قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ VIII كەڭەيتىلگەن وتىرىسىنا قاتىسۋشىلاردىڭ ەل جاستارىنا ۇندەۋى
قۇرمەتتى دوستار, جاس قازاقستاندىقتار!
بيىلعى جىلى قازاقستان ءوز تاۋەلسىزدىگىنىڭ 20 جىلدىعىن اتاپ وتۋدە. بۇل داتا ەلىمىزدىڭ جاڭا تاريحىنداعى ءمانى ەرەكشە, ماڭىزى زور وقيعا بولىپ تابىلادى. تاۋەلسىزدىك جىلدارىندا تۇڭعىش پرەزيدەنت – ەلباسىمىز ن.ا.نازارباەۆتىڭ تاريحي ەڭبەگى مەن ايقىن كوشباسشىلىعىنىڭ ارقاسىندا ەلىمىز ەكونوميكالىق جاعىنان قۋاتتى, دەموكراتيالىق جولمەن قارقىنداپ دامىعان مەملەكەتكە, الەمدىك قوعامداستىقتىڭ بەدەلدى دە قۇرمەتتى ارىپتەسىنە اينالدى. ەۋرازيا جۇرەگىندە بوي كوتەرگەن جاڭا ەلوردامىز – استانا قالاسى ەلىمىزدىڭ جاسامپازدىق كەلبەتىن ايشىقتاپ, بۇگىندە تاۋەلسىزدىگىمىزدىڭ جارقىن سيمۆولى بولىپ وتىر. قازىرگى قازاقستان – حالقىنىڭ ءومىر ءسۇرۋ دەڭگەيى جوعارى ستاندارتتارعا ساي, كەمەل كەلەشەككە ۇمتىلعان جاس مەملەكەت. بىزدەر, كەڭەس وتىرىسىنا قاتىسۋشىلار, تاۋەلسىزدىك جىلدارىندا مەملەكەت تاراپىنان جاستار الەۋەتىن دامىتۋ ءۇشىن بارلىق قاجەتتى جاعدايلار جاسالىپ وتىرعانىن اتاپ وتەمىز. سولاردىڭ ىشىندە مىنالاردى ماقتانىشپەن ايتۋعا بولادى: پرەزيدەنتتىڭ باستاماسىمەن «نازارباەۆ ۋنيۆەرسيتەتى» قۇرىلدى. بۇكىل ەل بويىنشا زياتكەرلىك مەكتەپ جۇيەسىنىڭ قۇرىلىسى جۇزەگە اسىرىلىپ جاتىر. پرەزيدەنتتىك «بولاشاق» باعدارلاماسىنىڭ ارقاسىندا قازاقستان جاستارى الەمنىڭ الدىڭعى قاتارلى ۋنيۆەرسيتەتتەرىندە ءبىلىم الۋدا. قازىر ەلىمىزدىڭ الەۋمەتتىك-ەكونوميكالىق رەفورمالارىنا جاستاردىڭ بەلسەندى قاتىسۋىنا باعىتتالعان بىرنەشە جالپىۇلتتىق جوبالار جۇزەگە اسىرىلۋ ۇستىندە. ولار – «جاسىل ەل», «ديپلوممەن – اۋىلعا», «جاستار پراكتيكاسى», «اۋىل جاستارى», «اۋىلدىڭ وركەندەۋi – قازاقستاننىڭ وركەندەۋi» اكتسياسى جانە وزگە دە باعدارلامالار. مەملەكەت بۇقارالىق سپورتتى دامىتۋ مەن سالاماتتى ءومىر سالتىن قالىپتاستىرۋعا ۇلكەن كوڭىل بولۋدە. ءوڭىرلەردىڭ بارىندە بۇگىنگى تالاپقا سايكەس سپورتتىق كەشەندەر سالىنۋدا, ولار ەلىمىزدىڭ اتىن شىعارىپ, ءمارتەبەسىن اسىراتىن بولاشاق چەمپيونداردى تاربيەلەيتىن نەگىز بولاتىنى ءسوزسىز. ەڭ باستىسى – ءبىز ەگەمەن ەلدىڭ ەركىن ازاماتتارىمىز. ءبىز تاۋەلسىز قازاقستاندا وستىك, ەرجەتتىك. سوندىقتان, ءبىز ءوز وتانىمىزدى سۇيەمىز, ونىڭ بۇدان ءارى دە كوركەيە ءتۇسۋى جولىندا كۇش-جىگەرىمىزدى جۇمساۋعا دايىنبىز. «ەلىڭدى سۇيسەڭ, ەرلىك ىستەيسىڭ» دەيدى حالىق دانالىعى. ءوزىن پاتريوت سانايتىن ءاربىر جاس ازامات قازاقستاندى جان-جۇرەگىمەن سۇيەتىنىنە سەنەمىز. ءبىز تۋىسقاندىق, دوستىق رۋحىندا ءتاربيە الدىق, ەرتەڭىمىزگە دەگەن سەنىممەن وستىك. ءبىزدىڭ بىرلىگىمىز, اسىرەسە, بيىلعى جىلعى كەزەكتەن تىس پرەزيدەنتتىك سايلاۋدا ەرەكشە كوزگە ءتۇستى. تۇڭعىش پرەزيدەنتىمىز – ەلباسى ن.ءا.نازارباەۆتىڭ كانديداتۋراسىنا ەل جاستارىنىڭ ءبىراۋىزدان داۋىس بەرۋى بىرلىگىمىزدىڭ بەرىكتىگىن جالپاق الەمگە جاريا ەتتى. بىزدەر, كەڭەس وتىرىسىنا قاتىسۋشىلار, سىزدەردى, بارشا زامانداستارىمىزدى قازاقستاندى قارقىندى دامىعان ىرگەلى مەملەكەتكە اينالدىرۋ ىسىنە ۇلەس قوسۋعا ۇندەيمىز. ءبىزدىڭ ارقايسىمىز تۋعان ەلىمىزدىڭ بولاشاعى ءۇشىن جاۋاپتى ەكەنىمىزدى سەزىنەمىز. وسى ماقساتتا ءبىز ەڭ الدىمەن ساپالى ءبىلىم الىپ, ءوز ءىسىنىڭ كاسىپقوي مامانى بولۋ, وتانىمىزدىڭ وركەندەۋى جولىندا ەڭبەك ەتۋ پارىزىمىز ەكەنىن جاقسى تۇسىنەمىز. ءبىز ەلىمىزدىڭ جاستارىن قازاقستان رەسپۋبليكاسىنىڭ كوركەيۋى مەن قارقىندى دامۋىن قامتاماسىز ەتۋگە باعىتتالعان قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ ساياساتى توڭىرەگىندە ودان ءارى توپتاسۋعا شاقىرامىز. قازاقستان جاستارى الداعى ۋاقىتتا دا وزدەرىنىڭ بىلىمدەرى مەن جاسامپاز ەڭبەكتەرىن, كۇش-جىگەرىن ءححى عاسىردا جاڭا قازاقستاندى قارىشتاپ دامىتۋعا, ونى باسەكەگە قابىلەتتى ءارى بەدەلدى مەملەكەت رەتىندە قالىپتاستىرۋعا بەلسەندى تۇردە جۇمساي بەرەتىندىگىنە كامىل سەنەمىز. استانا قالاسى, 2011 جىلعى 21 ماۋسىم.