27 ساۋىردە ەر-ريادتا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قايرات وماروۆ ساۋد ارابياسى كورولدىگىنىڭ سىرتقى ىستەر جونىندەگى مەملەكەتتىك ءمينيسترى نيزار مادانيمەن كەزدەستى. كەزدەسۋ بارىسىندا قازاقستان سىرتقى ىستەر ءمينيسترى ە.قازىحانوۆتىڭ 2011 جىلعى 28-30 ماۋسىمدا استانادا وتەتىن يسلام كونفەرەنتسياسى ۇيىمى سىرتقى ىستەر مينيسترلەرى كەڭەسىنىڭ 38-ءشى سەسسياسىنا قاتىسۋ ءۇشىن ساۋد ارابياسى سىرتقى ساياسات ۆەدومستۆوسىنىڭ باسشىسى ءامىر ساۋد ءال-فەيسالعا جولداعان رەسمي شاقىرۋى تابىس ەتىلدى, دەپ حابارلادى قر ءسىم-ءىنىڭ ءباسپاسوز قىزمەتى.
ق.وماروۆ جيىن بارىسىندا يسلام كونفەرەنتسياسى ۇيىمىنا توراعالىق لاۋازىمىن رەسمي تۇردە قابىلدايتىن قازاقستاننىڭ اتالمىش شاراعا ەرەكشە ءمان بەرىپ وتىرعانىن اتاپ ءوتتى. ساۋديا تاراپىنا باستى حالىقارالىق مۇسىلمان ۇيىمىنا قازاقستاننىڭ توراعالىعى كەزەڭىندەگى قىزمەتىنىڭ باسىم باعىتتارى تانىستىرىلدى. سونىمەن قاتار, ارنايى وكىل ساۋديا ديپلوماتىمەن يكۇ سىرتقى ىستەر مينيسترلەرىنىڭ استاناداعى كەزدەسۋى قارساڭىندا وتە ماڭىزدى بولىپ سانالاتىن تاقىرىپ – اراب الەمىندەگى سوڭعى وقيعالار اياسىنداعى حالىقارالىق جانە وڭىرلىك ساياساتقا قاتىستى وزەكتى ماسەلەلەر جونىندە كونسۋلتاتسيالار وتكىزدى.
ءوز كەزەگىندە مەملەكەتتىك مينيستر قازاقستاندىق ديپلوماتقا شاقىرۋ ءۇشىن العىس ايتىپ, الداعى يسلام كونفەرەنتسياسى ۇيىمى سىرتقى ىستەر مينيسترلەرى كەڭەسىنىڭ 38-ءشى سەسسياسىنا كورولدىكتەن جوعارى دەڭگەيدە دەلەگاتسيا قاتىساتىندىعىنا جانە اتالمىش ۇيىمنىڭ توراعاسى لاۋازىمىنداعى قازاقستاننىڭ بارلىق باستامالارىنا قولداۋ بىلدىرەتىندىگىنە, سونىمەن قاتار, استانا فورۋمىن وتكىزۋ ءۇشىن ۇيىمداستىرۋ جانە تەحنيكالىق كومەك كورسەتەتىندىگىنە سەندىردى. نيزار ماداني قازاقستاننىڭ حالىقارالىق بەدەلىنىڭ, ونىڭ بىلگىر دە ساۋاتتى سىرتقى ساياساتىنىڭ, سونداي-اق ەۋروپاداعى قاۋىپسىزدىك جانە ىنتىماقتاستىق ۇيىمى سياقتى ءىرى حالىقارالىق قۇرىلىمداردى باسقارۋداعى باي ءتاجىريبەسىنىڭ ارقاسىندا اتالمىش ءىس-شارا تابىستى جانە جەمىستى وتەتىنىنە سەنىم ءبىلدىردى.