كەشە, بۇقارالىق اقپارات قۇرالدارى قىزمەتكەرلەرىنىڭ كاسىبي مەرەكەسى – ءباسپاسوز, تەلەديدار جانە راديو كۇنى قارساڭىندا «نۇر وتان» حالىقتىق-دەموكراتيالىق پارتياسىنىڭ جۋرناليستەر اراسىندا جاريالانعان «نۇر سۇڭقار» رەسپۋبليكالىق بايقاۋىنىڭ قورىتىندىلارى جاريالاندى.
جەڭىمپازداردى ماراپاتتاۋ سالتاناتى استانانىڭ كونگرەسس-حولل سارايىندا ءوتتى. داستۇرگە اينالا باستاعان بۇل شاراعا قازاقستاننىڭ بارلىق ايماقتارىنىڭ جۋرناليستەرى, پارلامەنت دەپۋتاتتارى, قازاقستان جۋرناليستەر وداعى مەن باس رەداكتورلار كلۋبى وكىلدەرى قاتىستى.
جەڭىمپازدار «نۇر وتان» پارتياسىنىڭ, دەپۋتاتتار مەن دەپۋتاتتىق فراكتسيالار قىزمەتى جايلى جاريالانعان ۇزدىك ساراپتامالىق ماتەريالدار, سونىمەن قاتار, پارتيانىڭ ايماقتارداعى قىزمەتىن ۇزدىك جاريالاعاندار, پارتيانىڭ باستامالارىنا ايرىقشا كوزقاراس بىلدىرگەندەر, ۇزدىك فوتو جانە بەينە ماتەريالدار اراسىنان تاڭدالىپ, انىقتالدى.
بيىلعى «نۇر سۇڭقار» بايقاۋىنىڭ باستى ەرەكشەلىگى: ونىڭ قازاقستان رەسپۋبليكاسى تاۋەلسىزدىگىنىڭ 20 جىلدىق مەرەيتويىنا ورايلاستىرىلعانى بولدى. مەرەيتوي جۋرناليستەر ءۇشىن وتە قىزىقتى تاقىرىپقا اينالدى.
200-دەن استام رەسپۋبليكالىق جانە ايماقتىق باق وكىلدەرى بايقاۋعا ءوز جۇمىستارىن ۇسىنعان بولاتىن.
سونىمەن قاتار, سايىسكەرلەردىڭ جۇمىستارىندا «نۇر وتان» پارتياسى قىزمەتىنىڭ ءتۇرلى قىرلارى كورىنىس تاپتى: پارتيانىڭ بارلىق ماڭىزدى مەملەكەتتىك باعدارلامالار مەن جوسپارلاردى باقىلاۋ جۇمىسىن كۇشەيتۋى, سىبايلاس جەمقورلىقپەن كۇرەس, قازاقستاندىقتاردىڭ الەۋمەتتىك ماسەلەلەرىن شەشۋى, پارتيالىق باقىلاۋ بەكەتتەرىنىڭ, قوعامدىق قابىلداۋلاردىڭ, باستاۋىش پارتيا ۇيىمدارىنىڭ جۇمىسى جانە نۇروتاندىقتاردىڭ باستى نازارىنداعى تاعى باسقا كوپتەگەن ماسەلەلەر.
بايقاۋ جەڭىمپازدارىن قۇتتىقتاي كەلە, «نۇر وتان» پارتياسى توراعاسىنىڭ ءبىرىنشى ورىنباسارى نۇرلان نىعماتۋلين: «بيىلعى «نۇر سۇڭقار» بايقاۋى ەلىمىزدىڭ باستى مەرەكەسى – قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالىپ وتىر. تاۋەلسىزدىك – بارشا قازاقستاندىقتار ءۇشىن ماڭىزى زور تاريحي مەيرام. 20 جىلدا ءبىزدىڭ ەلىمىز الەمدىك جوعارى بەدەلى بار قۋاتتى مەملەكەتكە اينالدى. بۇل – ەلباسىمىز, «نۇر وتان» پارتياسىنىڭ توراعاسى نۇرسۇلتان نازارباەۆتىڭ ۇلكەن ەڭبەگىنىڭ, حالقىمىزدىڭ ءال-اۋقاتىن ارتتىرۋعا, ەلىمىزدى دامىتۋعا باعىتتالعان ساياساتىنىڭ ناتيجەسى ەكەنى ءسوزسىز. وسىنىڭ بارلىعى قازاقستان جۋرناليستيكاسىنىڭ دامۋىنا دا ۇلكەن مۇمكىندىك بەردى», – دەپ اتاپ ءوتتى.
ون سەگىز نوميناتسيا بويىنشا جەڭىمپازدار اتانعان قالامگەرلەرگە بەلگىلى قوعام قايراتكەرلەرى, ونەر ادامدارى «نۇر سۇڭقار» بايقاۋىنىڭ جەڭىمپازىنا ارنالعان بەلگى مەن باعالى سىيلىقتار تابىس ەتتى. «ءبىزدىڭ دەپۋتات» نوميناتسياسى بويىنشا ارىپتەسىمىز جاقسىباي سامرات پەن «كازاحستانسكايا پراۆدا» گازەتىنىڭ ءتىلشىسى ولگا كازانتسەۆا جەڭىمپاز دەپ تانىلىپ, بايگە الدى. باسقا نوميناتسيالار بويىنشا «حابار» اگەنتتىگىنىڭ ءتىلشىسى تىلەۋقابىل مىڭجاسار, «اشىق ستۋديا» باعدارلاماسىنىڭ جۇرگىزۋشىسى نۇرلان ەرىمبەتوۆ, Zona.kz جانە Minber.kz ينتەرنەت-گازەتىنىڭ تىلشىلەرى جۇمابيكە جۇنىسوۆا مەن ەسەنگۇل كاپقىزى, «ليتەر» گازەتىنىڭ ءتىلشىسى ۆلاديمير كاتكوۆ, «حابار» اگەنتتىگىنىڭ پاۆلودار وبلىسىنداعى ءتىلشىسى سالاۋات يگىلىكوۆ, «حابار» اگەنتتىگىنىڭ استانالىق ءبولىمىنىڭ ءتىلشىسى ناتاليا يليۋحينا, «ايقىن» گازەتىنىڭ ءتىلشىسى ايحان ءشارىپ, «ۆرەميا» گازەتىنەن گەننادي بەنديتسكي, تەلەجۇرگىزۋشى دينا تولەپبەرگەنوۆا, «يندۋستريالنايا كاراگاندا» باسىلىمىنىڭ ءتىلشىسى وكسانا مياگكيح, «اقتاۋ اقپارات» گازەتىنىڭ ءتىلشىسى كامشات ءابدىرايىم, «ستۆ» ارناسى باس رەداكتورىنىڭ ورىنباسارى ۆيتالي پوپوۆ, «قازاقستان» ۇلتتىق ارناسىنىڭ ءتىلشىسى ايبەك قوبداباي, پرەزيدەنت ءباسپاسوز قىزمەتىنىڭ وپەراتورى باقتىباي شاحانوۆ, «نۇر-مەديا» جشس-ءنىڭ ءفوتوتىلشىسى سوۆەتبەك ماعزۇموۆ الدى. بارلىق بايقاۋ جەڭىمپازدارى «نۇر سۇڭقار» ءمۇسىنى, ارنايى ديپلوم جانە اقشالاي سىيلىققا يە بولدى.
وتكەن جىلداعىداي, بيىلعى بايقاۋدا دا ارنايى جۇلدە تاپسىرىلدى. بۇل ءسات سالتاناتتى ءراسىمنىڭ شارىقتاۋ شەگىنە اينالدى. نۇرلان نىعماتۋلين وسى سىيلىق بيىل قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالعانىن جاريالادى. ونىڭ يەگەرى بەلگىلى جۋرناليست, «حابار» اگەنتتىگىنىڭ ءتىلشىسى نۇرلان وقا ۇلى اتاندى. ول ارنايى ءمۇسىنشە مەن ديپلومعا قوسا, پاتەر كىلتىن يەلەندى.
ءاليسۇلتان قۇلانباي.
سۋرەتتى تۇسىرگەن ورىنباي بالمۇرات.