كەشە پارلامەنت ءماجىلىسىنىڭ توراعاسى ورال مۇحامەدجانوۆ جاپونيانىڭ ەلىمىزدەگى توتەنشە جانە وكىلەتتى ەلشىسى يۋدزو حارادامەن كەزدەستى, دەپ حابارلادى وسى پالاتانىڭ ءباسپاسوز قىزمەتى.
ءماجىلىس توراعاسى مەيماننىڭ قازاقستانداعى توتەنشە جانە وكىلەتتى ەلشىسى قىزمەتىنىڭ باستالۋىمەن قۇتتىقتاپ, ەكى ەل اراسىنداعى يگىلىكتى ىسىنە تابىس تىلەدى. قازاقستاننىڭ جاپونيامەن اراداعى بايلانىستىڭ دامۋىنا ايرىقشا ءمان بەرەتىنىن ايتتى. جاپونيا قازاقستاننىڭ قيىر شىعىس ايماعىنداعى ساياسي جانە ەكونوميكالىق سەنىمدى ارىپتەسى سانالادى, دەدى.
قازاقستان ورتالىق ازيا ءماسەلەلەرىن شەشۋگە ىقپال ەتۋگە تىرىسقان جاپونيانىڭ ساياساتىن قولدايدى. ءماجىلىس توراعاسى «ورتالىق ازيا + جاپونيا» ءۇنقاتىسۋ الاڭىنىڭ ءورىس الۋىنا تىلەكتەستىگىن ءبىلدىردى. جاپونيا قازاقستاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك) سياقتى ءوزارا كەلىسىم مەن بەيبىتشىلىكتى ساقتاۋعا باعىتتالعان باستامالارىن جوعارى باعالايدى. ال قازاقستان ءوز تاراپىنان جاپونيانىڭ بۇۇ قاۋىپسىزدىك كەڭەسىنە تۇراقتى ءمۇشە بولۋىنا قولداۋ بىلدىرۋدە.
قازاقستان پرەزيدەنتى ن.نازارباەۆتىڭ 2008 جىلعى ماۋسىمداعى توكيوعا جاساعان رەسمي ساپارى ەكىجاقتى قارىم-قاتىناستىڭ دامي تۇسۋىنە سەرپىن بەردى. ەكى ەل اراسىنداعى ساۋدا اينالىمى 2010 جىلى 1 ملرد. دوللاردان استى. ال ەل ەكونوميكاسىنا ينۆەستيتسيا سالۋ باعىتىندا ءالى دە پايدالانىلماعان مۇمكىندىكتەر بار. قازاقستان جاپونيامەن ءوزارا ءتيىمدى ينۆەستيتسيالىق جانە تەحنولوگيالىق ىنتىماقتاستىقتى دامىتۋعا دا مۇددەلى.
تاراپتاردىڭ ستراتەگيالىق ىنتىماقتاستىعىنا ەكى ەل پارلامەنتشىلەرىنىڭ دە قوسار ۇلەستەرى از ەمەس. وتكەن جىلى كۇزدە ءماجىلىس توراعاسى ورال مۇحامەدجانوۆ باستاعان قازاقستان پارلامەنتشىلەرىنىڭ جاپونياعا بارعان ساپارى پارلامەنتارالىق بايلانىستى دامىتۋعا نەگىز بولدى. ال ۇستىمىزدەگى جىلى مامىر ايىندا ەلوردامىزدا وتكەن IV استانا ەكونوميكالىق فورۋمىنا قاتىسۋعا كەلگەن جاپونيانىڭ بۇرىنعى پرەمەر-ءمينيسترى جانە اتالعان ەلدىڭ قازاقستانمەن دوستىقتى نىعايتۋ جونىندەگى پارلامەنتتىك ليگاسىنىڭ توراعاسى يۋكيو حاتوياما مەن ورال مۇحامەدجانوۆ كەزدەستى.
ناۋرىز ايىندا جاپونيادا ورىن العان تابيعات اپاتىنا بايلانىستى كۇنشىعىس ەلىنىڭ پارلامەنتشىلەرىنە كوڭىل ايتۋ جەدەلحاتى جولدانعان بولاتىن. سونىمەن قاتار, قازاقستان جاپون حالقىنا گۋمانيتارلىق كومەك كورسەتتى. ەلشى قيىن كەزەڭدە قولداۋ جاساعان قازاقستانعا جاپون حالقى اتىنان العىسىن جەتكىزدى.