ۇلىبريتانيا قارۋلى كۇشتەرىنىڭ گەنەرال-مايورى ءوز ەلى اۆياتسياسىنىڭ سوڭعى كۇندەرى ليۆيا اسپانىنداعى ءىس-قيمىلدارى تۋرالى ەسەپ بەردى. ۇشاقتار نەگىزىنەن ەل ورتالىعىنداعى ميسۋراتى اۋدانى توڭىرەگىنە نازار اۋدارعان.
رەسەي پرەزيدەنتى د.مەدۆەدەۆ پەن ۋكراينا پرەزيدەنتى ۆ.يانۋكوۆيچ چەرنوبىل اەس-ىندەگى اپاتتىڭ زاردابىن جويۋشىلارعا ەسكەرتكىشتىڭ العاشقى تاسىن قالادى. مونۋمەنت شاھارداعى ساياباققا ورناتىلماق.
قىتاي باق-تارى ەلدە جاسالعان J-15 Flying Shark پالۋبالىق جويعىش ۇشاعىنىڭ العاشقى سۋرەتىن جاريالادى. ونى سىناقتان وتكىزۋ ۇستىمىزدەگى جىلدىڭ اياعىنا بەلگىلەنىپ وتىرعان كورىنەدى.
رەسەيدىڭ ۆولگوگراد قالاسىندا ەكى جارىلىس جاسالدى. بىرەۋى ءىىم زاڭ اكادەمياسىنىڭ ماڭىنداعى اۆتوتۇراقتا, ەكىنشىسى جول پوليتسياسى عيماراتىنىڭ جانىندا جاسالعان. جارالانعاندار بار بولعانىمەن, قازا تاپقاندار جوق سياقتى.
«بالتيا» پورتالىنىڭ (لاتۆيا ورىس قاۋىمىنىڭ پورتالى) باس رەداكتورى سەرگەي مالاحوۆسكي ەستونيا اۋماعىنا كىرگەنىمەن, كوپ كەشىكپەي شىعارىپ جىبەرىلدى. ول ەل اۋماعىنا كىرۋگە تىيىم سالىنعاندار تىزىمىندە ەكەن.
ۋكراينانىڭ سۋما وبلىسىنداعى بۋرىن سەلوسىندا بەلگىسىز بىرەۋلەر تەمىر-بەتوننان قۇيىلعان ۆ.لەنيننىڭ ەسكەرتكىشىن جەرگە قۇلاتىپ, كەڭەس كوسەمىنىڭ «باسىن العان». جالپى, ۋكراينادا لەنين مەن ستالين ەسكەرتكىشتەرى ءجيى-ءجيى «شابۋىلعا» ۇشىراپ تۇرادى.
سۇراۋ سالىنعان مىسىرلىقتاردىڭ 62 پايىزى ەلدە شاريات نورمالارىنا نەگىزدەلگەن زاڭدار ەنگىزىلۋىنە قولداۋ بىلدىرگەن. تاعى 27 پايىزى ەل زاڭدارى مۇسىلمان ءدىنىنىڭ جالپى قاعيداتتارىنا باعدارلانۋى ءتيىس دەپ ەسەپتەيدى ەكەن.
تۇركيادا ارمياندار مەن ءتۇرىكتەردىڭ دوستىعىن بىلدىرەتىن ەسكەرتكىشتى بۇزۋ ۇدەرىسى باستالدى. ارمەنيا شەكاراسىنان 40 شاقىرىم جەردەگى كارس قالاسىندا ورناتىلعان مونۋمەنتتى تولىقتاي بۇزۋ 10 كۇنگە سوزىلماق كورىنەدى.
پاكستاندا سوڭعى ەكى كۇندە جولاۋشىلار اۆتوبۋسىنا ءۇش مارتە شابۋىل جاسالدى. العاشقى شابۋىل كەزىندە 15 ادام كوز جۇمسا, ارالارىندا كوپتەگەن ءايەلدەر مەن بالالار بار ەكەن. سوڭعى ەكى شابۋىلدان ءۇش ادام وپات بولسا, 30-دان استامى جارالانعان.
اۋعانستاننىڭ قانداعار قالاسىنداعى تۇرمەدەن قاشقان 500-گە جۋىق تۇتقىننىڭ شامامەن 65-ءى ۇستالعان. قاشقىنداردىڭ 100 شاقتىسى دالا كومانديرلەرى كورىنەدى. بۇل سوڭعى ءۇش جىلداعى وسىنداي ەكىنشى جاپپاي قاشۋ بولىپ تابىلادى.
كينواكتەر جانە كاليفورنيا شتاتىنىڭ بۇرىنعى گۋبەرناتورى ارنولد شۆارتسەنەگگەردىڭ اقش پرەزيدەنتتىگىنە ءتۇسۋىم مۇمكىن دەگەن شامشىل نيەتىن ەستىگەن ەۋروپارلامەنت دەپۋتاتتارى ونى كۇلكىگە اينالدىردى.
ينتەرنەت ماتەريالدارى نەگىزىندە ازىرلەندى.