وڭتۇستىك كورەيادا تولاسسىز جاۋعان جاڭبىر سالدارى ادام قازاسىنا الىپ كەلۋدە. ەل استاناسى سەۋل مەن ونىڭ سولتۇستىگىندە ورىن العان لاي كوشكىنىنەن 17 ادام وپات بولىپ, تاعى ءۇش ادام ءىز-ءتۇزسىز جوعالىپ كەتكەن.
سەۋلدىڭ سولتۇستىك-شىعىسىنداعى 110 شاقىرىم جەردە قازا تاپقان 12 ادامنىڭ سەگىزى ستۋدەنتتەر ەكەنى انىقتالدى. ال بەس ادام ەل استاناسىندا جان تاپسىرعان. تولاسسىز جاۋعان جاۋىن ءالى توقتار ەمەس.
داعدارىس قاۋپى اسكەرگە دە جەتتى
پەنتاگون باسشىلارى وباما اكىمشىلىگى تاراپىنىڭ اسكەري شىعىنداردى 800 ميلليارد دوللارعا دەيىن قىسقارتۋدى جوسپارلاعان قادامىنا قارسى ەكەندىكتەرىن بىلدىرۋدە. اسكەريلەردىڭ ايتۋىنشا, بۇل اۋە كۇشتەرى مەن تەڭىز فلوتىندا بىرقاتار قىسقارتۋلار ءجۇرگىزۋگە الىپ كەلەدى.
جاياۋ اسكەرلەر شتابىنىڭ باسشىسى مارتين دەمپسي اسكەري بيۋدجەتتى قىسقارتۋ وتە كۇردەلى عانا ەمەس, سونىمەن قاتار قاۋىپتى دەگەندى ايتىپتى. اقش قارۋلى كۇشتەرىنىڭ گەنەرالدارى سەناتتاعى تىڭداۋلارعا قاتىسىپ, قورعانىسقا قاجەتتى قارجىنى سىعىمداۋعا وزدەرىنىڭ قارسىلىقتارىن بىلدىرگەن. ەگەر قارجى كوزى شەكتەلەتىن بولسا, وندا اسكەري كۇشتەردى جاۋىنگەرلىك دايىندىقتا ۇستاۋ ءۇشىن اسكەريلەردىڭ سانىن قىسقارتۋعا تۋرا كەلمەك.
كيپردىڭ رەيتينگى تومەندەدى
Moodys حالىقارالىق رەيتينگتىك اگەنتتىگى كيپردىڭ رەيتينگىن «ا2»-دەن «ۆاا1» دەڭگەيىنە دەيىن تومەندەتتى. مۇنداي «قاناعاتتانعىسىز» رەيتينگى ارى قاراي دا ءتومەندەۋى مۇمكىن دەگەندى بىلدىرەدى. اتالعان اگەنتتىك ءوزىنىڭ مۇنداي شەشىم شىعارۋىن ارالدىڭ ءالسىز ەكونوميكاسىمەن بايلانىستىرۋدا.
سونداي-اق Moodys ساراپشىلارى كيپرلىك ىشكى جالپى ءونىم ءوسىمى 2011 جىلى ءنول, ال 2012 جىلى ءبىر پايىزعا بارارىن بولجاپتى. گرەكياداعى جاعداي ىقپال ەتىپ وتىرعان ارالدىق مەملەكەتتىڭ قارجىلىق جۇيەسى تۇراقتى بولمايدى دەپ سانايدى ساراپشىلار. ونىڭ ۇستىنە اسكەري بازاداعى جارىلىستان ەلدىڭ 60 پايىزدىق جارىعىن بەرىپ تۇرعان ەلەكتر ستانتسياسى ىستەن شىققان بولاتىن.
قانداعار باسشىسى قازا تاپتى
اۋعانستاننىڭ ەكىنشى ءىرى قالاسى سانالاتىن قانداعاردا اكىمشىلىك باسشىسى گۋليام گەيدار حاميدي قاستاندىق سالدارىنان قازا تاپتى. الدىن الا تاراتىلعان مالىمەتكە قاراعاندا, جارىلعىش زات جانكەشتىنىڭ باسىنا ورالعان شالماسىندا جاسىرۋلى بولعان.
تەراكت اكىمدىك عيماراتىندا ءحاميديدىڭ جەرگىلىكتى تۇرعىندارمەن جەر داۋى بويىنشا كەزدەسۋى كەزىندە جاسالىپتى. قالا باسشىسى مۇنىڭ الدىندا زاڭسىز سالىنعان قۇرىلىستاردى سىرىپ تاستاۋعا بۇيرىق بەرگەن كورىنەدى. سونىڭ سالدارىنان ەكى بالا قايتىس بولىپتى. نەگىزىنەن اكىم مىنگەن كورتەج 2009 جىلى دا شابۋىلعا ۇشىراپ, ول ءوزى سول كەزدە ءتىرى قالعان ەكەن.
قالا قوعامدىق تارتىپسىزدىكتەن قورقادى
لۆوۆ قالاسىنىڭ ايماقتىق اكىمشىلىك سوتى وسى شاھاردى نەمىس باسقىنشىلارىنان ازات ەتكەن كۇندى, ياعني 27 شىلدەنى جاپپاي اتاپ وتۋگە تىيىم سالدى. مۇنداي اۋقىمدى شارالاردى وتكىزۋ تۋرالى ارىزدى «سوكول» ۇيىمى, كومپارتيا مەن ارداگەرلەر كەڭەسى تاپسىرىپتى.
الايدا قالالىق كەڭەس نەمىس باسقىنشىلارىنان ازات ەتۋ كۇنىن اتاپ وتۋگە تىيىم سالۋ ۇسىنىسىمەن سوتقا جۇگىنگەن. سوتتىڭ مۇنداي شەشىم شىعارۋىنا وسى قالادا 9 مامىر كۇنى ورىن العان تارتىپسىزدىكتەر تۇرتكى بولعان. ونىڭ ۇستىنە جەرگىلىكتى قۇقىق قورعاۋ باسقارماسى دا قوعامدىق قاۋىپسىزدىككە تونەتىن قاۋىپكە بايلانىستى شاراعا تىيىم سالۋ وتىنىشىمەن شىعىپتى.
نەمىستەر كەش وتاۋ تىگەتىندى قۇپ كورەدى
نەمىستەر سوڭعى جىلدارى كەش ءۇيلەنەدى نەمەسە تۇرمىسقا شىعاتىن كورىنەدى. گەرمانيانىڭ فەدەرالدىق ستاتيستيكا ۆەدومستۆوسىنىڭ ءمالىمەتتەرى وسىلاي دەيدى. مىسالى, 2009 جىلى ءاربىر ۇيلەنگەن ەردىڭ جاسى 33 بولسا, ال قىزداردىڭ اراسىندا بۇل كورسەتكىش 30 جاستى قۇراعان.
وسىدان قىرىق جىل بۇرىن, ياعني 1970 جىلى گفر-دا ەرلەردىڭ ۇيلەنۋ جاسى 26 بولسا, قىزدارىنىڭ تۇرمىس قۇرۋى 23 جاس بولعان كورىنەدى. ال گدر-دە جاستار ءتىپتى ءبىر-ەكى جاس ەرتە وتاۋ قۇرىپتى. قازىر جاعداي كەرىسىنشە قالىپتاسىپ وتىر. باتىستىق نەمىستەر شىعىستاعى قانداستارىنا قاراعاندا ءبىر-ەكى جىلعا بۇرىن وتاۋ تىگەدى ەكەن.
قىسقا قايىرىپ ايتقاندا:
*كولۋمبيا سوتى بۇرىنعى اۋىل شارۋاشىلىعى ءمينيسترى اندرەس فيليپە ارياستى تۇتقىنداۋعا شەشىم شىعارعان. ول ءوز قىزمەتىندە فەرمەرلىك شارۋاشىلىقتارعا بەرىلۋى ءتيىس سۋبسيديانى ءىرى جەر يەلەنۋشىلەرگە ۇلەستىرگەن دەگەن كۇدىكپەن ايىپتالىپ وتىر.
*حالىقارالىق ۆاليۋتا قورىنىڭ جاڭادان سايلانعان ءتورايىمى كريستين لاگارد پروبلەمالى ەلدەرگە سۋبسيديا ءبولىپ كەلە جاتقان ۇيىمعا قوسىمشا قارجىلىق رەسۋرستار كەرەك ەكەندىگىن مالىمدەدى. 2007 جىلى حۆق سوڭعى جىلدارى ونسىز دا قارجىلىق جۇيەسى تۇراقسىز سانالاتىن ەلدەرگە قارجى قۇيۋدى ەكى ەسەگە ارتتىرعان-دى.
*قىرعىزستان تۇرعىندارىنا ماناس پەن بەلگىلى جازۋشى شىڭعىس ايتماتوۆقا ەسكەرتكىش تۇرعىزۋ ءۇشىن ءوز قارجىلارىن قوسۋ ۇسىنىلىپ وتىر. مۇنداي ۇسىنىسپەن قىرعىز تاۋەلسىزدىگىنىڭ 20 جىلدىعىن اتاپ ءوتۋ جونىندەگى مەملەكەتتىك ديرەكتسياسى شىققانى بەلگىلى بولدى.
*مەكسيكانىڭ 33 جاۋىنگەرى كولىكپەن اقش-تىڭ تەحاس شتاتىن جالعاستىراتىن كوپىرمەن شەكارادان ءوتىپ كەتكەن. الدارىنان كۇتىپ العان شەكاراشىلار جاعدايمەن تانىسىپ, ولاردىڭ باعىتتان قاتەلەسكەنىنەن حاباردار بولعان سوڭ كەرى قايتارعان.
ينتەرنەت ماتەريالدارى نەگىزىندە ازىرلەندى.