كەشە ءماجىلىس توراعاسى ورال مۇحامەدجانوۆتىڭ جەتەكشىلىگىمەن پالاتانىڭ كەزەكتى جالپى وتىرىسى بولىپ ءوتتى. دەپۋتاتتار كۇن تارىبىنە شىعارىلعان ون ەكى ماسەلەنى قارادى.
ەلىمىز بەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (تەحنيكالىق جانە كاسىپتىك ءبىلىم بەرۋدى جاڭعىرتۋ جوباسى) راتيفيكاتسيالاۋ تۋرالى زاڭ جوباسىن دەپۋتاتتارعا ءبىلىم جانە عىلىم ءمينيسترى باقىتجان جۇماعۇلوۆ تانىستىردى. كەلىسىمگە 2010 جىلدىڭ 24 قاراشاسىندا قول قويىلعان. ال جوبانىڭ ءوزى ءۇش قۇرامداس بولىكتەن تۇرادى. العاشقىسى ۇلتتىق جانە سالالىق بىلىكتىلىك شەكتەرىن قۇرۋ مەن 147 ماماندىق بويىنشا كاسىپتىك ستاندارتتارىن جاقسارتۋدى كوزدەيدى. ۇلتتىق, 14 سالالىق جانە 16 وڭىرلىك كەڭەستەرگە جۇمىس بەرۋشىلەردى قاتىستىرۋدى قامتاماسىز ەتۋ قاراستىرىلعان. وسى رەتتە وقۋ ورىندارى باسشىلارىنىڭ مەنەدجمەنتىن جاڭارتۋ تەحنولوگياسىنا وقىتۋ دا قولعا الىنارى بەلگىلى بولىپ وتىر.
تەحنيكالىق كاسىپتىك ءبىلىم بەرۋ وقۋ ورىندارىنىڭ ماتەريالدىق-تەحنيكالىق بازاسىن نىعايتۋ ءۇشىن 350 مىڭ اقش دوللارى بولاتىن 68 گرانت بولىنبەك. سونىمەن قاتار, 147 كاسىپتىك ءبىلىم بەرۋ ستاندارتتارى مەن 940 وقۋ باعدارلامالارىن جاڭارتۋ نازاردان تىس قالماعان. جوبانى تولىق جۇزەگە اسىرۋ قۇنى 33,2 ميلليون اقش دوللارىنا (4,9 ميلليارد تەڭگە) باعالانسا, سىرتقى قارىز ەسەبىنەن 24 ميلليون اقش دوللارى (4,4 ميلليارد تەڭگە) جانە رەسپۋبليكالىق بيۋدجەتتەن 4,2 ميلليون دوللار (597,8 ميلليون تەڭگە) قاراستىرىلىپتى. جوبانى جۇزەگە اسىرۋ 3 جىلعا جوسپارلانسا, قارىزدى وتەۋ 4 جىلدىق جەڭىلدىكپەن 15 جىلعا بەرىلىپتى. قارىزدىڭ ۇستەمەسى جىلدىق ەسەپپەن 1,5 پايىزدى قۇرايدى. ءمينيستردىڭ پايىمىنشا, اتالعان جوبانى جۇزەگە اسىرۋ ەڭبەك پەن ءبىلىم سالالارىن تىعىز بايلانىستىرۋعا مۇمكىندىك بەرەدى. جوبا كادرلار دايارلاۋدىڭ ءتيىمدى جۇيەسىن قۇرىپ قانا قويماي, ەكونوميكاعا قاجەتتى بىلىكتى ماماندارعا دەگەن سۇرانىستى قامتاماسىز ەتەدى. دەپۋتاتتار اتالعان زاڭ جوباسىن ءبىراۋىزدان ماقۇلدادى.
حالىقتىڭ كوشى-قونى تۋرالى زاڭ جوباسى جانە وعان ىلەسپە زاڭدىق قۇجات ەكىنشى وقىلىمدا ماقۇلداندى. زاڭ جوباسى ەلىمىزگە تۇراقتى تۇرۋ ءۇشىن كەلگەن ەتنوستىق قازاقتار مەن ولاردىڭ وتباسىلارى, شەتەلدەردەن كەلگەن وتانداستارىمىز بەن ولاردىڭ وتباسىلارىن, سونداي-اق ەكونوميكالىق بولاشاعى جوق جانە ەكولوگيالىق قولايسىز وڭىرلەردە تۇراتىن ازاماتتاردى وزگە جەرلەرگە ۇتىمدى قونىستاندىرۋدى, جايعاسۋعا جاردەمدەسۋدى جانە الەۋمەتتىك قولداۋدى قاراستىرادى. دەپۋتاتتار ب.تىلەۋحان, ن.ونەرباي, ا.سمايىل, ۋ.قاليجان جانە ن.سابيليانوۆ ۇسىنعان ورالماندار مەن ولاردىڭ وتباسىلارى قۇقىقتارىنا قاتىستى تۇزەتۋلەرگە ۇكىمەت وڭ قورىتىندىسىن بەرگەنى بەلگىلى بولدى. دەپۋتاتتار زاڭ جوباسىن ءبىراۋىزدان ماقۇلدادى.
سونداي-اق كەشەگى وتىرىستا قازاقستان ۇكىمەتى مەن رەسەي ۇكىمەتى اراسىنداعى «بايقوڭىر» كەشەنىن جالعا بەرۋ شارتىنا ءوزگەرىس ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسى دا قارالىپ, قولداۋ تاپتى. ەگەر سولتۇستىك كورشىمىزدىڭ عارىش ايلاعى پەرسونالدارى, قۇقىق قورعاۋ ورگاندارى مەن مەملەكەتتىك بيلىك قىزمەتكەرلەرى مەن ولاردىڭ وتباسى مۇشەلەرى «بايقوڭىردان» تىس جەردە اسكەري قىلمىستار مەن قۇقىق بۇزۋشىلىقتار جاساسا, ولارعا رەسەيدىڭ زاڭى نەگىزىندە جازا قولدانۋ قاراستىرىلعان.
كەشەگى جالپى وتىرىسقا شىعارىلعان جۇمىسپەن قامتۋ, قىلمىستىق ءىس جۇرگىزۋ, رۇقسات بەرۋ جۇيەسىن جەتىلدىرۋ جانە وزگە دە ماسەلەلەرگە قۇرىلعان زاڭ جوبالارىنىڭ بارلىعى دا قولداۋ تاۋىپ, ماقۇلدانعانىن ايتا كەتۋ كەرەك.
اسقار تۇراپباي ۇلى.