يزرايل قورعانىس ءمينيسترى ەحۋد باراك سيريا پرەزيدەنتى باشار اسادتىڭ رەجىمى وپپوزيتسياعا ءارى كەتسە جارتى جىل عانا توتەپ بەرەدى دەپ مالىمدەدى. مەن ب.اساد وتستاۆكاعا قاراي باعىت الىپ بارادى دەپ ەسەپتەيمىن, دەدى ە.باراك.
مۇنداي پىكىردى تۇركيا پرەزيدەنتى ابدۋللا گۇل دە ءبىلدىردى. ونىڭ سوزىنە قاراعاندا, ب.اساد ەل ىشىندەگى قارسىلىقتاردى باسۋ ءۇشىن «كۇشتى ارتىق» پايدالانعان. سونىڭ سالدارىنان كوپتەگەن قۇرباندىقتارعا جول بەرىلدى. ال كەشە ب.اساد ەلدە رەفورمالار جۇرگىزىلەتىنىن جاريا ەتتى. سيريا حالقى مۇنى كەش ارەكەت دەپ باعالادى. كەيبىر دەرەكتەرگە قاراعاندا, سيرياداعى تولقۋلار باستالعالى بەرى مىڭنان استام ادام كوز جۇمعان.
كەزەكتى ترانش ءۇشىن شارت قويىلدى
الەمدىك قارجى-ەكونوميكالىق داعدارىستان ەڭسە تىكتەي الماي جاتقان ەلدىڭ ءبىرى – گرەكيا. ەندى ەۋرووداق ەلدەرى افيناعا ەكونوميكالىق كومەك باعدارلاماسى شەڭبەرىندە 12 ميلليارد ەۋرو ءبولۋدى جوسپارلاپ وتىر. بىراق قارجى مينيسترلەرى اقشا ءبولۋدىڭ شارتىن دا ناقتىلاپ بەردى.
ەگەر گرەكيا پارلامەنتى وسى ايدىڭ سوڭىنا دەيىن بيۋدجەت شىعىندارىن 28 ميلليارد ەۋروعا قىسقارتۋ باعدارلاماسىن ماقۇلداپ, بۇعان دەيىن ۇكىمەت قابىلداعان ەكونوميكالىق رەفورمالار جوسپارىن قولداعان جاعدايدا شىلدە ايىنىڭ العاشقى جارتىسىنا دەيىن گرەكياعا جوعارىدا اتالعان سوما كولەمىندە بەسىنشى ترانش ۇسىنىلاتىن بولادى. بۇگىندە ەل ۇكىمەتى ەكى وتتىڭ ورتاسىندا قالىپ وتىر. ويتكەنى, بيۋدجەتتى قىسقارتۋ باعدارلاماسىنا حالىق قارسى.
سىرتتاي 35 جىلعا ۇكىم شىعارىلدى
تۋنيستە سوت ەلدىڭ بۇرىنعى پرەزيدەنتى زين ءال-ابيدين بەن ءالي مەن ونىڭ زايىبى لەيلا ترابەلسيگە سىرتتاي ۇكىم شىعاردى. ەرلى-زايىپتىلارعا مەملەكەت مۇلكىن ۇرلادى دەگەن ايىپ تاعىلىپ, ارقايسىسى 35 جىلعا باس بوستاندىقتارىنان ايىرىلدى.
سوت سونداي-اق بەن ءالي 25 ميلليون ەۋرو, ال ترابەلسي 20,5 ميلليون ەۋرو ايىپ تولەۋلەرى ءتيىس دەپ شەشتى. ءىس ءبىر-اق كۇندە قارالىپ, شەشىم شىعارىلدى. سوتتالعانداردىڭ ءمۇددەسىن سوت تاعايىنداعان مەملەكەتتىك ادۆوكاتتار قورعادى. بەن اليگە قاتىستى تاعى ءبىر قىلمىستىق ءىس – ەسىرتكى مەن قارۋ-جاراقتىڭ زاڭسىز اينالىمىن قارايتىن ءماجىلىس 30 ماۋسىمعا شەگەرىلدى.
قوعامداستىق قورىنان قارجى اۋدارىلدى
ەۋرازەق-تىڭ داعدارىسقا قارسى قورىنان مينسكىگە بولىنگەن العاشقى تۇراقتاندىرۋشى نەسيەنىڭ ترانشى اۋدارىلدى. بۇل تۋرالى رەسەي قارجى ءمينيسترى الەكسەي كۋدرين حابارلادى. ول سونداي-اق ترانشتىڭ جالپى كولەمى 800 ميلليون دوللاردى قۇرايتىنىن اتاپ ءوتتى.
ا.كۋدريننىڭ ايتۋىنشا, بەلورۋسسيا ترانشقا قاجەتتى بارلىق مىندەتتەمەلەرىن ورىنداعان. ەل باسشىلىعى ەۋرازەق-پەن قاتار, بىرنەشە ميلليارد دوللار نەسيە ءبولۋدى سۇراپ, حالىقارالىق ۆاليۋتا قورىنا دا شىققان بولاتىن. بىراق حۆق ازىرشە ناقتى شەشىمگە كەلە الماي وتىرعان سياقتى. ونىڭ تالابى دا جوعارى بولۋى ىقتيمال.
تۋ-134 ۇشاعى اپاتقا ۇشىرادى
«رۋسەير» اۆياكومپانياسىنىڭ ءماسكەۋدەن پەتروزاۆودسكىگە ۇشىپ شىققان تۋ-134 جولاۋشىلار ۇشاعى پەتروزاۆودسك اۋەجايىنا قونۋعا ءبىر شاقىرىم قالعاندا اپاتقا ۇشىرادى. لاينەردىڭ بورتىندا ەكيپاج مۇشەلەرىن قوسا ەسەپتەگەندە 62 ادام بولسا, 44-ءى قازا تاپتى. ىشىندە 7 بالا بار.
اپاتتىڭ سەبەپتەرى تۋرالى ءارتۇرلى بولجامدار ايتىلعانىمەن, ناقتى جاعداي «قارا جاشىكتەر» وقىلعاننان كەيىن انىقتالاتىن بولادى. ال العاشقى ءۇش سەبەپ رەتىندە ادام فاكتورى, اۋا رايى جاعدايى جانە تەحنيكانىڭ بۇزىلۋى كولدەنەڭ تارتىلعان ەدى. اپاتقا بايلانىستى قىلمىستىق ءىس قوزعالىپ ۇلگەرىلدى.
يراكتا تىنىشتىقتىڭ اۋىلى الىس
يراكتىڭ ءال-ديۆانيا قالاسىندا جارىلعىش زاتتار سالىنعان ەكى اۆتوكولىك جارىپ جىبەرىلدى. لاڭكەستىك ارەكەت كاديسيا پروۆينتسياسى گۋبەرناتورىنىڭ رەزيدەنتسياسى الدىندا جاسالدى. تەراكت سالدارىنان 25 ادام وپات بولسا, 30 ادام ءتۇرلى دەڭگەيدە دەنە جاراقاتىن العان.
جارىلىستاردان كاديسيا گۋبەرناتورىنىڭ زارداپ شەككەن-شەكپەگەنى بەلگىسىز. بۇعان دەيىن باعدادتا جاسالعان تاعى ءبىر جارىلىستان فرانتسيا ەلشىلىگىنىڭ كورتەجىندەگى جەڭىل كولىك زاقىمدانعانى, جەتى ادام جارالانعانى تۋرالى حابارلاعان بولاتىنبىز. وسىلايشا يراكتا سوعىس رەسمي تۇردە وتكەن جىلدىڭ جازىندا اياقتالدى دەپ سانالعانىمەن, لاڭكەستىك ارەكەتتەر تىيىلار ەمەس.
قىسقا قايىرىپ ايتقاندا:
* رەسەي فەدەراتسياسىنىڭ كوممۋنيستىك پارتياسى مەن رەسەي ليبەرال-دەموكراتيالىق پارتياسى پرەزيدەنت د.مەدۆەدەۆ پەن پرەمەر-مينيستر ۆ.پۋتينگە 2012 جىلعى پرەزيدەنتتىك سايلاۋعا كانديداتتار رەتىندە قاتىسۋدى ۇسىندى. مۇنداي جاعدايدا, دەيدى پارتيا سەركەلەرى گ.زيۋگانوۆ پەن ۆ.جيرينوۆسكي, ساياسي ۇدەرىستە باسەكەلەستىك پايدا بولار ەدى.
* ەۋرووداق بەلورۋسسياعا قارسى تاعى ءبىر سانكتسيا ەنگىزدى. وعان ەلدەگى تەز ناشارلاپ كەتكەن ادام قۇقى جونىندەگى جاعداي سەبەپ بولعان. ۇستىمىزدەگى جىلدىڭ قاڭتارىندا ەو 188 بەلارۋس شەنەۋىنىگىنە, ىشىندە پرەزيدەنت ا.لۋكاشەنكو دا بار, وداق ەلدەرىنە كىرۋگە تىيىم سالىپ, سانكتسيا ەنگىزگەن ەدى.
* ۋكراينا ناتو وكىلدەرىمەن ءوزىنىڭ سىرتقى ساياساتى قاعيداتتارىن تالقىلاۋ نيەتىندە كورىنەدى. بۇل ماسەلە بويىنشا ەكى كەزدەسۋ وتكىزۋ جوسپارلانسا, العاشقىسىندا ۋكراينانىڭ سىرتقى ساياساتى قاعيدالارى, ەكىنشىسىندە سىرتقى ساياسي ستراتەگيا قاعيدالارى تالقىلانباق ەكەن.
* ءتبيليسيدىڭ قالالىق سوتى جاقىندا گرۋزيا استاناسىندا ورىن العان نارازىلىق اكتسيالارىن دايىنداپ جانە وعان قاتىسقان پارلامەنتتىڭ ەكس-سپيكەرى نينو بۋردجانادزەنىڭ جۇبايى بادري بيتسادزەنى تۇتقىنداۋعا سانكتسيا بەرگەن. بۇعان دەيىن بيتسادزەدەن 60 مىڭ دوللار كەپىلدىك تولەۋ تالاپ ەتىلسە, ول ودان باس تارتقان.
ينتەرنەت ماتەريالدارى نەگىزىندە ازىرلەندى.