اقش پرەزيدەنتى باراك وباما قازان قالاسىندا بولاتىن كەزدەسۋ الدىندا ازەربايجان پرەزيدەنتى ي.اليەۆ جانە ارمەنيا پرەزيدەنتى س.سارگسيانمەن تەلەفون ارقىلى سويلەسىپ, ولاردى تاۋلى قاراباق پروبلەماسىنا بايلانىستى ءوزارا كيكىلجىڭدى بەيبىت جولمەن رەتتەۋگە شاقىردى.
قازان قالاسىندا ەكى ەلدىڭ باسشىلارى رەسەي فەدەراتسياسىنىڭ پرەزيدەنتى د.مەدۆەدەۆتىڭ قاتىسۋىمەن كەزدەسۋ وتكىزەدى. ەقىۇ-نىڭ تاۋلى قاراباق پروبلەماسىن رەتتەۋگە بايلانىستى قۇرىلعان مينسك توبىنا مۇشە – اقش, رەسەي جانە فرانتسيا ەلدەرىنىڭ باسشىلارى بۇل كەزدەسۋدەن ۇلكەن ءۇمىت كۇتۋدە. ولار وسى كەزدەسۋدە كيكىلجىڭگە قاتىسۋشى ەلدەردىڭ باسشىلارى پروبلەمانى رەتتەۋدىڭ نەگىزگى قاعيداتتارى تۋرالى قۇجاتقا قول قويار دەگەن ۇمىتتە.
قىتاي ينفلياتسيانى قۇرىقتاي باستادى
سوڭعى كەزدە قىتايداعى ينفلياتسيا قۇرىقتاۋعا كونبەي بارا جاتىر, دەگەن حابار شىعا باستاعان ەدى. وسىعان بايلانىستى قحر پرەمەر-ءمينيسترى ۆەن تسزياباو ءبىرىنشى كەزەكتەگى قاجەتتى تاۋارلار باعاسىنىڭ ءوسىمىن توقتاتۋعا قول جەتكىزىلدى دەپ جاريالادى.
«ءبىزدىڭ قولعا العان ارەكەتىمىز ءوزىنىڭ جەمىسىن بەرە باستادى. جىلدىڭ اياعىنا دەيىن ينفلياتسيا قۇرىقتالاتىن بولادى, دەدى ول. بۇدان بۇرىن قىتايدا ينفلياتسيا دەڭگەيى سوڭعى 34 ايدا بولماعان كولەمگە جەتكەنىن, سونىڭ ىشىندە ازىق-ت ۇلىك تاۋارلارىنىڭ باعاسى 11,7 پايىزعا قىمباتتاعانى ايتىلعان ەدى.
كاددافيدى قۋدالاۋدىڭ جاڭا ءتۇرى
ليۆيانىڭ بۇرىنعى سىرتقى ىستەر ءمينيسترى, بۇۇ-داعى تۇراقتى وكىلى مۇحاممەد شالگام مۋاممار كاددافيدى كوپ بولسا ەكى-ءۇش اپتادان كەيىن ەلدەن قاشىپ شىعاتىن شىعار دەپ مالىمدەگەن. بۇرىنعى مينيستر ونىڭ بەلورۋسسيادان ساياسي باسپانا سۇراۋى مۇمكىن ەكەنىن دە ايتقان.
وپپوزيتسيا جاعىنا شىققان ادام نە دەمەيدى دەسەك تە, تريپوليگە جاسالىپ وتىرعان سوڭعى كەزدەگى قىسىمدارعا قاراعاندا, بۇل ءسوزدىڭ جانى بار سياقتى. قازىر وندا وپپوزيتسيالىق كۇشتەر جاسىرىن ارەكەتتەر جاساۋعا كوشىپتى. ال اقش سەناتى ب.وباما اكىمشىلىگىنە ليۆياداعى سوعىس ارەكەتتەرىن ءبىر جىلعا دەيىن سوزۋعا كەلىسىمىن بەردى.
بەس مىڭ جىل بۇرىنعى قازىنا
جۋىردا ەگيپەت پەن جاپونيا ارحەولوگتارى حەوپس پيراميداسىنىڭ تۇبىندەگى 4,5 مىڭ جىل بويى ساقتالعان ساركوفاگتى اشۋ ءۇشىن العاشقى پليتاسىن الدى. ءۇش بۇرىشتى ەكى ساركوفاگ اكتەن جاسالعان وسىنداي 40 پليتامەن جابىلعان ەكەن.
ولار العاش رەت 1955 جىلى تابىلعان. سول كەزدە زەرتتەۋشىلەر ونىڭ بىرەۋىن اشىپ, ىشىنەن ليۆان سامىرسىنىنان جاسالعان لاديانى تاپقان ەكەن. ونىڭ 1224 بولشەگىن قۇراستىرۋعا 10 جىل ۋاقىت كەتكەن. ەكىنشى ساركوفاگتا دا لاديا جاتقانى رادار ارقىلى انىقتالعان. الىنعان العاشقى پليتادان كەيىن-اق ونىڭ شەتى كورىنىپ جاتقان. العاشقى لاديانىڭ بيىكتىگى – 43, ەنى – 6 مەتر بولعان, مىناۋ دا سودان كەم ەمەس كورىنەدى.
تۇركيادا تاعى دا ورىس تۋريستەرى زارداپ شەكتى
تۇركيادا تاعى ءبىر اۆتوبۋس اپاتى بولىپ, 24 ادام زارداپ شەكتى. انتاليا كۋرورتتى پروۆينتسياسىندا بولعان بۇل اپات تا ورىس تۋريستەرىمەن بايلانىستى بولىپ وتىر. باسقا اۆتوبۋسقا سوعىلىسقان ميكرواۆتوبۋستىڭ جولاۋشىلارى رەسەيلىك تۋريستەر بولعان كورىنەدى.
زارداپ شەككەندەردىڭ ءبارى جاقىن ماڭداعى اۋرۋحانالارعا جەتكىزىلگەن. رەسەي فەدەراتسياسىنىڭ انتالياداعى باس كونسۋلدىعى زارداپ شەككەندەردىڭ جايىن انىقتاپ, كومەكتەر جاساپ جانە ولاردىڭ ەلىندەگى تۋىستارىمەن بايلانىسۋ جۇمىستارىن جۇرگىزىپ جاتىر.
اقش قارۋىن يرانعا ساتقاندار
اقش فرانتسيانىڭ اەrotechnic كومپانياسىن, ونىڭ پرەزيدەنتى مەن كوممەرتسيالىق ديرەكتورىن يرانعا امەريكالىق قارۋ-جاراقتى ساتقانى ءۇشىن ايىپتاپ وتىر. بۇل كاسىپورىن اقش-تىڭ اسكەري تىكۇشاقتارى مەن يسترەبيتەلدەرىنە ارنالعان جاراقتاردى ساتىپ الىپ, ونى زاڭسىز جولمەن يرانعا ءوتكىزگەن دەپ ايىپتالۋدا.
بۇل ءىس بويىنشا اقش, فرانتسيا, بىرىككەن اراب ءامىرلىكتەرى جانە يراندا ورنالاسقان بارلىعى 5 كاسىپورىن ايىپتالىپ وتىر. اقش-تىڭ دجوردجيا شتاتىنىڭ سوتى وسى كاسىپورىنداردىڭ باسشى قىزمەتتەرىندەگى 7 ادام بىرلەسىپ, اقش-تىڭ مۇددەسىنە قارسى قىلمىس جاساعان دەپ ايىپتاۋدا. بىراق ولاردىڭ ەكەۋى قازىر اقش اۋماعىنان تىس جەردە جۇرگەن كورىنەدى.
قىسقا قايىرىپ ايتقاندا:
ۋكراينانىڭ بۇرىنعى پرەمەر-ءمينيسترى يۋ.تيموشەنكونى كيەۆتىڭ پەچورسكي اۋداندىق سوتى رەسەيمەن اراداعى گاز كەلىسىمىنە بايلانىستى جاۋاپقا شاقىردى. سوتقا كەلگەن تيموشەنكونى جاقتاستارى دا, قارسىلاستارى دا قارسى الىپ, ەكى توپتىڭ اراسىندا كيكىلجىڭ بولعان.
ۆەنەسۋەلادا سوتتالعاندار ءبىر تۇرمەنى باسىپ الىپ, پوليتسيا شابۋىل جاساسا دا, توتەپ بەرىپ وتىر. كەشە عانا ولار پوليتسيا شابۋىلىنان قازا بولعان ءتورت سوتتالۋشىنىڭ ءمايىتىن دالاعا شىعارىپ, پوليتسيانىڭ قولىنا بەردى. ال وزدەرى ءالى بەرىلەر ەمەس.
بەلورۋسسيادا پرەزيدەنت ا.لۋكاشەنكونىڭ ار-نامىسىنا ءتىل تيگىزگەن ا.پوچوبۋت دەگەن جۋرناليستكە سوت پروتسەسى ءجۇرىپ جاتىر. كەشە پروكۋرور ونى ءۇش جىلعا باس بوستاندىعىنان ايىرۋدى سۇرادى. ا.پوچوبۋت بەلارۋس ازاماتى بولعانىمەن, پولشا گازەتىنىڭ قىزمەتكەرى بولىپ ىستەيدى ەكەن.
اقش-تىڭ الياسكا شتاتىنان 102 شاقىرىم جەردە ماگنيتۋداسى 7,4 بالل بولاتىن جەر سىلكىنىسى بولدى. ونىڭ ەپيتسەنترى جەر قويناۋىنىڭ 40 شاقىرىمىندا ەكەنى انىقتالعان. اقش-تىڭ گەولوگيالىق قىزمەتتەرى تسۋنامي بولۋ قاۋپى بار ەكەنىن جوققا شىعارمايدى.
ينتەرنەت ماتەريالدارى نەگىزىندە ازىرلەندى.