ادىلەت مينيسترلىگىندە ادىلەت ورگاندارىنىڭ كەڭەيتىلگەن القا وتىرىسى ءوتتى. وعان بەينە-كونفەرەنتسيا بايلانىسى ارقىلى وبلىستىق ءادىلەت, قىلمىستىق-اتقارۋ ءجۇيەسى, سوت اكتىلەرىن ورىنداۋ دەپارتامەنتتەرىنىڭ باسشىلارى, جىلجىمايتىن ءمۇلىك جانە سوت ساراپتاما ورتالىقتارىنىڭ ديرەكتورلارى قاتىستى. وندا ادىلەت ورگاندارى جۇمىسىنداعى ناقتى وڭ ناتيجەلەر مەن كەلەلى ءماسەلەلەر ءسوز بولدى.
اسىرەسە, مەملەكەتتىك ورگانداردىڭ زاڭ شىعارۋ قىزمەتى ساپاسىن ودان ءارى كوتەرۋ, نورماشىعارماشىلىق سالاسىنداعى ادىلەت ورگاندارىنىڭ جانە زاڭناما ينستيتۋتىنىڭ ۇيلەستىرۋ ءرولىن كۇشەيتۋ قاجەتتىگى ايتىلدى.
بيزنەس ءۇشىن تىركەۋ راسىمدەرىن وڭايلاتۋ جانە تۇرعىندارعا كورسەتىلەتىن ەلەكتروندى قىزمەت تۇرلەرىن كەڭەيتۋ ماسەلەلەرى دە كەندە قالمادى.
مينيسترلىك اعىمداعى جىلى كوممەرتسيالىق ۇيىمداردى تىركەۋدىڭ حابارلاندىرۋ تارتىبىنە اۋىسۋدى قاراستىراتىن زاڭ جوباسىن جاساۋعا كىرىسەدى. حالىققا كورسەتىلەتىن مەملەكەتتىك قىزمەتتەر ۇدەرىسىن بارىنشا وڭايلاتۋدى جانە ەسكىرگەن نورمالاردان باس تارتۋ كوزدەلۋدە. اتاپ ايتقاندا, نوتاريالدى جانە ادۆوكاتتىق قىزمەتپەن اينالىسۋعا ليتسەنزيانى تەك ەلەكتروندى تۇردە بەرۋ جوسپارلاندى.
ازاماتتاردىڭ قۇقىقتارى مەن مۇددەلەرىن قامتاماسىز ەتۋ ماقساتىندا جەكە نوتاريۋستاردى ەسەپتىك تىركەۋ تۋرالى جاڭا ەرەجە مەن نوتاريالدىق ءىس-جۇرگىزۋ نۇسقاۋ بەكىتىلدى. اتالعان قۇجاتتارمەن نوتاريۋستار عيماراتتارى مەن جەكە نوتاريالدىق مۇراعاتتارىنا تالاپتار بەلگىلەنىپ, قۇجاتتاردى مۇراعاتقا وتكىزۋ ءتارتىبى ەسكەرىلدى. ادىلەت دەپارتامەنتتەرىنە كورسەتىلگەن اكتىلەردىڭ ءمۇلتىكسىز ورىندالۋىن قامتاماسىز ەتۋ تاپسىرىلدى.
القادا اۋماقتىق بولىمشەلەردىڭ جەكەلەگەن باسشىلارى سىنعا ىلىكتى. جامبىل, شىعىس قازاقستان, قوستاناي, اقمولا جانە اقتوبە وبلىستارىنىڭ ادىلەت, قىلمىستىق-اتقارۋ جۇيەسى جانە سوت اكتىلەرىن ورىنداۋ دەپارتامەنتتەرىنىڭ جۇمىسىنداعى ولقىلىقتار كورسەتىلدى.
سىبايلاس جەمقورلىقتىڭ الدىن الۋ جانە كۇرەسۋ بويىنشا جۇمىستى قاتايتۋ تاپسىرىلدى.
القا قورىتىندىسى بويىنشا ادىلەت ءمينيسترى ر. تۇسىپبەكوۆ قۇرىلىمدىق بولىمشەلەر مەن جەرگىلىكتى جەرلەردەگى دەپارتامەنت باسشىلارىنا ءتيىستى تاپسىرمالار بەردى, دەپ حابارلادى ادىلەت مينيسترلىگىنىڭ ءباسپاسوز قىزمەتى.
«ەگەمەن-اقپارات».