27 ساۋىردە قازاقستان پارلامەنتى سەناتىنىڭ توراعاسى قايرات ءمامي تۇركى تىلدەس ەلدەر پارلامەنتتىك اسسامبلەياسىنىڭ (تۇرك پا) استانادا ءوتىپ جاتقان ءىى جالپى وتىرىسى اياسىندا تۇرىك رەسپۋبليكاسى ۇلى ۇلتتىق جينالىسىنىڭ ءتوراعاسى مەحمەت الي شاحين باستاعان دەلەگاتسيامەن كەزدەستى, دەپ حابارلادى پارلامەنت سەناتىنىڭ ءباسپاسوز قىزمەتى.
ق.ءمامي قازاقستان مەن ءتۇركيا اراسىنداعى ەكىجاقتى قاتىناستاردى نىعايتۋداعى وسى ساپاردىڭ ماڭىزىن اتاپ ءوتىپ, تاريحي تامىرى ورتاق ەكى مەملەكەتتىڭ اراسىنداعى ستراتەگيالىق ءارىپتەستىكتىڭ قارقىندى دامىپ كەلە جاتقانىنا قاناعاتتانعاندىق ءبىلدىردى.
ق.ءمامي تۇركى الەمىندەگى ەكونوميكالىق, ساياسي جانە رۋحاني ىقپالداستىقتى تەرەڭدەتۋدەگى قازاقستان مەن تۇركيانىڭ ماڭىزدى ءرولىن اتاپ كورسەتتى. بيىلعى قازان ايىندا قازاقستاندا تۇركى تىلدەس مەملەكەتتەر ىنتىماقتاستىق كەڭەسىنىڭ (تۇركى كەڭەسى) العاشقى ءسامميتىن وتكىزۋ جوسپارلانۋدا.
– «ءبىزدىڭ ەلىمىز بۇل وقيعاعا ەرەكشە ءمان بەرىپ وتىر», – دەدى ق.ءمامي.
سەنات توراعاسى تۇرك پا قىزمەتىنە جان-جاقتى قولداۋ بىلدىرەتىنىن جانە قازاقستان باۋىرلاس حالىقتار اراسىنداعى بايلانىستاردى نىعايتۋ جونىندەگى ۋاعدالاستىقتاردى جۇزەگە اسىرۋدا بىرلەسكەن جۇمىستاردى جۇرگىزۋگە ءازىر ەكەنىن ايتتى. ول سونداي-اق تۇركسوي اياسىنداعى مادەني-گۋمانيتارلىق جوبالاردى ىسكە اسىرۋدىڭ كەلەشەگى زور ەكەنىن اتاپ ءوتتى.
بيىلعى 28-30 ماۋسىمدا استانادا يسلام كونفەرەنتسياسى ۇيىمى سىرتقى ىستەر مينيسترلەرى كەڭەسىنىڭ 38-سەسسياسى بولادى. توراعا ايتقانداي, قازاقستان يسلام كونفەرەنتسياسى ۇيىمىنا توراعالىق ەتۋ بارىسىندا حالىقارالىق جانە ايماقتىق قاۋىپسىزدىكتى نىعايتۋ, مادەنيەتارالىق جانە دىنارالىق ۇنقاتىسۋدى دامىتۋ جۇمىستارىن جالعاستىرادى.
تۇركيا ۇلى ۇلتتىق جينالىسىنىڭ توراعاسى پرەزيدەنت ن.نازارباەۆتىڭ باسشىلىعىمەن قازاقستان قول جەتكىزگەن تابىستاردى جوعارى باعالاي كەلىپ, ءبىزدىڭ ەلىمىزدىڭ ورتالىق ازيا ايماعىنداعى جەتەكشى ءرولىن اتاپ ءوتتى. م.ءشاحيننىڭ ايتۋىنشا, مەرزىمىنەن بۇرىن وتكەن پرەزيدەنتتىك سايلاۋ قورىتىندىسى ەلباسىنىڭ ساياساتى قازاقستان حالقىنىڭ باسىم قولداۋىنا يە ەكەندىگىن تاعى ءبىر كورسەتتى.
ق.ءمامي, سونداي-اق ءازىربايجان ميللي مەدجليسىنىڭ توراعاسى وكتاي اسادوۆپەن دە كەزدەستى.