كەشە قورشاعان ورتانى قورعاۋ مينيسترلىگىندە ۆەدومستۆو باسشىسى نۇرعالي ءاشىمنىڭ توراعالىق ەتۋىمەن جانە ەلىمىز باس پروكۋرورىنىڭ ورىنباسارى اندرەي كراۆچەنكونىڭ قاتىسۋىمەن «تابيعات پايدالانۋشىلارمەن ەكولوگيالىق زاڭنامانىڭ ساقتالۋى تۋرالى» ماسەلەسىن تالقىلاعان مينيسترلىكتىڭ كەڭەيتىلگەن القا وتىرىسى بولىپ ءوتتى. وعان مەملەكەتتىك ورىنداردىڭ جاۋاپتى قىزمەتكەرلەرى مەن ۇكىمەتتىك ەمەس ۇيىمداردىڭ وكىلدەرى قاتىستى.
ەكولوگيالىق رەتتەۋ جانە باقىلاۋ كوميتەتىنىڭ توراعاسى ساعىنبەك مۇتاشەۆ ءوز بايانداماسىندا قۇقىق بۇزۋشىلىقتاردىڭ تومەندەۋى تابيعات پايدالانۋشىلاردىڭ جاۋاپكەرشىلىك دەڭگەيىن ارتتىرۋعا باعىتتالعان مينيسترلىكتىڭ تابيعات قورعاۋ ساياساتىنىڭ ىسكە اسىرىلۋىنىڭ ءناتيجەسى بولىپ تابىلاتىندىعىن جەتكىزدى. سونداي-اق, ول بۇل تۇستا زاڭ بۇزۋشىلىقتاردىڭ الدىن الۋعا جانە وندىرىستىك باقىلاۋدى كۇشەيتۋگە باعىتتالعان باقىلاۋ ينسپەكتسيالىق قىزمەتتى رەفورمالاۋ دا ۇلكەن ماڭىزعا يە ەكەندىگىن نازاردان تىس قالدىرمادى.
باس پروكۋروردىڭ ورىنباسارى اندرەي كراۆچەنكو تابيعات قورعاۋ زاڭناماسىنىڭ بۇزىلۋىن ازايتۋعا مۇمكىندىك بەرەتىن پروكۋراتۋرا ورگاندارىنىڭ ۇيىمداستىرىلۋىمەن جۇرگىزىلگەن تەكسەرۋدىڭ ماڭىزدىلىعىن اتاپ ءوتتى. القا وتىرىسىندا شتاتتان تىس جاعدايلار ناتيجەسىندە تەحنيكالىق جابدىقتاۋ جۇمىسىندا الاۋلارداعى ىلەسپە گازداردى جاعۋ ەسەبىنەن زياندى زاتتار شىعارۋعا تۇراقتى ءتۇردە جول بەرەتىن كاسىپورىنداردىڭ جۇمىستارى دا ايتىلدى. ولاردىڭ قاتارىندا «تەڭىزشەۆرويل» جشس, «نورت كاسپيان وپەرەيتينگ كومپاني ب.ۆ.» سىندى كومپانيالار بار.
«قازاقمىس كورپوراتسياسى» جشس, «ارسەلور ميتالل تەمىرتاۋ» اق جانە «قازتسينك» جشس سياقتى ءىرى مەتاللۋرگيالىق كومبيناتتارىندا شاڭ جانە گاز تازارتقىش جابدىقتاردى پايدالانۋ ەرەجەسىنىڭ بۇزىلۋى, ونىڭ ءىشىندە شاڭ جانە گاز تازارتقىش قۇبىرلارىنىڭ تەسىلۋلەرى مەن بۇزىلۋلارى ورىن العان. وتكەن جىلى عانا ەلىمىز بويىنشا ەكولوگيالىق زاڭنامانى بۇزعانى ءۇشىن جالپى سوماسى 5,8 ملرد. تەڭگەگە 8203 ايىپپۇل سالىنىپ,ونىڭ 5,02 ملرد. تەڭگەگە 7142 ايىپپ ۇلى وندىرىلگەن.
باسقوسۋدى قورىتىندىلاي كەلە مينيستر نۇرعالي ءاشىم تابيعات پايدالانۋشىلار ەكولوگيالىق زاڭناما تالاپتارىن ساقتاۋعا ىشكى باقىلاۋلاردى كۇشەيتۋلەرى مەن تابيعات پايدالانۋعا رۇقسات قۇجاتتارىن الۋ كەزىندە ازىرلەنەتىن تابيعات قورعاۋ ءىس-شارالارىن تولىق كولەمدە ىسكە اسىرۋلارى كەرەكتىگىن جەتكىزدى. سونىمەن بىرگە وندىرىستىك نىسانداردا شتاتتان تىس جاعدايلاردى بولدىرماۋعا باعىتتالعان شارالار كەشەنىن ازىرلەۋلەرى ءتيىس ەكەندىگىنە ەرەكشە توقتالدى.
جيىن سوڭىندا ۆەدومستۆو باسشىسى باق وكىلدەرىن كەلە جاتقان كاسىبي مەرەكەلەرىمەن قۇتتىقتاپ, قورشاعان ورتانى قورعاۋ سالاسىن كورسەتۋگە ۇلەس قوسۋدا بەلسەندىلىك تانىتىپ جۇرگەن جۋرناليستەرگە ارنايى العىس حاتتار مەن سىي-سياپاتتار جاسادى. سونداي-اق, ءبىرقاتار سالا قىزمەتكەرلەرىنە «ەكولوگيا ءىسىنىڭ ۇزدىگى» اتاعىن تابىس ەتتى.
ءابدىراحمان قىدىربەك.