كەشە استانادا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ وتىرىسى اياسىندا پارلامەنت سەناتىنىڭ توراعاسى, الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ جەتەكشىسى قايرات ءمامي بىرقاتار ەكىجاقتى كەزدەسۋلەر وتكىزدى, دەپ حابارلادى پارلامەنت سەناتىنىڭ ءباسپاسوز قىزمەتى.
يسلام جانە شاقىرۋ ىستەرى جونىندەگى مينيسترلەر كونفەرەنتسياسىنىڭ (ساۋد ارابياسى) باس حاتشىسى مادجيد ابدۋل ازيز ات-تۇركيمەن كەزدەسۋ بارىسىندا ق.ءمامي الەمدىك جانە ءداستۇرلى دىندەر ليدەرلەرى سەزىنىڭ جۇمىسىنداعى ساۋديا تاراپىنىڭ ۇلەسىن جوعارى باعالادى. «قازاقستان ساۋد ارابياسى كورولدىگىن اراب جانە مۇسىلمان الەمىندەگى ستراتەگيالىق ارىپتەس رەتىندە قاراستىرادى», دەپ اتاپ ءوتتى توراعا.
قازاقستاننىڭ يسلام كونفەرەنتسياسى ۇيىمىنا توراعالىق ەتۋىنە قاتىستى ق.ءمامي «ءبىزدىڭ ەلىمىز ەقىۇ-داعى قىزمەت ءتاجىريبەسىن يكۇ-عا اكەلۋگە, باتىس پەن مۇسىلمان الەمىنىڭ ءوزارا تۇسىنىستىگى مەن ىنتىماقتاستىعىن نىعايتۋعا نيەتتەنىپ وتىر», دەگەن ويىمەن ورتاقتاستى.
جاھاندىق دىنارالىق جانە مادەنيەتارالىق ۇنقاتىسۋدى دامىتۋدىڭ وزەكتى ماسەلەلەرى ءبۇكىلقىتاي بۋددا اسسوتسياتسياسى (قحر) حالىقارالىق ىنتىماقتاستىق ءبولىمىنىڭ باسشىسى پۋ چجەنمەن كەزدەسۋدە تالقىلاندى.
الەمدىك جانە ءداستۇرلى دىندەر ليدەرلەرى سەزىن وتكىزۋ جونىندەگى قازاقستان باستاماسىنا قىتاي جاعىنىڭ قولداۋ بىلدىرگەنى ءۇشىن ريزاشىلىعىن جەتكىزە وتىرىپ, ق.ءمامي «قازاقستان مەن قىتاي اراسىنداعى ەكىجاقتى ىنتىماقتاستىق پەن دوستىق بايلانىستار الەۋەتى وركەنيەتارالىق جانە ءدىنارالىق ۇنقاتىسۋدى بىرلەسە ىلگەرىلەتۋمەن باي تۇسەدى», دەپ اتاپ ءوتتى.
سول كۇنى ق.ءماميدىڭ يزرايل باس سەفارد ءراۆۆينىنىڭ وكىلى مەير دانينومەن, ماسكەۋ پاتريارحاتى شىركەۋلەرمەن جانە قوعاممەن ءوزارا قاتىناستار جونىندەگى ءبولىمى توراعاسىنىڭ ورىنباسارى گەورگي روششينمەن, كيەلى تاقتىڭ دىنارالىق ۇنقاتىسۋ جونىندەگى پاپا كەڭەسىنىڭ وكىلى كريستيان تروللمەن, ەگيپەتتىڭ الماتىداعى يسلام ءمادەنيەتى ۋنيۆەرسيتەتىنىڭ رەكتورى ماحمۇد حيدجازيمەن كەزدەسۋلەرىندە قازاقستاندىق دىنارالىق فورۋمدى ودان ءارى ىلگەرىلەتۋ ءماسەلەلەرى تالقىلاندى.