...ىندەت وشاعىندا بولدى
اقجايىق اۋدانىنا قاراستى ءتىنالى اۋىلىنداعى ءىرى قارا مەن قوي-ەشكى مالدارى اۋسىل اۋرۋىنا شالدىقتى. اتاپ ايتقاندا, مۇندا سوڭعى دەرەكتەر بويىنشا, 552 باس ءىرى قارا مەن 1642 باس قوي-ەشكى جويىلدى. قازىر 64 ءتۇتىنى بار ءتىنالىدە تۇياق سەرپەر ت ۇلىك قالماعان. كەشە ىندەت وشاعىندا باتىس قازاقستان وبلىسىنىڭ اكىمى باقتىقوجا ءىزمۇحامبەتوۆ بولىپ, تۇرعىندارعا ءتومەندەگى ءجايتتى ءمالىمدەدى:
– ۇكىمەتتىڭ 2003 جىلعى قاۋلىسىنا سايكەس, اۋسىل اۋرۋىنا تاپ بولعان ءىرى قارا ءۇشىن 40 مىڭ تەڭگەگە تارتا, ۇساق مالعا 8 مىڭ تەڭگەدەن استام قارجى بولىنۋگە ءتيىس. الايدا ءبىز تۇرعىندار تالاپتارىنا وراي, ۇكىمەت پەن ءتيىستى مينيسترلىكتەرگە وسى وتەماقىعا قوسىمشا ۇستەمەاقى قوسۋ جونىندە ۇسىنىستار بىلدىردىك. رەسپۋبليكالىق قارجى كوميسسياسى بۇل ۇسىنىستارىمىزدى ماقۇلدادى.
قاۋىپ تولىق سەيىلدى دەپ ايتۋعا ءالى ەرتە. جۇقپالى اۋرۋدىڭ وكرۋگ اۋماعىنداعى القاپ جانە كەڭتۇبەك قىستاقتارىنا دا جەتكەنى ايتىلۋدا. اۋسىل وڭتۇستىك قازاقستان وبلىسىنان كەلدى دەگەن ۇيعارىم جاسالىپ وتىر. بۇعان دەيىنگى ءتارتىپ بويىنشا, ىندەت تابىلعان نۇكتەدە اۋرۋ مالدار عانا جويىلىپ, قالعانى ەگىلۋدەن وتەتىن. ەندىگى جەردە قازاقستان, رەسەي جانە بەلارۋس مەملەكەتتەرى اراسىنداعى كەدەن وداعى تالابىنا سايكەس, ىندەت وشاعى اۋماعىنداعى بارلىق مال تولىعىمەن جويىلماق.
تەمىر قۇسايىن.
باتىس قازاقستان وبلىسى.
* * *
...«مەن قازاقشا بىلەمىن» بايقاۋى باستالدى
«مەن قازاقشا بىلەمىن» بايقاۋىن جىل سايىن ز.قابدولوۆ اتىنداعى جانە «الشى» قورلارى بىرلەسىپ ۇيىمداستىرىپ كەلەدى. وسى بايقاۋعا «تەڭىزشەۆرويل» بىرلەسكەن كاسىپورنى دا قارجىلاي قولداۋ كورسەتۋدەن شەتتەگەن ەمەس. كەشە اتالعان بايقاۋدىڭ بيىلعى سايىسى باستالعانى جاريا ەتىلدى.
وسىعان وراي ۇيىمداستىرۋشىلار بايقاۋدىڭ ماقساتى مەن شارتتارىن تانىستىردى. پروفەسسور قادىر ءجۇسىپتىڭ پىكىرىنشە, مەملەكەتتىك ءتىلدى وزگە ۇلت جاستارىنىڭ اراسىندا كەڭىنەن ناسيحاتتاۋ ءۇشىن شارالاردى كوبىرەك وتكىزگەن ءجون. ال «تەڭىزشەۆرويل» وكىلى گۇلنار ايتجانوۆا الداعى ۋاقىتتا دا مەملەكەتتىك ءتىلدىڭ قولدانىس اياسىن كەڭەيتۋ جانە ونى ناسيحاتتاۋ ءۇشىن دەمەۋشىلىكتى جالعاساتىنىن جەتكىزدى.
جولداسبەك شوپەعۇل.
اتىراۋ وبلىسى.
* * *
...حاس شەبەردىڭ ساپارى اياقتالدى
كاراتە-دودان «ماريوشيكاي» حالىقارالىق ۇيىمىنىڭ پرەزيدەنتى, JKF بويىنشا 7-دان, JKMO بويىنشا 8-دان يەگەرى ساساكي تاشياتسۋ قىزىلجار وڭىرىندە بولىپ, كارادو-دە جانە شوتوكانمەن اينالىساتىن جاستاردى بىرنەشە كۇن بويى جاتتىقتىرۋعا ۋاقىت تابا ءبىلدى.سەمينارلار وتكىزىپ, ەندى عانا قانات جايا باستاعان كۇرەستىڭ قىرى-سىرىنا قانىقتىردى.
بۇل كۇنشىعىس ەلى وعلانىنىڭ قازاقستانعا اتباسىن تىرەگەن تۇڭعىش ساپارى ءارى ۋاقىتىنىڭ تىعىزدىعىنا قاراماستان, وزىمەن ءبىرگە كەلگەن جاپونيالىق سەنسەي جانە ءسىبىر مەن قيىر شىعىس بويىنشا وداقتىڭ باس باپكەرى ميرون كۆون ەكەۋى استانا مەن تەمىرتاۋدان جانە سولتۇستىك قازاقستان وبلىسىنان جينالعان كاراتەشىلەردى شەبەرلىكتەرىمەن تامساندىردى. ءمارتەبەلى مەيماندار جاس سپورتشىلاردىڭ اياق الىسىنا جوعارى باعا بەردى.
ءومىر ەسقالي.
سولتۇستىك قازاقستان وبلىسى.