مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى 85-ءشى تەاتر ماۋسىمى اياقتالار تۇستا جازۋشى مەدەۋ سارسەكەنىڭ «تەندەرگە ءتۇسكەن كەلىنشەك» دەيتىن دراماسىن ساحناعا شىعاردى.
ساحنالىق تۋىندىنىڭ نەگىزگى ايتار ويىنا كەلسەك, تاعدىردىڭ بۇرالاڭ جولدارىندا ادام باسىندا نەشە ءتۇرلى تاۋقىمەت بولا بەرمەك. وقىس قادامدار كەيدە ءبۇكىل وتباسىنىڭ كۇللى قۇندىلىعىنىڭ كۇل-پارشاسىن شىعارىپ, كۇردەلى ساتتەردە پەندەلەردىڭ ىشىنە بۇككەن پيعىلدارىن سىرتقا اتويلاتادى.
ساعيلا مەن تاۋباي دا ورتا جاستان اسىپ, ۇل ۇيلەندىرىپ, نەمەرە ءسۇيىپ, الداعى كۇندەردىڭ اماندىعىن تىلەپ وتىرعان جاندار ەدى. بەتىنە قاراپ وتىرعان جالعىز ۇل شولجاڭ كەلىنشەگىمەن ايالدامادا قاپەرسىز تۇرعان كىسىنى قاعىپ كەتەدى. بارلىق باقىتسىزدىقتىڭ باسى دا – وسى كەلەڭسىز كۇن.
بەيساۋات جۇرگەن ادامدى كولىگىمەن قاعىپ كەتكەن بالانى تەمىر توردان قۇتقارىپ قالۋدىڭ جالعىز جولى – قوماقتى پارا عانا. وسى ۋاقىتقا دەيىن قوڭىر تىرشىلىك كەشىپ كەلگەن وتباسى ءبىر ءتاۋلىكتە 100 مىڭ دوللار تابا الا ما؟
«تەندەرگە تۇسكەن كەلىنشەك» دەپ اتى ەلىكتىرىپ تۇرعان درامادا تەندەرگە تۇسەتىن كىم؟ تاۋبايدىڭ ءوز ايەلى مە, الدە تايراڭداعان ۇلدىڭ ۇيىندەگى كەلىن بە؟
ال بىرەۋدىڭ قوينىنداعى جارىن ساۋدالاپ جۇرگەن ادام كىم؟ بۇل جاسىرىن كەيىپكەر كورەرمەندەرىمەن كەزدەسپەيتىندىگىمەن دە تارتىمدى.
شاراسىز وتاعاسى – تاۋبايدى ەكى قۇرامدا تەاتردىڭ اكتەرلەرى باقتيار قوجا مەن بەكجان تۇرىس, ال «تەندەرگە تۇسكەن كەلىنشەك» ساعيلا ءرولىن داريا ءجۇسىپ, داناگۇل تەمىرسۇلتانوۆا, سونداي-اق ادۆوكات جورابەكتى اسىلبەك بورانباي مەن ازات سەيتمەتوۆتەر وينايدى.
ونەرسۇيەر قاۋىم بۇل كەشتە تالانتتى ونەر يەسى بەكجان تۇرىستىڭ تەرەڭ ويىنىنان كەيىپكەرىنىڭ ءومىر مازاعىنا تايتالاسا الماعان جان ازابىن كورسە, ساعيلانى سومدايتىن دانا تەمىرسۇلتانوۆا مەن ءداريا ءجۇسىپ كەيىپكەر بولمىسىن ءار قىرىنان اشا تۇسەدى.
وسى زاماندا قوينىندا جاتقان جارىن «تەندەرگە» ءتۇسىرىپ قوياتىن ازاماتتار بار ما دەگەن وي دا كولبەڭدەيدى. ال قويىلىمنىڭ اۆتورى, جازۋشى مەدەۋ سارسەكە بولسا:
– بۇل شىعارما 2009 جىلى تۋدى. باستاپقىدا بۇل پەسانى بىرقاتار وبلىستىق تەاترلار قويۋعا قىزىققانىمەن, ساحنالاۋعا اسىقپادى. مەن كاسىبي دراماتۋرگ ەمەسپىن. تەك 25 جىل بويى ىشىمە سىيماي, ۇيقىمدى بۇزعان نارسەنى جازدىم – دەسە, بەلگىلى ونەر سىنشىسى ءاليا بوپەجانوۆانىڭ پايىمى تومەندەگىدەي.
– قويىلىمدا بۇگىنگى زامانداعى قۇندىلىقتىڭ وزگەرۋى, ادامداردىڭ سونشالىقتى مەيىرىمسىزدىگى, ءتىپتى ادام تاعدىرىن پارا شەشەتىنىن, باي مەن كەدەي ءومىرىنىڭ ايىرماسى تۇپ-تۋرا, قاز-قالپىندا كورسەتىلگەن. ەڭ باستىسى, بۇل جەردە كوزگە ۇرمايتىن, بىراق ءتۇيسىگى مول جان سەزەتىن ءبىر يدەيا بار: ساحنا اشىلعاندا – اتكەنشەكتە بالا وتىردى, ەكى جاقتان اكە-شەشەسى تەربەتىپ تۇردى, جابىلعاندا دا – سول اتكەنشەك, بىراق وندا شاشى اعارعان, ءولى جانارلى ۇل وتىر, ەكى جاعىنان سۇپ-سۇر كيىنگەن بىرەۋلەر الديلەپ تۇر. مۇندا ايتىپ جەتكىزگىسىز تراگەديا جاتىر. قايىرىمسىز ۇرپاق! بالانى ءجونسىز, شەكتەن تىس الپەشتەۋ دەگەننىڭ ۇلكەن قاتەلىككە ۇرىندىراتىنىن, ناتيجەسىندە, بارىن اۋزىنا توسقان اكە-شەشەگە ۇلدىڭ قايىرىلا قاراماۋىنا اكەپ تىرەيتىنىن كورسەتىپ وتىر. بالا ءومىردىڭ ءتاتتىسىن عانا ەمەس, اششىسىن دا كورۋى شارت.
جاڭا زاماننىڭ احۋالىن سۋرەتتەۋگە ۇمتىلعان جازۋشىنىڭ جاڭا تۋىندىسىن قازاقستاننىڭ ەڭبەك سىڭىرگەن قايراتكەرى, رەجيسسەر ورازحان كەنەباەۆ ساحنالاپ وتىر. ەندى بۇل درامانى كورەرمەن كۇزدە, تەاتردىڭ 86-شى ماۋسىمى اشىلعاننان كەيىن تاماشالاي الادى.
ايناش ەسالي, الماتى.