە اۋدان ورتالىعىنان 80 شاقىرىم قاشىقتىقتاعى اسى جايلاۋىنداعى مالشىلار سلەتىنە قاتىستى. مۇندا مالشى قاۋىمى قىستان امان-ەسەن شىققانىن, ءورىسى مالعا تولعانىن اتاپ ءوتۋ ءۇشىن جينالعان. مەرەكەگە ەڭبەكشىقازاق اۋدانىمەن بىرگە تالعارلىق ارىپتەستەر دە قوسىلىپتى. جايلاۋ توسىندەگى تويعا قاتىسقاندار نۇرسۇلتان ءابىش ۇلىنىڭ ارنايى كەلۋىن شىن پەيىلمەن قابىلدادى.
بۇگىنگى كۇنى ەكى اۋداندا دا ءتۇلىك سانىنا شاققاندا اسىل تۇقىمدى مالدىڭ ۇلەس سالماعى ارتىپ, قولدا بار تۇقىمنىڭ گەندىك قورىن ساقتاۋدا ناتيجەلى جۇمىستار قولعا الىنعان. ەڭبەكشىقازاق اۋدانىندا 200-گە تارتا اسىل تۇقىمدى مال شارۋاشىلىعى بار بولسا, جىل سايىن مەملەكەتتەن قوماقتى ءمولشەردە سۋبسيديا تولەنىپ كەلەدى. اسى جايلاۋىنداعى ءدۇبىرلى تويدا پرەزيدەنت نۇرسۇلتان نازارباەۆ مال شارۋاشىلىعىن دامىتۋدىڭ بۇگىنى مەن كەلەشەگىنە, اتاكاسىپتىڭ ابىرويىن ارتتىرىپ, ءتورت ت ۇلىكتەن الىناتىن ءونىمدى مولايتۋ, تاعى باسقا ماسەلەلەردى جينالعاندار نازارىنا سالدى. جۇمىس ساپارىندا شارۋا قوجالىقتارىنىڭ وزىق تەحنولوگيانى پايدالانۋ ارقىلى ازىق-ت ۇلىك مولشىلىعىن جاساۋداعى قولعا العان يگىلىكتەرى قۇپتارلىق ەكەنىن اتاپ كورسەتتى. سونىمەن بىرگە, وڭىردە ەكونوميكانى ءارتاراپتاندىرۋ, ءباسەكەگە قابىلەتتىلىك پەن ينۆەستيتسيا تارتۋ, ءوڭىر دامۋىنىڭ نەگىزگى باعىتتارىنا اينالعانىن ناقتىلاپ, جاۋاپتى مىندەتتەردى جۇمىلا ورىنداۋ قاجەتتىگىن اتاپ ءوتتى.
حالقىمىزدىڭ ءار قۋانىشى ۇلتتىق ات سپورتى ويىندارىنسىز ءوتكەن بە! بۇل جولى دا اسى ءتورىندە ات جارىستىرىلىپ, جۇلدەگە ءبايگە تىككەن جۇرتشىلىق كوكپار تارتىپ, پالۋان كۇرەستىردى. قازاق ەستراداسىنىڭ جۇلدىزدارى دا اسەم ءان مەن كۇمبىرلەگەن كۇيدەن شاشۋ شاشتى.
كۇمىسجان بايجان,
الماتى وبلىسى.
سۋرەتتەردى تۇسىرگەندەر س.بوندارەنكو, ب.وتارباەۆ.