قايرات ءماميدىڭ ءتوراعالىق ەتۋىمەن پارلامەنت سەناتىنىڭ كەزەكتى جالپى وتىرىسى بولىپ ءوتتى. كۇن ءتارتىبىنە سايكەس اۋەلى دەپۋتاتتار سەنات ءتوراعاسىنىڭ ۇسىنىمىن قاراي كەلىپ, ءۇ.ستامقۇلوۆتى كونستيتۋتسيالىق كەڭەس مۇشەسى قىزمەتىنە قايتا تاعايىندادى.
وتىرىستا «ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ قۇقىق قورعاۋ ورگاندارى مەن ارنايى قىزمەتتەرىن جاراقتاندىرۋ ءۇشىن ارنايى تەحنيكا مەن ارنايى قۇرالداردى جەتكىزۋدىڭ جەڭىلدىكتى شارتتارى تۋرالى كەلىسىمدى راتيفيكاتسيالاۋ تۋرالى» زاڭ قابىلداندى. بۇل كەلىسىمگە 2007 جىلعى قازان ايىندا دۋشانبەدە قول جەتكىزىلگەن بولاتىن. قۇجات ۇقشۇ-عا مۇشە مەملەكەتتەردىڭ ايماقتاعى قىلمىسپەن كۇرەس سالاسىنداعى حالىقارالىق ىنتىماقتاستىعىن ودان ءارى نىعايتۋدى كوزدەيدى.
تالقىلانعاننان كەيىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىققا قىزمەت كورسەتۋ ورتالىقتارىنىڭ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن سەنات ەنگىزگەن وزگەرىستەرىمەن ماجىلىسكە جىبەرۋ تۋرالى شەشىم قابىلداندى. وتىرىستا سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەلەكتروندى اقشا ماسەلەلەرى بويىنشا وزگەرىس پەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. قۇجاتتا ۇسىنىلعان وزگەرىستەرگە سايكەس اكىمشىلىك قۇقىق بۇزۋشىلىق تۋرالى, «سالىق جانە بيۋدجەتكە ءتولەنەتىن باسقا دا مىندەتتى تولەمدەر تۋرالى» (سالىق كودەكسى) كودەكستەرگە, «قازاقستان رەسپۋبليكاسىنىڭ ۇلتتىق بانكى تۋرالى», «قازاقستان رەسپۋبليكاسىنداعى بانكتەر جانە بانك قىزمەتى تۋرالى», «تولەم جانە اقشا اۋدارىمدارى تۋرالى» زاڭدارعا وزگەرىستەر ەنگىزىلەتىن بولدى.
ەكى زاڭ جوباسى بويىنشا دەپۋتاتتاردىڭ كوپتەگەن ساۋالدارىنا بايلانىس جانە اقپارات ءمينيسترى ا.جۇماعاليەۆ پەن ۇلتتىق بانك توراعاسىنىڭ ورىنباسارى ب.تاجياقوۆ جاۋاپ بەردى.
جالپى وتىرىستا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى جونىندە پارلامەنت پالاتالارى اراسىنداعى كەلىسپەۋشىلىكتەردى قاراۋ جانە ەڭسەرۋ ءۇشىن كەلىسىم كوميسسياسىنىڭ قۇرامىنا ءوز ارىپتەستەرىن سايلادى.
اسقار تۇراپباي ۇلى.