الماتى قالاسىنداعى دوستىق ۇيىندە جاس الەۋمەتتانۋشىلاردىڭ ءبىرىنشى فورۋمى ءوز جۇمىسىن اياقتادى. قازاقستان رەسپۋبليكاسى الەۋمەتتانۋشىلارىنىڭ 4-ءشى كونگرەسى اياسىندا وتكىزىلگەن بۇل شاراعا جاس الەۋمەتتانۋشى عالىمدار, دوكتورانتتار, ماگيسترانتتار مەن جوعارى وقۋ ورىندارىنىڭ ستۋدەنتتەرى قاتىستى.
ءال-فارابي اتىنداعى قازۇۋ-دىڭ پرورەكتورى, الەۋمەتتانۋ عىلىمدارىنىڭ دوكتورى, پروفەسسور شولپان جامانبالانوۆانىڭ ايتۋىنشا, اتالعان فورۋم قازاقستانداعى الەۋمەتتانۋدىڭ ستراتەگيالىق تۇرعىدان ودان ءارى دامۋى ءۇشىن ماڭىزدى. «فورۋم جاس, جىگەرلى عالىمداردىڭ باسىن بىرىكتىرەتىن, كاسىبي الەۋمەتتانۋشىلار مەن جاس عالىمدار اراسىندا پىكىر الماسۋعا لايىقتالعان, ءداستۇرلى الاڭ بولادى دەپ ويلايمىن», دەدى ول جۋرناليستەرگە بەرگەن شاعىن سۇحباتىندا.
فورۋم اياسىندا كىشىگىرىم جانە ءىرى قالالارداعى جاستاردىڭ سۋبمادەنيەتى, قازاقستاندا جاڭا ساياسي مادەنيەتتى قالىپتاستىرۋ جولدارى, ورتا مەكتەپتەردە ءدىني ءبىلىم بەرۋ, ەلدەگى ايەلدەردىڭ كاسىپكەرلىگى, زاماناۋي الەۋمەتتىك ءبىلىم بەرۋ, ت.ب تاقىرىپتار تالقىلاندى.
قازاقستان رەسپۋبليكاسىنىڭ تۇڭعىش پرەزيدەنتى قورى جانىنداعى جاس عالىمدار كەڭەسىنىڭ ءتورايىمى, الەۋمەتتانۋ عىلىمدارىنىڭ دوكتورى گۇلميرا ءابدىرايىموۆا جاستار ارقاشان كۇش-جىگەرىمەن, شىعارماشىلىق بەلسەندىلىگىمەن ەرەكشەلەنەتىندىگىن, الەم وزگەرىپ جاتقان تۇستا ەلدىڭ عىلىمي الەۋەتىن كوتەرۋ جۇگى ەڭ الدىمەن وسى جاس عالىمداردىڭ موينىنا ارتىلاتىندىعىن تىلگە تيەك ەتتى.
– عىلىم ارقاشان دا ماڭىزدى. قازىرگى مودەرنيزاتسيا كەزەڭىندە ول تابىسقا جەتۋدىڭ ماڭىزدى ءبىر بولىگىنە اينالادى. جاڭا يدەيالار, مۇمكىندىكتەر مەن مازمۇندىلىق – بۇل قازىرگى جاس عالىمدارعا قويىلار تالاپ. بۇگىنگى كەزدەسۋ وتاندىق عىلىمعا ۇلەس قوسىپ ءجۇرگەن جاستاردىڭ الەۋەتىن ارتتىرۋعا سەرپىن بەرەدى دەپ ويلايمىن. ءبىز سىزدەردەن تەك عىلىمي زەرتتەۋلەردىڭ قورىتىندىلارىن عانا ەمەس, قازاقستاندىق قوعامنىڭ ەكونوميكالىق جانە الەۋمەتتىك ماسەلەلەرىنە قاتىستى دا ەرەكشە ۇسىنىستاردى كۇتەمىز, – دەدى گ.ءابدىرايىموۆا جاس الەۋمەتتانۋشى ماماندار الدىندا سويلەگەن سوزىندە.
شارا بارىسىندا جاس الەۋمەتتانۋشىلاردىڭ ەڭبەكتەرى قورىتىندىلانىپ قانا قويماي, ءتۇرلى سۇراق-جاۋاپ الماسۋلار مەن پىكىرتالاستار جۇرگىزىلىپ, تاجىريبە ءبولىسۋ, ۇسىنىس جاساۋ سەكىلدى جاس مامانداردىڭ قابىلەت-قارىمدارى دا كورىنىس تاپتى. سونداي-اق فورۋم سوڭىندا رەزوليۋتسيا قابىلدانىپ, جاس الەۋمەتتانۋشىلار قاۋىمداستىعىنىڭ جەتەكشىسى سايلاندى.
ءبىلىم جانە عىلىم, مادەنيەت مينيسترلىكتەرىنىڭ جانە الماتى قالاسى اكىمدىگىنىڭ قولداۋىمەن ءوتىپ وتىرعان جاس الەۋمەتتانۋشىلاردىڭ ءبىرىنشى فورۋمىن قازاقستان الەۋمەتتانۋشىلار قاۋىمداستىعى ۇيىمداستىردى.
قانات ەسكەندىر, الماتى.