استاناداعى دۇنيەجۇزى قازاقتارىنىڭ IV قۇرىلتايى ويداعىداي ۇيىمداستىرىلدى. وعان ءتۇركىمەنستانداعى قازاق دياسپوراسىنىڭ جەتەكشىسى بيسەنعۇل بەگدەسىنوۆ تە دەلەگات رەتىندە قاتىسۋعا ءتيىس ەدى. الايدا ول تۇرىپ جاتقان ەلىنەن شىعا المادى. انىعىن ايتساق, شىعارمادى.
بەگدەسىنوۆ دەگەن كىم؟ قازاقستاندىق اقپارات قۇرالدارىنداعى دەرەك كوزدەرىنە سۇيەنسەك, بەگدەسىنوۆ – تۇركىمەنستانداعى از قازاقتىڭ جوعىن جوقتاپ, مۇڭىن مۇڭداپ جۇرگەن كوزى اشىق, كوكىرەگى وياۋ ازامات. ونىڭ قىسىمعا ۇشىراپ, وسىنداي جاعدايعا دۋشار بولۋىنا تۇركىمەنستاندا تۇرىپ جاتقان قازاقتاردىڭ ءمۇددەسىن قورعاۋداعى بەلسەندى ازاماتتىق ۇستانىمى سەبەپ بولىپ وتىرعان سياقتى. كەزىندە تۇركىمەنستاندا قازاق مادەني ورتالىعىن اشۋ جونىندە باستاما كوتەرىپ, وكىنىشكە قاراي, تىركەۋگە كەلگەندە, جەرگىلىكتى بيلىكتىڭ رۇقساتىن الا الماعان ول كوشى-قون ماسەلەسىندە تىعىرىققا تىرەلگەن قانداستارىنا قولۇشىن بەرىپ, جات جۇرتتا ءجۇرىپ جيعان-تەرگەندەرىن شاشپاي-توكپەي ەلگە ورالۋلارىنا كومەكتەسپەك بولعان. ويتكەنى, قازاقتار تۇركىمەنستاننان تاريحي وتانىنا ورالۋ ءۇشىن ءۇي-جايىن مەملەكەتكە تاستاپ كەتۋگە ءتيىس. وسىنىڭ ءوزى-اق اتاجۇرتقا قونىس اۋدارۋدى اڭساعان قازاقتاردىڭ اياعىنا تۇساۋ بولىپ وتىر. بەگدەسىنوۆ رەسەيدە تۇراتىن تانىستارى ارقىلى ىقتيار حاتتار جاساپ, كوشۋگە بەل بايلاعان قازاقتاردىڭ ۇيلەرىن جەكەشەلەندىرۋگە كومەكتەسكەن. ونىڭ بار كىناسى وسى. سوعان قاراماستان, ءتۇركىمەنستاننىڭ زاڭ ورىندارى 2011 جىلدىڭ 11 ساۋىرىندە اشعابادتا بيسەنعۇل وڭاي ۇلىن الاياقتىق جاسادى جانە پارا الدى دەگەن ايىپپەن تۇتقىنداعان. اقىرى ءىس سوتقا جەتىپ, بيسەنعۇل بەگدەسىنوۆ وزىنە تاعىلعان ايىپتاردىڭ ءبىرى بويىنشا شارتتى ءتۇردە باس بوستاندىعىنان ايىرىلدى. تۇركىمەنستاننىڭ ۇلتتىق قاۋىپسىزدىك مينيسترلىگى ونى قاماۋدان بوساتقانمەن, جەكە باسىن كۋالاندىراتىن قۇجاتتارىنان ايىرىپ, ەلدەن شىعۋىنا تىيىم سالىپ وتىر. ويتكەنى, سوتتىڭ شەشىمىنە سايكەس ول مەملەكەتكە ءوزى جەكەشەلەندىرۋگە كومەكتەسكەن, ءسويتىپ, تۇركىمەنستان قازاقتارىنىڭ مەنشىگىنە اۋىسقان ءۇيلەردىڭ قۇنىن وتەۋگە ءتيىس. وسى ءماسەلە شەشىلگەنگە دەيىن ول ەشقايدا شىعا المايدى.
مەنىڭشە, ەلىمىزدىڭ سىرتقى ىستەر مينيسترلىگى وسى جاعدايعا ارالاسىپ, شەتتە قىسىم كورىپ, قۋدالانىپ جۇرگەن بيسەنعۇل وڭاي ۇلىنا اراشا ءتۇسۋى, ءسويتىپ ونىڭ جانە وتباسىنىڭ تەزىرەك ەلگە ورالۋىنا كومەكتەسۋى كەرەك سەكىلدى. الەمنىڭ تۇكپىر-تۇكپىرىنە تارىداي شاشىلعان قازاقتىڭ ءبىر عانا وتانى بار. ول – قازاقستان. سوندىقتان قازاقستان بار قازاققا قامقورشى بولۋعا, باستارىنا ءىس تۇسكەندە ولاردى قورعاۋعا ءتيىس دەپ بىلەمىن.
جاراسباي سۇلەيمەنوۆ, ءماجىلىس دەپۋتاتى.