ت.رىسقۇلوۆ اتىنداعى №16 ورتا مەكتەپتە قازاقتىڭ ءبىرتۋار ارىسىنا ارنالعان مۋزەي اشىلدى
الماتى ىرگەسىندەگى تالعاردا باۋىرجان مومىش ۇلىنىڭ داڭققا بولەنگەن باتىرلىق جولى باستالعان, اسا كورنەكتى مەملەكەت قايراتكەرى تۇرار رىسقۇلوۆتىڭ كىندىك قانى تامعان. بۇرىن جاي عانا «بريگادا» اتالىپ جۇرگەن الاتاۋ بوكتەرىندەگى ارىستىڭ اۋىلىنا كەزىندە اسانباي اسقاروۆ تۇرار رىسقۇلوۆ اتىن بەرگىزىپ, وسى اتتاس كولحوز قۇرعىزعان كورىنەدى. جاقسىنىڭ سول شاراپاتىنىڭ سەپتىك-سەبەبىمەن كەيىن اۋىلداعى مەكتەپ تە جەرلەس اسىلدىڭ اتىن يەمدەنە, ۇلتجاندى ازاماتتاردىڭ ۇيىتقى بولۋىمەن تالعار قالاسىنداعى ەڭ ۇزىن كوشەگە ەلىم دەپ ەڭىرەپ وتكەن ەردىڭ ەسىمى بەرىلگەن-ءدى.
ەندى, مىنە, ءوز اتىنداعى مەكتەپتە زامانا تالابىنا ساي تالعاممەن جاساقتالعان تۇرار مۋزەيى سالتاناتپەن اشىلىپ جاتىر. بۇل مۋزەيدىڭ نەگىزى وسىدان شيرەك عاسىرداي بۇرىن قالانىپ, اۋەلى شاعىن بۇرىش بولىپ اشىلعان ەكەن. مەكتەپتىڭ سول كەزدەردەگى ديرەكتورلارى ءسانيا تۇرليەۆا, حانىم سولتانقۇلوۆالاردىڭ باسشىلىعىمەن ءبىرتالاي العاشقى ىزدەنىس جۇمىستارى جاسالىپ, رىسقۇلوۆ ۇرپاقتارىمەن بايلانىس ورناتىلىپ, كوپتەگەن جادىگەرلەر, قۇجاتتار سول كەزدەردە جيناقتالعان. بۇل يگى ىسكە ءوز ىقىلاستارىمەن مۇعالىم دۇيسەكە راقىمجان ۇلى, كىتاپحاناشى گۇلجان احمەتوۆا قۇلشىنا اتسالىسقان.
كوپتەگەن قۇندى ماتەريالدارمەن, جاڭا جادىگەرلەرمەن تولىقتىرىلعان, كىرسە شىققىسىز ەتىپ بەزەندىرىلگەن ۇلكەن بولمەدەگى كوز جاۋىن الار كوركەم مۋزەيدىڭ لەنتاسىن الاتاۋ اۋىلدىق وكرۋگىنىڭ اكىمى سەرىك يزيموۆ قيدى. اۋىل اقساقالى نۇراحمەت اتا مەن اۋىل يمامى كارىباي قاراباەۆ اق باتالى يماني تىلەكتەرىن قوستى. سوڭعى بەس جىل بويى مۋزەيدى وركەنيەت ولشەمىنە ساي جاساقتاۋ ورايىنداعى جۇمىستاردى اسقان تىڭعىلىقتىلىقپەن ىزەرلەگەن رىسجان بەكبوسىنوۆا العاشقى تانىستىرۋ ءراسىمىن جاسادى. جاڭا مۋزەي التى بولىمنەن تۇرادى. مۇندا تۇرار رىسقۇلوۆتىڭ ءومىر جولى ءھام قايراتكەرلىك قىزمەتى, سونداي-اق شىعارماشىلىق مۇراسى كەڭىنەن قامتىلىپتى. مادەنيەتتانۋشى مولديار سەرىكباەۆ, اباي اتىنداعى قازۇپۋ-دىڭ قازاقستان تاريحى كافەدراسىنىڭ مەڭگەرۋشىسى, تاريح عىلىمدارىنىڭ كانديداتى تالدىبەك نۇرپەيىسوۆ, رىسقۇلوۆتانۋشى عالىم وردالى قوڭىراتباەۆ مەكتەپ مۋزەيىنە جوعارى باعا بەردى. وسى ارادا وردالىنىڭ رىسقۇلوۆ ەڭبەكتەرىنىڭ 20 تومدىعىن دايىنداپ جاتقانىن, كينوگەر ەركىن راقىشەۆتىڭ ارداگەرىمىز تۋرالى دەرەكتى فيلم ءتۇسىرىپ جۇرگەنىن ەستىپ جانە قۋانىپ قالدىق.
«تۇركى تەكتەس تۇگەل بول!» دەپ وسيەت ايتقان تۇعىرى بيىك تۇرار مۋزەيىنىڭ اشىلۋ سالتاناتىنا وراي مەكتەپ وقۋشىلارى شاعىن كونتسەرتتىك قويىلىم ءازىرلەپتى. ساحنالىق كورىنىستەر سوناۋ ستاليندىك قۋعىن-سۇرگىن جىلدارىن, سول قيىندىقتا قايىسپاعان قايسار رۋحتى ەلەستەتكەندەي بولدى. ارۋاقتى ءبىر اۋناتقان تۇرار تۋرالى تولعاۋ, 85-تەگى ابىز اقىن ءادىباي تابىلديەۆتىڭ «ەر تۇراردىڭ ەلىمەن قوشتاسۋى», مەكتەپ مۇعالىمى ءۇمىت ابدىكەرىمقىزى جازعان تۇرار تۋرالى ءان ورىندالىپ, ۇلىلىق ۇلاعاتى ايعاقتالدى.
وسىناۋ يگى ءىستىڭ نەگىزگى ۇيىمداستىرۋشىسى مەكتەپ ديرەكتورى, اۋداندىق ءماسليحات دەپۋتاتى ماتان بەكبوسىنوۆ ەكەندىگىن ايتا كەتۋ ورىندى بولماق. بيىل ونىڭ باستاماسىمەن ۇلى وتان سوعىسىنا قاتىسۋشىلاردىڭ ەسىمدەرى تۇگەل ويىلىپ جازىلعان ءمارمار ەسكەرتكىش تۇرعىزىلىپ ەدى. ديرەكتوردىڭ ەندىگى ارمانى – مەكتەپ الدىنا رىسقۇلوۆتىڭ ەسكەرتكىش ءمۇسىنىن ورناتۋ.
قورعانبەك امانجول.