كەشە ەلىمىزدە دۇنيەجۇزى قازاقتارىنىڭ IV قۇرىلتايى اياسىندا ءمانى مەن ماڭىزى جاعىنان ايتارلىقتاي شارا ءوتتى. استانداعى قاجىمۇقان مۇڭايتپاس ۇلى اتىنداعى ورتالىق ستاديوندا تۇڭعىش رەت قۇرىلتايعا قاتىسۋشىلار اراسىندا فۋتبولدان تۋرنير ۇيىمداستىرىلدى.
تۋريزم جانە سپورت مينيسترلىگىنىڭ ۇيىمداستىرۋىمەن وتكەن بۇل سپورتتىق شاراعا كەشەگى قيىن-قىستاۋ كەزدە شەت ەل اسۋعا ءماجبۇر بولعان قانداستارىمىزدىڭ ۇرپاقتارى ىشىنەن ەۋروپا قازاقتارىنىڭ بىرىككەن كومانداسى, رەسەي, وزبەكستان, موڭعوليا, قىتاي, تۇركياداعى اعايىنداردىڭ قۇرامالارى مەن قازاقستاننىڭ جاس اياقدوپشىلارى قاتىسىپ, باق سىناستى.
ءتۋرنيردىڭ اشىلۋ سالتاناتىندا دۇنيەجۇزى قازاقتارى قاۋىمداستىعى توراعاسىنىڭ ورىنباسارى تالعات ماماشەۆ, قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى ءالىبەك اسقاروۆ, تۋريزم جانە سپورت مينيسترلىگى سپورت ىستەرى ءجونىندەگى كوميتەتىنىڭ توراعاسى ەلسيار قاناعاتوۆ پەن باسقا دا ازاماتتار فۋتبول جارىستارىنىڭ ءمانى مەن ماڭىزىن, ولاردىڭ قازاق جاستارى اراسىندا دوستىق قارىم-قاتىناستى, باۋىرمالدىق پەن ىنتىماقتاستىقتى قالىپتاستىراتىنىن ايتىپ, قازىرگى كەزدە مۇنداي تۋرنيرلەر ەۋروپا قازاقتارىنىڭ كىشى قۇرىلتايى كەزىندە وتكىزىلەتىنىن اتاپ ءوتتى.
ودان ءارى سپورت مەرەكەسىندە «سارىارقا» ۇلتتىق اسپاپتار ءانسامبلى مەن «ەركەس» بالالار ۇجىمىنىڭ قاتىسۋىمەن كونتسەرتتەر قويىلىپ, ءداستۇرلى ۇلتتىق سپورت تۇرلەرىنەن ويىندار كورسەتىلدى. وندا اسىق اتۋ, توعىزقۇمالاق, قازاق كۇرەسىن قۇرىلتاي قوناقتارىنا ناسيحاتتاۋ ماقساتىندا ۇلتتىق ويىنداردىڭ ەرەجەلەرى قازاق جانە اعىلشىن تىلدەرىندە تاراتىلىپ بەرىلدى. وسى كەزدە ەلسيار قاناعاتوۆ بولاشاقتا تەك فۋتبول عانا ەمەس, باسقا دا سپورت تۇرلەرىنەن جارىستار ءوتكىزۋ جوسپارلانىپ وتىرعانىنان حاباردار ەتتى.
وسى ءتۋرنيردىڭ جارتىلاي فينالىنان باستاپ قاتىسقان قازاقستان قۇراماسى شيرەك فينالدا تۇركيا قازاقتارىنىڭ الدىن وراعان وڭتۇستىكتەگى كورشى ەلدەگى اعايىنداردان جەڭىلىس تاپتى. ءسويتىپ, ەكى كەزدەسۋدە قارسىلاستارىن ۇتقان وزبەكستان قازاقتارى فينالعا جولداما الدى. ال ولاردىڭ قارسىلاسى رەسەي مەن ەۋروپا كوماندالارى اراسىندا وتكەن ويىندا انىقتالدى. بۇل ماتچتا رەسەيدىڭ ومبى, ساراتوۆ, ورىنبور, التاي ولكەسى مەن باسقا دا قازاقتار تىعىز قونىستانعان ايماقتارىنان قۇرالعان كوماندا ەۋروپالىق باۋىرلارىنان 2:0 ەسەبىمەن باسىم ءتۇستى. وسى ويىندا العاش رەت 11 مەترلىك ايىپ دوبى بەرىلدى. ونى ازامات جۇماتوۆ ورىندادى. ءۇشىنشى ورىن ءۇشىن وتكەن كەزدەسۋدە قازاقستان قۇراماسى ەۋروپا كومانداسىن 2:0 ەسەبىمەن جەڭىپ, قولا جۇلدەگە يە بولسا, اسا قىزىقتى جانە تارتىمدى نەگىزگى ۋاقىتتاعى ەسەپ 1:1 بولىپ اياقتالعان فينالدا رەسەي قۇراماسى وزبەكستانداعى اعايىندارىن 11 مەترلىك پەنالتيدە جەڭىپ كەتتى.
ءسويتىپ, تاڭەرتەڭنەن كەشكە دەيىن سوزىلعان العاشقى تۋرنير مارەسىنە جەتىپ, جەڭىمپاز بەن جۇلدەگەر كوماندالار ۇيىمداستىرۋشىلار تاراپىنان باعالى سىيلىقتارعا يە بولدى. وسى ءتۋرنيردىڭ ۇزدىك شابۋىلشىسى بولىپ ەۋروپا كومانداسىنىڭ مۇشەسى ەمرە زالىن اتانسا, ۇزدىك قاقپاشى اتاعىنا نۇرسۇلتان ءرۇستەمبەكوۆ (رەسەي), ۇزدىك قورعاۋشى اتاعىنا دارحان كوشەرباەۆ (قازاقستان) يە بولدى. ال جارىستىڭ ەڭ ۇزدىك ويىنشىسى بولىپ رۋسلان ابىشەۆ (وزبەكستان) تانىلسا, مەحمەت الپەر كالكان (تۇركيا) جەڭىسكە دەگەن جىگەرلىلىگى ءۇشىن ديپلومىمەن ماراپاتتالدى.
داستان كەنجالين.