وبلىس ورتالىعىندا بولىپ وتكەن بۇل كورمە «مinTech», «KazInterPower» دەپ اتالاتىن تاۋ-كەن, مەتاللۋرگيالىق جانە كومىر ءوندىرىسى تەحنولوگياسىنىڭ قۇرال-جابدىقتارىنىڭ, سونىمەن قاتار ەنەرگەتيكا مەن ەلەكتر جۇيەلەرى تەحنيكالارىنىڭ كورسەتىلىمدەرىنە ارنالدى.
يندۋستريالىق-يننوۆاتسيالىق باعدارلاما ارقىلى وڭىردە بۇل كۇندەرى جالپى قۇنى 3 تريلليون 155 ملرد.تەڭگە تۇراتىن 142 جوبا جۇزەگە اسىرىلۋدا. بۇل باعدارلامانىڭ ماقساتى – ءوندىرىستى وڭىردە تاعى دا جاڭا ءوندىرىس ورىندارىن سالۋمەن عانا شەكتەلمەي, قۇرال-جابدىقتارى توزىپ, ەسكىرە باستاعان بۇرىننان كەلە جاتقان ءىرى كاسىپورىنداردى, ەلەكتر ستانسالارىن زامانعا ساي قۇرال-جابدىقتارمەن قامتاماسىز ەتىپ, مودەرنيزاتسيالاۋ, ياعني, جاڭارتۋ, جاڭعىرتۋ جۇمىستارىن جۇرگىزۋ بولىپ وتىر. سوندىقتان ءوندىرىستى ءوڭىر ءۇشىن بۇل كورمەنىڭ ماڭىزى زور. كورمەدە اۆستريا, اۆستراليا, بەلارۋس, گەرمانيا, سلوۆاكيا, اقش, ۋكراينا, فينليانديا, رەسەي, شۆەتسيا مەن شۆەيتساريا ەلدەرىنەن كەلگەن كاسىپورىندار شىعارعان قۇرال-جابدىقتار كورسەتىلدى. سولاردىڭ ءبىرى تەحنولوگيالىق جەلى ارقىلى ءتۇرلى اناليتيكالىق زەرتتەۋلەر جاساي الاتىن قول شامادانداعى شاعىن زەرتحانا جەر استى شاحتالارىندا, جازىق دالادا, تاۋلى جەرلەردەگى ەكسپەديتسيا جۇمىستارىندا وزىڭىزبەن بىرگە الىپ جۇرۋگە اسا قولايلى ەكەن.
–جالپى, ءبىز ءوز قالامىزدىڭ كەن ءوندىرۋ, مەتاللۋرگيا, ەنەرگەتيكا سياقتى ماڭىزدى سالالار بويىنشا ماماندانعان حالىقارالىق كورمە وتەتىن قالالاردىڭ بىرىنە اينالعانىنا قۋانىشتىمىز. كومىر, فەرروقورىتپا, ەلەكتروەنەرگيا مەن مۇناي, گلينوزەم مەن ءاليۋمينيدىڭ كوپ مولشەرلى پايىزدارى وسى ءبىزدىڭ وڭىردە وندىرىلەدى, – دەپ اتاپ كورسەتكەن وبلىس اكىمى باقىتجان ساعىنتاەۆ. مۇنداي كورمەلەردىڭ وبلىس ەكونوميكاسىن دامىتۋداعى ماڭىزىنا توقتالدى.
كورمە سورەلەرىندە ماشينا جاساۋ, كومىر ءوندىرۋ سالاسىنىڭ جانە شيكىزاتتى ءوندىرۋ تەحنولوگيالارىنىڭ بىرقاتار قۇرال-جابدىقتارى ورىن العان. سونداي-اق, كورمەدە ەنەرگەتيكالىق ماشينا جاساۋ, جىلۋ جانە گازبەن جابدىقتاۋ جۇيەلەرى, تەحنولوگيالىق پروتسەستەردى باسقارۋدىڭ اۆتوماتتاندىرىلعان جۇيەلەرى بار.
كورمەنىڭ العاشقى كۇنىندە ەلىمىزدە شىعارىلعان «Volvo FMX» اتتى جۇك تيەۋشى جول تاڭدامايتىن, ۇزاق جولدارعا شىدامدى, ماشينەسى كورسەتىلىپ, تۇساۋكەسەر ءراسىمى جاسالدى. حالىقارالىق كورمە ەكى كۇنگە سوزىلدى. ارىپتەستەر ءوندىرىستى وركەندەتۋدىڭ جاڭا تەحنولوگيالىق جەتىستىكتەرىنە ساي بىرگە جۇمىس جاساۋعا ارنالعان سەمينارعا قاتىسىپ, وي-پىكىرلەرىن ءبىلدىردى. بۇدان سوڭ, كورمەگە قاتىسۋشىلار ەكىباستۇزدىڭ «بوگاتىر» كومىر رازرەزى مەن گرەس-2 ستانساسىن ارالاپ كوردى.
فاريدا بىقاي.
پاۆلودار وبلىسى.