توتاليتارلىق رەجىمنەن كوپ جاپا شەككەن حالىقتىڭ ءبىرى – پولياكتار. تايىنشا اۋدانى تۇرعىندارىنىڭ ۇشتەن ءبىرىن قۇرايتىن پولياك ەتنوسىنىڭ اتا-اجەلەرى 1936 جىلى ساياسي قۋعىن-سۇرگىنگە ۇشىراپ, باتىس ۋكراينادان كۇشپەن قونىس اۋدارىلعان. ۇشارىن جەل, قونارىن ساي عانا بىلگەن ولار الەم كارتاسىنىڭ التىدان ءبىر بولىگىن الىپ جاتقان كەڭەس وداعىن كوكتەي ءوتىپ, قىزىلجار ءوڭىرىن تۇراقتاعان. كەڭ قولتىق, جومارت كوڭىل قازاقتاردان پانا تاپقان. سودان بەرى اعايىن-تۋىستاي بىتە قايناسىپ, قازاقستاننىڭ وركەندەۋىنە ءوز ۇلەستەرىن قوسىپ كەلەدى.
جۋىردا وسى اۋدانداعى زەلەنىي گاي اۋىلىنىڭ قۇرىلعانىنا 75 جىل تولىپ, ءبىر شاڭىراق استىندا ءتۇتىن تۇتەتىپ وتىرعان ءتۇرلى ۇلت وكىلدەرى بىرلىك, تاتۋلىق كۇنىن اتاپ ءوتتى. سالتاناتتى شاراعا پولشانىڭ قازاقستانداعى توتەنشە جانە وكىلەتتى ەلشىسى ياتسەك كليۋچكوۆسكي مەن وبلىس اكىمى سەرىك ءبىلالوۆ قاتىستى.
قۇرمەتتى مەيمان اۋداننىڭ تىنىس-ءتىرشىلىگىمەن جان-جاقتى تانىسىپ, جايقالا ءوسىپ تۇرعان ەگىن القاپتارىن ارالادى. تايىنشا ستانساسىندا سالىنىپ جاتقان 280 ورىندى بالاباقشا جانە 60 پاتەرلى تۇرعىن ءۇي قۇرىلىسىندا بولدى.
زەلەنىي گاي تۇرعىندارىنىڭ 70 پايىزعا جۋىعى – پولياكتار. مۇندا نەگىزىنەن ساياسي قۋعىن-سۇرگىن كەزىندە ەرىكسىز جەر اۋدارىلعان جانداردىڭ بىرنەشە ۇرپاعى ءوسىپ-ونگەن. ولاردىڭ بىرقاتارىنا ماقتاۋ قاعازدار, العىس حاتتار تاپسىرىلدى. وسى ەلدى مەكەندى ءبىر كەزدەرى سيگيزمۋند باگينسكي دەگەن ازامات كوپ جىلدار بويى ابىرويمەن باسقارىپ, ۇلكەن قۇرمەتكە بولەنگەن ەكەن. ءبىر كوشەگە ونىڭ ەسىمى بەرىلىپ, مۇراجاي ءۇيى ەسىگىن ايقارا اشتى.
جۇرتشىلىق ەل تاۋەلسىزدىگى مەرەكەسى قۇرمەتىنە وراي «20 يگى ءىس» شاراسى اياسىندا اتقارىلىپ جاتقان باسقا دا جان جادىراتار شارالاردىڭ كۋاسى بولدى.
ءومىر ەسقالي,
سولتۇستىك قازاقستان وبلىسى,
تايىنشا اۋدانى.