جاقىندا بوكستان قازاقستان قۇراماسى بەلگراد, الماتى, باكۋ جانە تاشكەنت قالالارىندا وتكەن ءتورت بىردەي حالىقارالىق تۋرنيرگە قاتىستى.
سەربيانىڭ استاناسى – بەلگرادتا وتكەن تۋرنيردە 81 كگ. دەيىنگى سالماقتا كۇش سىناسقان ازامات بەلگىباەۆ پەن 69 كگ. سالماقتاعى مانات ومىرزاقوۆ باس جۇلدەنى جەڭىپ الدى. ازامات جارتىلاي فينالدا الەمنىڭ ۇزدىك بوكسشىلارىنىڭ ءبىرى سانالاتىن 2009 جىلى ميلاندا وتكەن الەم چەمپيوناتىنىڭ كۇمىس جۇلدەگەرى, 2010 جىلعى گۋانچجوۋداعى ازيا ويىندارىنىڭ جەڭىمپازى وزبەك ديلشوت راسۋلوۆپەن كەزدەسىپ, ونى نوكاۋتقا جىبەردى. مانات ومىرزاقوۆ تا جارتىلاي فينالدا قارسىلاسىن وڭدىرماي ۇتتى. ال فينالدا قوس بوكسشىمىز ۆەنگريانىڭ وكىلدەرىنەن باسىم ءتۇستى. وسى تۋرنيردە جاستار اراسىنداعى ازيا چەمپيونى نۇربول قالجانوۆ (56 كگ.), چەحيادا وتكەن حالىقارالىق ءتۋرنيردىڭ جەڭىمپازى سامات باشەنوۆ (60 كگ.), بيىلعى ەل چەمپيوناتىنىڭ كۇمىس جۇلدەگەرى الماسبەك الىمبەكوۆ (64 كگ.) جانە اسا اۋىر سالماقتاعى رۇستەم ىرگەباەۆ جارتىلاي فينالدا قارسىلاستارىنان ۇتىلىپ, قولا جۇلدەنى قاناعات تۇتتى.
ودان كەيىن الماتىداعى جىل سايىن ۇلى وتان سوعىسىنىڭ ارداگەرى, كەڭەس وداعىنىڭ باتىرى, حالىق قاھارمانى ساعادات نۇرماعامبەتوۆ تۋرنيرىنە قاتىسقان بىلعارى قولعاپ شەبەرلەرىمىز 11 ەلدىڭ بوكسشىلارىمەن جۇدىرىقتاسىپ, 9 التىن جانە 4 كۇمىس مەدالدى يەلەندى. سولاردىڭ ىشىندە 52 كگ. سالماقتا كۇش سىناسقان تارازدىق ولجاس ساتتىباەۆتىڭ ونەرىنە الماتىداعى «دوستىق» سپورت كەشەنىنە جيىلعان جانكۇيەرلەر قول سوقتى. تارازدىق بوكسشى فينالدا ازامات ۇسەناليەۆپەن (قىرعىزستان) قولعاپ ءتۇيىستىردى. ونىڭ الدىندا ءۇندى حاريجان سانتوشتى جەڭگەن ولجاس قىرعىز بوكسشىسىن 15:12 ەسەبىمەن تىزە بۇكتىردى. ودان كەيىن تۋرنيردە ەڭ جەڭىل سالماقتاعى ءبىرجان جاقىپوۆ (49 كگ.), 56 كگ.-داعى الماس جاقىپوۆ, بەكمان سويلىباەۆ (60 كگ.), باتىرجان جۇكەنباەۆ (64 كگ.), سەرىك ساپيەۆ (69 كگ.), ادىلەت نيازىمبەتوۆ (81 كگ.) جانە اسا اۋىر سالماقتاعى يۆان دىچكو جەڭىمپاز اتاندى.
ءازىربايجاننىڭ باكۋ قالاسىندا بوكستان جاسوسپىرىمدەر اراسىندا وتكەن تۋرنيردە ءبىزدىڭ قۇراما 3 التىن, 2 كۇمىس جانە 3 قولا مەدالدى جەڭىپ الدى. وسى ەلدىڭ تۇڭعىش پرەزيدەنتى, كورنەكتى مەملەكەت قايراتكەرى گەيدار اليەۆ كۋبوگى ءۇشىن وتكەن باسەكەگە الىس-جاقىن شەتەلدەردەن كوپتەگەن كوماندالار قاتىستى. ولاردىڭ اراسىندا يرلانديا, شوتلانديا, تۇركيا, تاجىكستان, تۇركىمەنستان, وزبەكستان, ۋكراينا, گرۋزيا جانە ءبىزدىڭ ەلدەن بارعان بالعىن بوكسشىلار قولعاپ ءتۇيىستىرىپ, ءوز قۇرداستارى اراسىندا ەڭ مىقتىنى انىقتادى. بۇل سىندا قايىرگەلدى داۋىتبەك (63 كگ.), اقىلبەك ادىلعاليەۆ (66 كگ.), ديدار تولەگەن (80 كگ.-دان جوعارى) ءبىرىنشى ورىندى يەلەنسە, ولجاس قالاۋبەك (46 كگ.) پەن بەكجان قىبىتقاليەۆ (54 كگ.) كۇمىس مەدالدى, الماس شىنتەمىر ۇلى (50 كگ.), تىلەك قوزباقوۆ (80 كگ.) جانە ەلدوس قادىرباەۆ (80 كگ.-دان جوعارى) قولا جۇلدەنى يەلەندى.
داستان كەنجالين.