ەڭبەك جانە حالىقتى الەۋمەتتىك قورعاۋ مينيسترلىگىندە «رەپاتريانتتاردى الەۋمەتتىك قولداۋ: تاجىريبە, ساباق جانە ماسەلەلەر» دەگەن تاقىرىپتا دوڭگەلەك ۇستەل ءوتتى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆ اتاجۇرتتاعى القالى جيىنعا قاتىسۋشى دەلەگاتتارعا الدىمەن مينيسترلىك جۇمىسىن تانىستىرىپ ءوتتى.
بۇدان كەيىن ول بىلتىرعى جىلدىڭ قازان ايىنا دەيىن كوشى-قون ماسەلەسىمەن ءبىزدىڭ مينيسترلىك اينالىسقان بولسا, ەندى ول ىشكى ىستەر مينيسترلىگىنىڭ قۇزىرەتىنە اۋىستى. الايدا, اۋەلدە ءوزىمىز قولعا العاندىقتان, ەلىمىزدىڭ «كوشى-قون تۋرالى» زاڭىنىڭ جوباسى بويىنشا جۇمىستاردى يەلىگىمىزدەن شىعارعان جوقپىز. قازىر ول پارلامەنتتە قارالۋدا دەي كەلىپ, اتالعان زاڭ جوباسىنداعى ءوزگەرىستەردى شولىپ ءوتتى. اتاپ ايتقاندا, جاڭا جوبا بويىنشا ەگەر ورالمان ەلدىڭ سولتۇستىگىنە كەلىپ قونىستانامىن دەسە, وندا ول وڭتۇستىككە قاراعاندا ەكى جارىم ەسەدەي كوبىرەك قاراجات الماق. ال ورتالىققا كەلۋشىلەر وڭتۇستىكتەگىلەردەن 70 پايىزعا كوبىرەك الاتىن بولادى. ويتكەنى, ورالماندار كوبىنە قىسى جايلى وڭتۇستىك ءوڭىرلەرگە كەلۋگە پەيىلدى, ال ءبىزدىڭ جەرىمىز بولسا ۇلان-بايتاق, سوندىقتان قازاعى ازىراق سولتۇستىكتى شەتتەن كەلگەن باۋىرلارىمىز قۇتتى مەكەن ەتسە, ەل ىرگەسى بەكىپ, ىرىسىمىز مولايا تۇسپەك دەگەن ول زاڭ جوباسىنداعى تاعى ءبىر جاقسى جاڭالىقتى جاريالاعان. ياعني, ۆيتسە-ءمينيستردىڭ ايتۋىنشا, ەندى شەتتەگى باۋىرلار قۇجاتتارىن ءبىزدىڭ ەلشىلىكتەر ارقىلى وتكىزە الاتىن بولىپتى. بارلىق راسىمدەر وتكىزىلىپ بولعاننان كەيىن, شاقىرتۋ العان ورالماننىڭ بۇرىنعىداي كۇتۋگە كەتەتىن ۋاقىتى ازايادى, ءبىز سول جاعدايلاردى دا زاڭمەن رەتتەۋدى ويلاستىردىق دەگەن اقپارات شەتتەن كەلگەن تۋىستاردىڭ كوڭىلدەرىنە جاققانداي. سونداي-اق ول ءبىز سىزدەردىڭ بارلىق ساۋالدارىڭىزعا جاۋاپ بەرۋگە ءازىرمىز, مينيسترلىكتىڭ بارلىق جاۋاپتى ادامدارى وسىندا وتىر. ءپىكىرلەرىڭىز وسىندا, ايتىلعان جەرىندە قالىپ قويمايتىنا, ونىڭ دىتتەگەن جەرىنە جەتەتىنىنە ۋادە بەرەمىن, قىسىلماي ەركىن ءاڭگىمەلەسەيىك دەپ قۇرىلتاي دەلەگاتتارىن اشىق اڭگىمەگە شاقىردى.
ءسويتىپ, بۇل جيىندا ورالمانداردىڭ ءۇي-جايمەن قامتاماسىز ەتىلۋى, ماماندىقتارى بويىنشا جۇمىسقا ورنالاسا الماۋ جاعدايلارى, ورىس ءتىلىن بىلمەۋىنە بايلانىستى كەدەرگىلەرگە كەزدەسۋى سىندى بۇرىننان ايتىلىپ جۇرگەن ماسەلەلەرمەن قاتار, كوپتەگەن ۇسىنىستار دا ورتاعا سالىندى. ءماسەلەن, يراننان كەلگەن اعايىن ءوزىنىڭ تەحنيكۋمدا ساباق بەرۋمەن بىرگە قۇس فەرماسى بارلىعىن, ال ەلگە كەلىپ, كاسىپكەرلىكپەن اينالىسۋعا قورقا سوعاتىنىن العا تارتتى. مىسالى, شەت ەلدە نەسيە الىپ, كاسىپورىن اشقان ادامعا 5 جىلعا دەيىن تولەم قايتارىلۋدىڭ شەگەرىلەتىنىن ايتقان ول ەلگە ورالساق وسىنداي جەڭىلدىكتەر بەرىلە مە دەگەن ساۋال تاستاسا, اۆستراليادان كەلگەن تۋىس: «ءبىز الىستا ەلدى اڭساپ جۇرەمىز. بىراق بىزگە ەلگە كەلىپ-كەتۋ قيىنعا سوعادى. ويتكەنى, الدىمىزدان ۆيزا ماسەلەسى شىعادى. نەگە ۇلتى قازاق ازامات ەلگە كەلۋگە قينالادى؟ وسى ماسەلەنى جەڭىلدەتۋگە بولماي ما دەپ وسىنداعى ءبىراز جۇرتتىڭ كوكەيىندەگى سۇراقتى العا تارتتى.
دوڭگەلەك ۇستەلگە قاتىسۋشىلار اڭگىمە سوڭىندا بىرنەشە تارماقتان تۇراتىن ۇسىنىم قابىلدادى.
انار تولەۋحانقىزى.