پرەمەر-مينيستر كارىم ءماسىموۆتىڭ توراعالىعىمەن وتكەن كەشەگى ۇكىمەت وتىرىسىندا ەلىمىزدەگى ەتتى مال شارۋاشىلىعىن دامىتۋ تۋرالى ماسەلە قارالدى.
وسى ماسەلە جونىندە بايانداما جاساعان اۋىل شارۋاشىلىعى ءمينيسترى اسىلجان مامىتبەكوۆتىڭ ايتۋى بويىنشا, ەلىمىزدىڭ مال شارۋاشىلىعى سالاسى بىرتە-بىرتە دامۋ ۇستىندە. ماسەلەن, ءۇستىمىزدەگى جىلدىڭ 1 ماۋسىمىندا ءوتكەن جىلدىڭ مەرزىمىمەن سالىستىرعاندا, ەت ءوندىرىسىنىڭ كولەمى 1,4 پايىزعا, ءسۇت ءوندىرۋ 0,6 پايىزعا ارتا تۇسكەن. مال باسى ونىڭ ءارتۇرلى ت ۇلىك تۇرلەرى بويىنشا 0,6 پايىزدان 9,3 پايىزعا دەيىن كوبەيگەن. وكىنىشكە قاراي, وسىلاردىڭ ىشىندە ءمۇيىزدى ءىرى قارا مەن شوشقا سانىنىڭ ەپتەپ تومەندەگەنى سەزىلەدى. مۇنىڭ سەبەبى, وتكەن قىستاعى جەمشوپ جەتكىلىكسىزدىگىنەن بولسا, ەكىنشىدەن, مال سانىنىڭ ناقتىلاندىرۋعا دا بايلانىستى ەكەندىگى دە سەزىلەدى.
مينيستر ءوز سوزىندە وتاندىق مال شارۋاشىلىعىن دامىتۋدىڭ, سونىڭ ىشىندە ەت ءوندىرىسىن ارتتىرۋدىڭ بىرقاتار پروبلەمالارى مەن شەشىمىن كۇتكەن ماسەلەلەرىنە توقتالدى. سونىڭ ىشىندە مال تۇقىمىن اسىلداندىرۋعا بايلانىستى جۇرگىزىلىپ جاتقان جۇمىستارعا كەڭىنەن ءمان بەردى. الداعى ۋاقىتتا سەلەكتسيالىق جۇمىستاردى جولعا قويۋ, مالدى اسىلداندىرۋ ءۇشىن شارۋا قوجالىقتارى مەن قوسالقى شارۋاشىلىقتار پايدالانۋىنداعى ەت باعىتىنداعى تۇقىم ءوندىرۋشى بۇقالاردى ۇستاۋعا جۇمسالاتىن شىعىنداردىڭ كولەمىن 50 پايىزعا دەيىن ارتتىرۋدى ۇسىندى.
ءمينيستردىڭ ايتۋىنشا, ەت ەكسپورتىن دامىتۋ باعىتىندا ەلىمىزگە اسىل تۇقىمدى مالداردى اكەلۋ جۇمىسى ودان ءارى جالعاستىرىلاتىن بولادى. ءۇستىمىزدەگى جىلى 10 مىڭ باس شەتەلدىك سەلەكتسياداعى اسىل تۇقىمدى ءمۇيىزدى ءىرى قارا مالىن اكەلۋ جوسپارلانسا, كەلەسى جىلى وسى كورسەتكىش 12 مىڭ باستى قۇراماق.
ال 2010 جىلى قازاقستانعا 2,5 مىڭ باس اسىل تۇقىمدى سيىرلار اكەلىنسە, ولاردان قازىرگى كۇنى 2 مىڭعا جۋىق بۇزاۋ الىنىپ وتىر ەكەن. ەندى 320 انالىق مال تولدەيدى دەپ كۇتىلۋدە.
ەت ەكسپورتىن دامىتۋ باعىتىندا ۇستىمىزدەگى جىلى قازاقستاندا 18 مىڭ باس ءىرى قارا ۇستاۋعا نەگىزدەلگەن بورداقىلاۋ الاڭدارى اشىلۋ كەرەك. بۇگىنگى كۇنى «قازاگرو» حولدينگى نەسيە رەسۋرستارى ەسەبىنەن 14 مىڭ باس مالدى ءبىر مەزەتتە ۇستاۋعا بولاتىن 4 بورداقىلاۋ الاڭىن قارجىلاندىرۋ ماقۇلدانعان. ولار الماتى جانە اقمولا وبلىستارىندا ورنالاستىرىلاتىن بولادى.
ماسەلەنى قورىتىندىلاعان ۇكىمەت باسشىسى مەملەكەتتىك ورگاندارعا بىرقاتار تاپسىرمالار بەردى. اۋىل شارۋاشىلىعى, قارجى, ەكونوميكالىق دامۋ جانە ساۋدا, ادىلەت مينيسترلىكتەرىنە بۇگىنگى تالقىلانعان جاعدايلاردى ەسكەرە وتىرىپ, ءبىر اپتانىڭ ىشىندە ەلىمىزدەگى ەت ەكسپورتىنىڭ الەۋەتىن دامىتۋ تۋرالى جوبانى جۇزەگە اسىرۋدىڭ كەشەندى جوسپارىن ازىرلەپ, ۇكىمەت كەڭسەسىنە وتكىزۋدى تاپسىردى. سونىمەن قاتار, اۋىل شارۋاشىلىعى مينيسترلىگىنە وسى جوبانى جۇزەگە اسىرۋ بارىسىنا تۇراقتى تۇردە مونيتورينگ جۇرگىزىپ وتىرۋدى, ال وبلىس اكىمدەرىنە جوبانى جۇزەگە اسىرۋعا قاتىستى شارالاردى مۇلتىكسىز ورىنداۋدى مىندەتتەدى.
سۇڭعات ءالىپباي.