اقوردادا استانا قالاسىندا وتەتىن شانحاي ىنتىماقتاستىق ۇيىمىنا (شىۇ) مۇشە مەملەكەتتەر قاۋىپسىزدىك كەڭەستەرى حاتشىلارىنىڭ 6-شى كەزدەسۋى اياسىندا پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى مارات ءتاجين قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى – قوعامدىق قاۋىپسىزدىك ءمينيسترى مەن تسزيانچجۋمەن كەزدەستى.
«ەكى مەملەكەت باسشىلارى اراسىنداعى بايلانىس, مينيسترلىكارالىق جانە ۆەدومستۆوارالىق ۇنقاتىسۋ, قازاقستان مەن قىتاي اراسىنداعى ەكونوميكالىق ىنتىماقتاستىق بۇگىندە ءوسۋ بيىگىندە. بيىلعى جىلدىڭ اقپان ايىندا قازاقستان پرەزيدەنتى قىتايعا رەسمي ساپارمەن بارعان ەدى. بۇل كەزدەسۋ بارىسىندا ەكىجاقتى ءارىپتەستىكتىڭ سان قىرلى تۇستارى توڭىرەگىندە كەلىسسوزدەر جۇرگەن بولاتىن», دەدى م. ءتاجين. ول ءوز سوزىندە وسى جىلدىڭ ماۋسىم ايىندا قحر توراعاسى حۋ تسزينتاونىڭ دا قازاقستانعا ارنايى ساپارى كوزدەلىپ وتىرعانىن ايتا كەلە, بۇل ساپار قوس مەملەكەتتىڭ ستراتەگياارالىق بايلانىسىن نىعايتا تۇسەدى دەگەن سەنىمىن جەتكىزدى. «ءسىز استاناعا كەلگەن ساپارىڭىزدا سونداي-اق قازاقستاننىڭ ىشكى ىستەر مينيسترلىگىمەن ناتيجەلى كەلىسسوز جۇرگىزگەنىڭىزدى بىلەمىز. ەلىمىزدىڭ پرەمەر-مينيسترىمەن دە كەزدەسۋ وتكىزدىڭىز. وسى ورايدا, مەن ءوزارا ارىپتەستىك بايلانىسىمىزدىڭ كەيبىر ماڭىزدى تۇستارىن تالقىلاۋعا ءمۇمكىندىك العانىمىز ءۇشىن دە العىس ايتامىن», دەدى قاۋىپسىزدىك كەڭەسىنىڭ حاتشىسى.
مەن تسزيانچجۋ ءوز كەزەگىندە ارىپتەسىنىڭ سوزىمەن كەلىسەتىنىن, بۇل ەكى ەل بايلانىسىنداعى ءوسۋ ىرعاعىنىڭ بەلگىسى ەكەنىن جەتكىزدى. «بۇگىندە قازاقستان-قىتاي ىنتىماقتاستىعى جوعارى دەڭگەيدە دامىپ كەلەدى. قازاقستان باسشىسىنىڭ ءبىزدىڭ ەلىمىزگە ساپارى ناتيجەسىندە قوس تاراپتىڭ قاتىسۋىمەن كوپتەگەن كەلىسىمگە قول قويىلدى. بۇلاردىڭ بارلىعى ەكىجاقتى قارىم-قاتىناسقا تىڭ سەرپىن بەرەدى دەپ ويلايمىن», – دەدى قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى – قوعامدىق قاۋىپسىزدىك ءمينيسترى ءوز سوزىندە.
تاراپتار وڭىرلىك قاۋىپسىزدىكتىڭ وزەكتى ماسەلەلەرى جونىندە دە پىكىر الماسىپ, ورتاق مۇددەنى كوزدەيتىن باعىتتار بويىنشا ەكى جانە كوپجاقتى ءىس-قيمىلدى تەرەڭدەتۋگە نيەت ءبىلدىردى. ماسەلەن, شىۇ اياسىندا ساياسي, ەكونوميكالىق جانە گۋمانيتارلىق ىنتىماقتاستىقتى كەڭەيتۋ قاجەتتىگى ايتىلدى. شىۇ-نىڭ وڭىرلىك تەرروريزمگە قارسى قۇرىلىمىنىڭ تەرروريزمگە, سەپاراتيزمگە جانە ەكسترەميزمگە قارسى ارەكەت ەتۋ مىندەتتەرىن شەشۋدەگى ءرولى دە نازاردان تىس قالمادى. ەسىرتكىنىڭ زاڭسىز اينالىمىمەن كۇرەس ءجونىندە بىرلەسە كۇش-جىگەر جۇمساۋدىڭ ماڭىزدىلىعى دا تىلگە تيەك ەتىلدى.
كەزدەسۋ سوڭىندا بيىلعى جىلدىڭ 15 ماۋسىمىندا استانادا وتەتىن شىۇ سامميتىنە دايىندىق ماسەلەلەرى تالقىلاندى.
ءلايلا ەدىلقىزى.