كەشە قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ گەرمانيا فەدەراتيۆتىك رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى راينەر ويگەن شلاگەتەردى قابىلدادى, دەپ حابارلادى ءماجىلىستىڭ ءباسپاسوز قىزمەتى.
ايتا كەتۋ كەرەك, بۇل جۇزدەسۋ گەرمانيا ەلشىسىنىڭ قازاقستانداعى قىزمەتىنىڭ اياقتاۋىنا وراي ءوتتى. ءماجىلىس توراعاسى ەلشىگە قازاقستان مەن گەرمانيا اراسىنداعى ىنتىماقتاستىق بايلانىستاردى نىعايتۋ جولىندا جاساعان ەڭبەگىنە العىسىن جەتكىزدى.
ءماجىلىس توراعاسى سوڭعى جىلدارى قازاقستان مەن گەرمانيا اراسىنداعى ساياسي-ەكونوميكالىق بايلانىستىڭ ورىستەي ءتۇسكەنىن اتاپ ءوتتى. وعان جوعارى دەڭگەيدە وتكەن جۇزدەسۋلەر مەن كەلىسسوزدەر باستى نەگىز بولدى. وتكەن جىلى ارنايى ساپارمەن گفر فەدەرالدىق كانتسلەرى انگەلا مەركەل حانىمنىڭ قازاقستانعا ەكى مارتە كەلگەنى بەلگىلى. سونداي-اق گفر سىرتقى ىستەر ءمينيسترى, بۋندەستاگ دەپۋتاتتارى دا كەلىپ, ەكى ەل اراسىنداعى ءارىپتەستىك بايلانىستىڭ ءورىس الۋىنا ىقپال ەتىپ, ءوز تاجىريبەلەرىمەن ءبولىستى.
اسىرەسە, 2009 جىلى قازاقستاننىڭ گەرمانياداعى جىلى جانە 2010 جىلى گەرمانيانىڭ قازاقستانداعى جىلى تابىستى ءوتتى.
«گەرمانيا قازاقستاننىڭ ەقىۇ-عا توراعالىق ەتۋ ءجونىندەگى ۇسىنىسىنا قولداۋ ءبىلدىردى. سونىمەن قاتار, ەلىمىزدىڭ بۇكىلالەمدىك ساۋدا ۇيىمىنا كىرۋىنە دە ىقپال ەتۋدە», دەدى ورال مۇحامەدجانوۆ.
2010 جىلدىڭ قورىتىندىسى بويىنشا گەرمانيا قازاقستانمەن ساۋدا-ەكونوميكالىق ارىپتەس ەلدەردىڭ ىشىندە التىنشى ورىنعا كوتەرىلدى. قوس مەملەكەتتىڭ ىنتىماقتاستىق, ساياسي-ەكونوميكالىق بايلانىسى ارتا تۇسۋىنە قازاقستان پرەزيدەنتى نۇرسۇلتان نازارباەۆتىڭ گەرمانياعا جاساعان رەسمي ساپارى, مەملەكەت باسشىلارىنىڭ جوعارى دەڭگەيدە وتكەن كەزدەسۋلەرى نەگىز بولدى.
ەلشى ءوز كەزەگىندە جىلى لەبىزى ءۇشىن ءماجىلىس توراعاسىنا ريزاشىلىعىن ءبىلدىردى. ءوزى قىزمەت ەتكەن 4 جىل ىشىندە ءبىراز ىستەر اتقارىلعانىن ايتتى. «قازاقستاننىڭ ۇلان بايتاق جەرى بار, ۇلكەن قالالارىندا, شاعىن ەلدى مەكەندەرىندە بولىپ, ءبىراز ءوڭىرلەردى ارالادىم. بارلىق جەردە دە مەنى جىلى قارسى الدى. اسەرلى كۇندەرىم رەتىندە ەسىمدە ساقتالادى. بۇدان ءتورت جىل بۇرىن استانا قالاسى دا قازىرگىدەي ەمەس ەدى. از عانا ۋاقىتتىڭ ىشىندە ودان سايىن كوركەيدى. مەملەكەت تە ەكونوميكالىق ورلەۋ جولىنا ءتۇستى», دەدى راينەر ويگەن شلاگەتەر.
تاراپتار ساۋدا-ەكونوميكالىق قاتىناستى جاقسارتۋ, ءبىلىم مەن عىلىم سالالارىنداعى بايلانىستى جاقسارتۋ قاجەتتىگى جونىندە پىكىر ءبىلدىردى.