دۇنيەجۇزى قازاقتارىنىڭ قۇرىلتايىنا قاتىسۋعا كەلگەن قانداستارىمىزدىڭ اۋىل شارۋاشىلىعى مينيسترلىگى جاۋاپتى قىزمەتكەرلەرىمەن وتكەن دوڭگەلەك ۇستەل باسىنداعى كەزدەسۋىندە ولاردى تولعاندىرىپ وتىرعان بىرقاتار ماسەلەلەرگە ناقتى جاۋاپتار بەرىلدى.
دوڭگەلەك ۇستەلدى اشىپ ءجۇرگىزگەن اۋىل شارۋاشىلىعى مينيسترىنىڭ ورىنباسارى مارات ورازاەۆ ءسوز تىزگىنىن قارالىپ وتىرعان ءماسەلەلەرگە اۋداردى. مۇندا قانداستارىمىزدان تۇسكەن ساۋالدار الدىن-الا جيناقتالىپ, وعان جاۋاپ بەرۋ ءۇشىن قاجەتتى لاۋازىمدى تۇلعالار شاقىرىلعان ەكەن.
العاشقى ءۇش ساۋال «نۇرلى كوش» باعدارلاماسىنا اۋىل شارۋاشىلىعى مينيسترلىگى قانداي دەڭگەيدە قاتىسادى دەگەن تاقىرىپقا ارنالىپتى. وعان جاۋاپ بەرگەن اۋىلدىق اۋماقتار ىستەر جونىندەگى كوميتەت توراعاسى سانات تۇڭعىشبەكوۆ «نۇرلى كوشتىڭ» نەگىزگى ۇيلەستىرۋشىسى ەڭبەك جانە حالىقتى الەۋمەتتىك قورعاۋ مينيسترلىگى ەكەندىگىن ايتا كەلە, اۋىل شارۋاشىلىعى مينيسترلىگى وسى باعدارلاماعا قاتىساتىن قازاقستان رەسپۋبليكاسى ازاماتتارىنىڭ كوشى-قون ماسەلەسىن قاراستىراتىندىعىن ايتتى. سوندىقتان وسى ساۋالعا بايلانىستى تۋىنداعان بىرنەشە ءوتىنىش پەن ماسەلە اتالعان مينيسترلىككە جولداناتىن بولدى.
سونداي-اق قانداستارىمىزدى رەپاتريانتتاردى اۋىلدىق جەرگە بەيىمدەۋگە ارنالعان ناقتى جوسپار بار ما, ديپلوممەن اۋىلعا بارعان ورالمان جاستارعا قانداي قامقورلىق كورسەتىلەدى دەگەن سۇراقتار دا تولعاندىراتىن بولىپ شىقتى.
بۇل سۇراقتارعا بەرىلگەن جاۋاپتا وسىدان ءبىراز ۋاقىت بۇرىن ەلباسىنىڭ تاپسىرماسىمەن ديپلوممەن اۋىلعا بارعان الەۋمەتتىك سالا قىزمەتكەرلەرىنە 70 ايلىق ەسەپتىك كورسەتكىش (100 مىڭ تەڭگەنىڭ ۇستىندە) كولەمىندە ءبىر رەتتىك كوتەرمە جاردەماقى بەرۋ, سونىمەن قاتار ءۇي ساتىپ الۋلارىنا 15 جىلدىق مەرزىمگە سىياقى ستاۆكاسى بار بولعانى 0,1 پايىزدى عانا قۇرايتىن جەڭىلدىكتى نەسيە بەرۋ ماسەلەسى زاڭ نەگىزىندە شەشىلگەنى ايتىلدى. وسى جەڭىلدىكتى قازىرگى كۇنى ديپلوممەن اۋىلعا بارعان ورالمان جاستار دا پايدالانىپ وتىر ەكەن. ءماسەلەن, سولتۇستىك قازاقستان وبلىسىندا – 18, شىعىس قازاقستان وبلىسىندا – 7, ماڭعىستاۋ وبلىسىندا 14 ورالمان جاستىڭ وسىنداي قامقورلىققا يە بولعاندىعى ناقتى دەرەكتەرمەن كەلتىرىلدى. مۇنداي قامقورلىق باسقا وبلىستاردا دا جاسالۋدا.
وسى رەتتە وزبەكستاننان كەلگەن قانداسىمىز قازىرگى كۇنى ديپلوممەن اۋىلعا بارعان جاستاردىڭ اراسىندا جوعارىداعىداي قامقورلىققا تەك الەۋمەتتىك سالا قىزمەتكەرلەرى عانا يە بولىپ, ال شارۋاشىلىقتا ەڭبەك ەتۋگە بارۋشىلار ودان تىسقارى قالعاندىعىن ايتىپ, ەندى وسىنداي شارا اگرونومدارعا, زووتەحنيكتەرگە, ينجەنەرلەرگە دە كورسەتىلسە دەگەن ۇسىنىسىن جەتكىزدى.
بۇعان بەرىلگەن جاۋاپتا جوعارىداعى تىزىمگە اۋىلداعى سۇرانىسقا بايلانىستى مال ءدارىگەرلەرى ەنگىزىلگەندىگىن, مۇنان كەيىنگى كەزەكتە اگرونومدار مەن فيتوسانيتاريا قىزمەتكەرلەرى جانە باسقا دا ماماندىق يەلەرى تۇرعاندىعىن, وسىلايشا بۇل ماسەلە جەرگىلىكتى جەردەگى جەكە شارۋاشىلىق يەلەرىمەن كەلىسىم نەگىزىندە ودان ءارى شەشىلە بەرەتىندىگى ايتىلدى.
ورالماندار جوعارىداعى زاڭ اياسىندا اۋىلعا بارعاندارعا مال مەن جەر دە بەرىلسە دەگەن ءوتىنىشتەرىن جەتكىزدى. مينيسترلىكتەگىلەر زاڭ بويىنشا اۋىلعا بارعاندارعا مەملەكەت ءوز تاراپىنان ءتيىستى قارجىلاي كومەكتى بەرەتىندىگىن, سونىمەن قاتار كەيبىر جەرلەردە جەرگىلىكتى بيلىك ورگاندارى سوعان قوسىمشا رەتىندە مال مەن جەر دە بەرىپ جاتقاندىعىن جەتكىزدى. ءسويتىپ, بۇل ماسەلە نەگىزىنەن العاندا جەرگىلىكتى اتقارۋ ورگاندارىنىڭ قۇزىرىنا جاتاتىندىعى ءتۇسىندىرىلدى.
موڭعوليادان كەلگەن قانداستارىمىز وزدەرىنىڭ قازاقستانعا مال الىپ وتكىلەرى كەلەتىندىكتەرىن ايتتى. بۇل وتىنىشكە بەرىلگەن جاۋاپتا اتالعان ماسەلەنىڭ كوپتەن بەرى قاراستىرىلىپ كەلە جاتقاندىعى, الايدا وعان رەسەيدىڭ قاتىسۋىمەن ۇشجاقتى كەلىسىم نەگىزىندە عانا قول جەتكىزۋگە بولاتىندىعى, ال ازىرگە بۇل ماسەلەگە رەسەي تاراپىنىڭ موڭعوليادا ءتۇرلى مال اۋرۋلارى كوپ ەكەندىگىن ايتىپ, ولاردى ءوز جەرىنە وتكىزۋگە رۇقسات بەرمەي كەلە جاتقاندىعى ءتۇسىندىرىلدى.
سۇڭعات ءالىپباي.