جاقىندا فۋتبولدان چەمپيوندار ليگاسى مەن ەۋروپا ليگاسىنىڭ بيىلعى ماۋسىمىنىڭ جەرەبەسى تارتىلدى.
چەمپيوندار ليگاسىنىڭ ەكىنشى كەزەڭىنەن باستاپ جارىسقا قاتىساتىن بىلتىرعى ەل چەمپيونى قوستانايدىڭ «توبىل» كومانداسىنىڭ جولى سلوۆاكيانىڭ «سلوۆان» كلۋبىمەن ءتۇيىستى. وسى كەزگە دەيىن ءوزارا كەزدەسپەگەن كوماندالار ەندى 12 نەمەسە 13 شىلدە كۇندەرى اۋەلى براتيسلاۆادا, ودان كەيىن 19 نەمەسە 20 شىلدە كۇندەرى قوستانايدا قارىمتا كەزدەسۋ وتكىزەتىن بولادى.
قوستانايلىق كوماندانىڭ قارسىلاسى 1919 جىلى قۇرىلعان. 1939-1944 جىلدارى سلوۆاكيانىڭ 4 رەت, 1945-1992 جىلدار ارالىعىندا چەحوسلوۆاكيانىڭ 8 رەت چەمپيونى اتانعان. 1962-1982 جىلدار ارالىعىندا 5 رەت ەل كۋبوگىن جەڭىپ العان. سودان كەيىن چەحوسلوۆاكيا ەكىگە ءبولىنىپ, سلوۆاكيا تاۋەلسىزدىگىنىڭ العاشقى جىلدارى «سلوۆان» 3 رەت كۋبوكتى جەڭىپ السا, 1994 – 1996 جىلدارى سۋپەر كۋبوكتى باسىنا كوتەرگەن. 1993 جىلدان بەرى سلوۆاكيانىڭ 5 رەت چەمپيونى بولعان. قازىر كوماندا ءىىFHS رەيتينگىندە 191-ءشى ورىندا تۇر.
«سلوۆان» ويىندارىن 30 مىڭنان استام ادام سىياتىن «تەگەلنە پولە» ستاديونىندا وتكىزەدى. وسى كۇندەرى ستاديون كۇردەلى جوندەۋدەن ءوتىپ جاتقاندىقتان, كوماندا قارسىلاستارىن 13 مىڭ كورەرمەنگە ارنالعان «پاسيەنكي» ستاديونىندا قابىلداپ ءجۇر.
«توبىلدىڭ» قازىرگى ويىندارىنا قاراپ, «سلوۆان» وعان وڭاي شاعىلاتىن جاڭعاق بولمايتىنى ءسوزسىز. سلوۆاكيا كلۋبىن جەڭىپ, چەمپيوندار ليگاسىنىڭ كەلەسى كەزەڭىنە وتسە, قوستانايلىق كوماندا ءۇشىن جامان بولماس ەدى. «سلوۆان» وتكەن جىلى ىرىكتەۋ ءتۋرنيرىنىڭ ءۇشىنشى كەزەڭىنە شىققان.
ال ەۋروپا ليگاسىنىڭ ەكىنشى ىرىكتەۋ تۋرنيرىنەن باستاپ جارىسقا قاتىساتىن بىلتىرعى كۇمىس ءجۇلدەگەر «اقتوبەنىڭ» قارسىلاسى ۆەنگريانىڭ «كەچكەمەت» كلۋبى بولدى. بۇل كوماندا دا وتكەن عاسىردىڭ باسىندا قۇرىلعان. دەگەنمەن, كلۋبتىڭ جاسى بيىل 100-گە كەلسە دە, ۇزاق جىلدار ول ءۇشىنشى جانە ەكىنشى ديۆيزيوندا ويناعان. 2008 جىلى عانا جوعارى ديۆيزيوندا ويناۋعا مۇمكىندىك الدى. كوماندا بيىل ءوز تاريحىنداعى ۇلكەن جەتىستىككە جەتتى. ەل كۋبوگىن جەڭىپ الدى. ودان بۇرىن 2007-2008 جىلدارى ەكىنشى ديۆيزيوننىڭ جەڭىمپازى بولسا, 1945-1995 جىلدار ارالىعىندا ءتورت رەت ءۇشىنشى ديۆيزيوننىڭ باس جۇلدەسىن يەلەنگەن. «اقتوبە» مەن «كيچكەمەت» كوماندالارىنىڭ ويىندارى 14 جانە 21 شىلدە كۇندەرى وتەدى.
قاراعاندىنىڭ «شاحتەرى» سلوۆەنيانىڭ «كوپەر» كومانداسىمەن كەزدەسەتىن بولىپ وتىر. بۇل كوماندا بىلتىرعى ەل چەمپيوناتىنىڭ قولا جۇلدەگەرى اتانعان. ال 2010 جىلى ول سلوۆەنيا چەمپيوناتىن جەڭىپ, وسى كەزگە دەيىن ەل چەمپيونى اتانعان 5 كوماندانىڭ قاتارىنا كىرگەن.
كوماندا 1955 جىلى قۇرىلعان. «شاحتەر» مەن «كوپەردىڭ» العاشقى ويىنى سلوۆەنيادا 30 ماۋسىم كۇنى وتسە, قارىمتا كەزدەسۋ 7 شىلدە كۇنى وتەدى.
كەلەسى ءبىزدىڭ ءبىر كوماندامىزدىڭ قارسىلاسى – پولشانىڭ «ياگەللونيا» كلۋبى. بۇل كوماندا «ەرتىستى» ءوز الاڭىندا 30 ماۋسىمدا قابىلداسا, 7 شىلدە كۇنى پاۆلودارعا «قوناققا» كەلەدى. «ياگەللونيا» بيىلعى پولشا چەمپيوناتىندا ءتورتىنشى ورىندى يەلەندى.
داستان كەنجالين.