...سەنات دەپۋتاتتىعىنا كانديدات ۇسىنىلدى
باتىس قازاقستان وبلىستىق ءماسليحاتىنىڭ كەزەكتى سەسسياسىندا اتالعان ءماسليحاتتىڭ حاتشىسى مالىك قۇلشار سەنات دەپۋتاتتىعىنا ر.س.احمەتوۆتىڭ كانديداتۋراسىن ۇسىندى. تۇراقتى كوميسسيانىڭ توراعاسى قازىباي بوزىموۆ پەن وبلىستىق ءماسليحاتتىڭ دەپۋتاتى كەيپىن ءتولەگەنوۆ بۇل ۇسىنىستى قولداپ ءسوز سويلەدى.
راشيد سايران ۇلى رەسپۋبليكامىزداعى تاجىريبەلى, ءارى كاسىبي پارلامەنت مۇشەلەرىنىڭ ءبىرى. ول بۇعان دەيىنگى سەناتورلىق قىزمەتىندە ايماق مۇددەسىن لايىقتى ءتۇردە قورعاي ءبىلدى. وڭىرگە رەسپۋبليكالىق بيۋدجەتتەن ءبولىنەتىن ترانسفەرتتىك قاراجاتتاردىڭ جەتكىلىكتى تۇردە بولىنۋىنە ىقپال جاسادى. ەڭ باستىسى – ول ەلگە جاناشىرلىق سەزىممەن قاراي بىلەدى. سوندىقتان دا ونىڭ كانديداتۋراسى سەنات دەپۋتاتتىعىنا سايلانۋعا لايىقتى دەپ بىلەمىز, دەدى ولار.
سەسسيا ر.س.احمەتوۆتى سەنات دەپۋتاتتىعىنا كانديدات ەتىپ ۇسىنۋ جونىندە شەشىم قابىلدادى.
تەمىر قۇسايىن.
ورال.
* * *
...وڭىرلىك ەمحانالىق زەرتحانا اشىلدى
وبلىس ورتالىعىنداعى «وليمپ» دەپ اتالاتىن بۇل ەمحانانىڭ ماقساتى مەديتسينالىق زەرتتەۋلەر ناتيجەسىن الەمدىك ستاندارتتار دەڭگەيىنە جەتكىزۋ, دياگنوستيكا سالاسىنا يننوۆاتسيالىق تەحنولوگيالاردى ەنگىزۋ, دالدىك مەديتسينا جۇيەسىن جەتىلدىرۋ بولىپ تابىلادى. ەمحانانىڭ ەرەكشەلىگى – جەدەلدىك, اسا كۇردەلى دەگەن اناليزدەر قورىتىندىلارىنىڭ ءوزى ءبىر كۇن ىشىندە دايىندالادى. بارلىق زەرتتەۋ ۇدەرىستەرى اۆتوماتتاندىرىلعان.
«وليمپ-تە» مەديتسينالىق اناليزدەردىڭ 500 ءتۇرى زەرتتەلەدى. ياعني, ونىڭ بارلىق تەحنولوگيالىق ۇدەرىستەرى زەرتحانالىق ارنايى اقپاراتتىق جۇيەلەرمەن جابدىقتالعان. باسقا وڭىرلەردە دە بولىمشەلەرى بار. ەمحانا ماماندارى ۇيگە دە بارا الادى. بارلىق جاستاعى ادامدار زەرتتەۋدەن وتەدى.
فاريدا بىقاي.
پاۆلودار وبلىسى.
* * *
...20 جىلدىققا ارنالعان ءماجىلىس ءوتتى
باسەكەلەستىكتى قورعاۋ (مونوپولياعا قارسى) اگەنتتىگىنە 20 جىل تولدى. تاۋەلسىزدىكپەن تەل ءوسىپ كەلە جاتقان قۇرىلىم وسى مەرەيجاسىنا بايلانىستى ءوڭىردەگى سالا قىزمەتكەرلەرىن, ءىرى نارىق سۋبەكتىلەرى باسشىلارىن شاقىرىپ, دوڭگەلەك ۇستەل ءوتكىزدى. وندا اگەنتتىكتىڭ قۇرىلۋ تاريحىنان اڭگىمە ايتىلدى, ءبىراق نەگىزگى اڭگىمە ەكونوميكاداعى, بيزنەس سالاسىنداعى باسەكەلەستىكتى دامىتۋ, وندىرگەن تاۋارلاردىڭ باسەكەگە قابىلەتتىگىن كۇشەيتۋ جايىندا بولدى.
باسقوسۋعا جينالعاندار ءوتكەن جىلدىڭ ەكىنشى جارتىسىندا اتقارىلعان جۇمىستار ناتيجەسىنە توقتالدى. قىزمەتكەرلەر اپتا سايىن ساۋدا نۇكتەلەرىن ارالاپ, باعانىڭ شارىقتاپ كەتپەۋىن قاتاڭ باقىلادى. ويتكەنى, كاسىپكەرلەر تاراپىنان زاڭ بۇزۋشىلىق بولىپ تۇرادى. باسەكەلەستىكتى قورعاۋ اگەنتتىگى ءوڭىرارالىق ينسپەكتسياسىنىڭ باستىعى ەربولات ىبىرايىموۆتىڭ ايتۋىنشا, كاسىپكەرلەر تاراپىنان زاڭ بۇزۋشىلىق كوبىنەسە ازىق-ت ۇلىك وندىرەتىن كاسىپورىنداردا ورىن الادى.
مەرەكەگە ارنالعان ءدوڭگەلەك ۇستەل وسىلاي كوكەيكەستى ءماسەلەلەردى قوزعاۋىمەن ماڭىزدى بولا ءتۇستى.
ءنازيرا جارىمبەتوۆا.
قوستاناي.