كەشە اقوردادا مەملەكەتتىك حاتشى قانات ساۋداباەۆ قازاقستان رەسپۋبليكاسى پرەزيدەنتىنىڭ باق سالاسىنداعى سىيلىقتارى مەن گرانتتارىن تاپسىردى.
ماراپاتتاۋ ءراسىمىن جۋرناليستەردى ءتول مەرەكەلەرىمەن قۇتتىقتاۋدان باستاعان مەملەكەتتىك حاتشى ودان ءارى ەلباسى نۇرسۇلتان نازارباەۆتىڭ باسشىلىعىمەن قازاقستان تاۋەلسىزدىك العان 20 جىلدا عاسىرلارعا بەرگىسىز ءۇلكەن جەڭىستەرگە جەتكەنىن اتاپ ءوتتى. تاتۋلىق پەن تۇراقتىلىقتىڭ تال بەسىگىنە اينالىپ, ءتورتكۇل دۇنيە تۇگەل مويىنداعان ەلىمىز بەدەلدى حالىقارالىق ۇيىمدارعا توراعالىق ەتۋگە دە قول جەتكىزدى. ەسىلدىڭ بويىنا اسەم استانا سالىپ, ونى عالامدىق اۋقىمداعى شەشىمدەر قابىلداناتىن ماڭىزدى ورتالىققا اينالدىردىق. بۇرىنعى كەڭەس ەلدەرىنىڭ ىشىندە العاشقى بولىپ ەۋروپالىق ۇيىمنىڭ القالى سامميتىن ءوتكىزدىك. استانا مەن الماتى قالالارىندا قىسقى ازيادا ويىندارىن قابىلداپ, جارقىن جەڭىسكە جەتتىك. كۇنى كەشە شانحاي ىنتىماقتاستىق ۇيىمىنىڭ مەرەيتويلى باسقوسۋىن جوعارى دەڭگەيدە وتكىزە الدىق. بۇگىن يكۇ-عا توراعا بولىپ سايلاندىق. وسىنىڭ بارىندە ەلباسىنىڭ ساليقالى ساياساتىمەن قاتار بۇكىل وتانداستارىمىزدىڭ, سونىڭ ءىشىندە سىزدەردىڭ دە ەڭبەكتەرىڭىز زور, دەدى ول ماراپاتتاۋ ءراسىمىنە جينالعان جۋرناليستەرگە. ودان ءارى قانات بەكمىرزا ۇلى جۋرناليستەرگە ەلباسىنىڭ سىيلىقتارى مەن گرانتتارىن جىل سايىن تاپسىرۋ يگى داستۇرگە اينالعانىن, بيىل ول 15-ءشى رەت بەرىلىپ وتىرعانىن اتاپ ءوتتى. الايدا بيىلعى جيىنىمىزدىڭ ءجونى جىلداعىدان بولەك, جولى ەرەكشە. ءويتكەنى, بۇگىنگى تاپسىرىلاتىن سىيلىقتار مەن گرانتتار ءتاۋەلسىزدىگىمىزدىڭ 20 جىلدىعى قارساڭىندا تابىس ەتىلگەلى وتىر. سىزدەر ەل سەنىمىن ابىرويمەن اقتاپ, مەملەكەتىمىزدىڭ ءتاۋەلسىزدىگىن نىعايتۋىنا, ءوسىپ-وركەندەۋىنە ولشەۋسىز ۇلەس قوسىپ كەلەسىزدەر, دەدى ول. ودان ءارى ق.ساۋداباەۆ بۇگىنگى كۇنى قازاقستاندا باق ەركىندىگى مەن بوستاندىعىنا تولىق قول جەتكەنى تۋرالى ايتتى. وعان گازەت-جۋرنالدارمەن قاتار تەلە-راديو ارنالاردىڭ جىل ساناپ كوبەيىپ كەلە جاتقانى ايعاق بولا الادى. سونىڭ ىشىندە بيىل مەملەكەتتىك تىلدە حابار تاراتاتىن «مادەنيەت» ارناسى, ال كەلەسى جىلى «ءبىلىم» ارناسى ىسكە قوسىلاتىن بولادى. بۇل سالانىڭ دامۋىن مەملەكەت باسشىسىنىڭ ءوزى ەرەكشە قاداعالاپ وتىر. ءبۇگىنگى شارا دا سونىڭ ايقىن ايعاعى دەپ بىلگەن ءجون, دەدى مەملەكەتتىك حاتشى.
ودان ءارى پرەزيدەنتتىڭ ماراپاتتاۋ تۋرالى وكىمى وقىلىپ, قانات ساۋداباەۆ سىيلىقتار مەن گرانتتاردى اتالعان ادامدارعا تاپسىردى. پرەزيدەنتتىڭ بيىلعى سىيلىقتارى «پانوراما» گازەتى باس رەداكتورىنىڭ ورىنباسارى اسقار اۋكەنوۆكە, قازاقستان جۋرناليستيكاسى اكادەمياسىنىڭ پرەزيدەنتى ساعىمباي قوزىباەۆقا, «ارگۋمەنتى ي فاكتى كازاحستان» گازەتىنىڭ باس رەداكتورى سەرگەي كۋزوۆنيكوۆقا, رەسەيلىك ساياساتتانۋشى جانە پۋبليتسيست يۋري سولوزوبوۆقا جانە «شالقار» راديوسى باس رەداكتورىنىڭ ورىنباسارى بولاتبەك ءتولەپبەرگەنگە تاپسىرىلدى.
ەلباسى گرانتتارى ۇلتتىق باسپاسوز كلۋبىنىڭ ۆيتسە-پرەزيدەنتى مارك ايسبەرگكە, «ەگەمەن قازاقستان» گازەتىنىڭ شولۋشىلارى ءاليسۇلتان قۇلانباي مەن جاقسىباي سامراتقا, «حابار» اگەنتتىگىنىڭ الماتى وبلىسى بويىنشا مەنشىكتى ءتىلشىسى تىلەۋقابىل مىڭجاسارعا, «كازاحستانسكايا پراۆدا» گازەتى ساياسات ءبولىمىنىڭ رەداكتورى ماكسيم شيمانسكيگە, «ارقا اجارى» گازەتىنىڭ شىعارماشىلىق ۇجىمىنا, «زاڭ گازەتى» مەن «يۋريديچەسكايا گازەتا» گازەتتەرىنىڭ شىعارماشىلىق ۇجىمدارىنا تابىس ەتىلدى.
ماراپاتتاۋ راسىمىندە پرەزيدەنتتىڭ العىسى دا جاريالانىپ, ارناۋلى قۇرمەت حاتتارى تابىس ەتىلدى. ونى «الماتى اقشامى» گازەتىنىڭ دەنساۋلىق جانە الەۋمەتتىك سالا ءبولىمىنىڭ مەڭگەرۋشىسى نۇرجامال بايساقالوۆا, «الاش ايناسى» گازەتىنىڭ باس رەداكتورى سەرىكبەك جانبولات, «ايقىن» گازەتىنىڭ ءتىلشىسى گۇلبارشىن ساباەۆا, «دوستىق-درۋجبا» جۋرنالىنىڭ باس رەداكتورى زەينەكۇل سەيسەنوۆا, «ەگەمەن قازاقستان» گازەتىنىڭ شىعىس قازاقستان وبلىسىنداعى سەمەي ءوڭىرى بويىنشا ءتىلشىسى داۋلەتقازى سەيسەن ۇلى, «قازاقستان» تەلەارناسىنداعى «قازاقتىڭ 100 ءانى» تەلەۆيزيالىق باعدارلاماسىنىڭ جانە «كاراۆان» گازەتىنىڭ شىعارماشىلىق ۇجىمدارى الدى.
ماراپاتتاۋ ءراسىمى اياقتالعان سوڭ مەملەكەتتىك حاتشى ق.ساۋداباەۆ ناگرادتالعانداردىڭ ءبارىن قۇتتىقتاپ, ولارمەن ەسكەرتكىش سۋرەتكە ءتۇستى.
ءبىز دە بيىل پرەزيدەنت ماراپاتىن العان ءۇش بىردەي ارىپتەسىمىز ءا.قۇلانباي, ج.سامرات جانە د.سەيسەن ۇلىن قۇتتىقتاپ, ولارعا شىعارماشىلىق جاڭا تابىستار تىلەيمىز.
بەرىك سادىر.