تاحاۋي احتانوۆ اتىنداعى وبلىستىق دراما تەاترىندا وبلىس اكىمى جانىنداعى ايەلدەر ءىسى, وتباسى-دەموگرافيالىق ساياسات جونىندەگى كوميسسياسىنىڭ «سەزون» جۋرنالىمەن بىرلەسىپ ۇيىمداستىرعان «اقتوبە حانىمى – 2011» بايقاۋىنىڭ فينالى ءوتتى. سۇلۋلىق بايقاۋىنىڭ اقتىق سىنىنا ىرىكتەۋ تۋرىنان وتكەن 15 حانىم بالالارىمەن كەلىپ قاتىسىپ, ومىردەگى ۇستانىمدارىن ايتتى, بالالارى دا ءوز ونەرلەرىن كورسەتتى.
قاتىسۋشىلار قازاقتىڭ سالت-ءداستۇرى, ادەت-عۇرپى, مادەنيەتى مەن تاريحى جانە باسقا سۇراقتارعا قاتىستى جاۋاپ بەرىپ, تاپقىرلىعى مەن ءبىلىمىن تانىتتى.
عازيزا جۇبانوۆا اتىنداعى وبلىستىق فيلارمونيانىڭ ءانشىسى سۆەتلانا ايتباەۆا «اقتوبە حانىمى – 2011» بايقاۋىنىڭ جەڭىمپازى اتاندى. اناسىن كوتەرمەلەپ كەلگەن ۇلكەن ۇلى ديماش پەن قىزى راۋشان ءان ايتىپ, ءتورت جاسار ءابىلمانسۇرى «قازاقستان حانىمى» دەگەندى قازاق, ورىس, اعىلشىن تىلدەرىندە قاتەسىز جازىپ بەردى. بايقاۋدىڭ ءبىرىنشى ورىنىن وبلىس اكىمى اپپاراتىنىڭ باس مامانى دينارا نۇرمانوۆا يەلەندى. ەندى ولار «قازاقستان حانىمى – 2011» بايقاۋىنا قاتىسىپ, باقتارىن سىنايتىن بولادى.
ساتىبالدى ءساۋىرباي, اقتوبە وبلىسى.