باتىس ەۋروپادا «Mamer» دەگەن اتپەن تانىمال بولعان قازاق جىگىتى تۋرالى ءبىز جارىتىپ ەشتەڭە بىلمەيدى ەكەنبىز. ونىڭ باستى سەبەبى, بۇل جىگىتتىڭ ءوز وتانىندا تۋىپ-وسپەگەندىگى, وسى كەزدە دە قازاقستاندا تۇرمايتىندىعى. قالىڭ حانزۋدىڭ ورتاسىندا ءان سالىپ ءجۇرىپ, 2009 جىلى بىردەن ءان تاسپاسى باتىس ەۋروپاعا تاراعاندا, ول وتىزدىڭ ۇستىنە جاڭا شىققان ەدى. ءيا, انشىلىك ونەرىمەن تالايدى تاڭقالدىرعان مامىرجان رايىسحان ۇلى قىتايدىڭ شىڭجاڭ ۇيعىر-اۆتونوميالىق رايونىنىڭ تۋماسى. ءۇرىمشى قالاسىنان 300 كم جەردەگى شاعىن اۋىلدا, قاراپايىم قازاق وتباسىندا جارىق دۇنيە ەسىگىن اشقان. ول ءانشى بولۋدى بالا كەزىنەن ارمانداپ, اكەسى رايىسحاننان دومبىرا ۇيرەنەدى. تەك دومبىرا عانا ەمەس, گيتارا, شەرتەر سىندى اسپاپتاردى جاقسى مەڭگەرىپ, ءوسپىرىم شاعىنان ءان ايتا باستايدى. ءبىز مامىرجان تۋرالى مالىمەت ىزدەستىرۋ بارىسىندا ونىڭ ينتەرنەتتەگى مەكەن-جايىن تاۋىپ (www.myspace.com/mamermusic1.) ءبىراز جايلارعا قانىققانداي بولدىق. ول: «ءبىز ءبىر اتا-انادان اعايىندى ونبىز. باۋىرلارىمنىڭ ءبارى دە دومبىرا تارتىپ, كىشىگىرىم جيىن-تويلاردا ءان شىرقاي بەرەدى. سونىڭ ىشىندە مەنىڭ مۋزىكاعا قۇشتارلىعىم الابوتەن ەدى. ۇيرەنەم دەگەن اسپاپتاردىڭ ءبارىن ساتىپ اپەرگەن, ۇيگە انشىلەردى ءجيى-ءجيى قوناق ەتكەن اتا-اناما العىسىم شەكسىز. ولار مەنىڭ ءنومىرى ءبىرىنشى تىڭداۋشىلارىم جانە سىنشىلارىم», دەپ جازادى.
مامىرجاننىڭ ونەردەگى جولىن تاقتايداي ءتۇزۋ, داڭعىل دەپ ايتۋعا استە بولمايدى. بوزبالا شاعىندا ارقاسۇيەر ەشكىم تاپپاي, ءۇرىمشىنىڭ كافە-رەستوراندارىن جاعالاپ ءان ايتادى. ونىڭ ۇستىنە مايكل دجەكسوننان باستاپ مەتالليكيگە دەيىنگى پوپ ءانشىلەرگە ەلىكتەپ, اعىلشىنشا روك, پوپ اندەردى شىرقاپ, تىڭدارماننىڭ سەزىمىن جاۋلاپ الۋدى كوزدەۋى دە جاستىقتىڭ جەلىگى دەپ باعالانادى. بىراق, بەتى قايتقان بوزبالا جوق. «وسىدان الەمدى اۋزىما قاراتپاسام با؟» دەگەن نيەتپەن 20 جاسىندا تۋىپ-وسكەن ميچيگانىنان ەشبىر تانىسى جوق, شۋلى-دۋلى نيۋ-يورككە ءبىر عانا سومكەسىمەن جول تارتقان مادونناعا ۇقساپ مامىرجانىڭىز دا 20-نى ەڭسەرىپ بارىپ بەيجىڭگە ات باسىن تىرەيدى. بۇل 2000 جىلدىڭ باسى ەدى. مۇندا ازۋلى بەيجىڭنىڭ كانىگى پايداكۇنەمدەرى مامىرجانعا قىتايشا ءان سالسا, جولى اشىلاتىنىن, تابىسى مولاياتىنىن ءتۇسىندىرىپ-اق باعادى. بىراق جۇرەك قالاۋى بولماعان سوڭ, تابىسىڭ دا, جول-پ ۇلىڭ دا ونشا قىزىقتىرا قويمايدى. بۇل تۋرالى ءانشىنىڭ ءوزى: «ۇرىمشىدە مۋزىكانتتار ساۋىق ءۇشىن, پايدا تابۋ ءۇشىن ءان سالسا, بەيجىڭدە ءوزىڭدى تانىتۋعا دەگەن قۇشتارلىق ويانىپ, ءانىڭ ارقىلى ىلگەرىلەي بەرۋدى ماقسات ەتەسىڭ. بەيجىڭدە كاسىبي ءانشى رەتىندە قازاقتىڭ ۇلتتىق ءان-كۇيلەرىنە جاڭاشا لەپ بەرۋ ارقىلى شىعارماشىلىعىمدى دامىتتىم, جاڭا دوستار تاپتىم, كوپتەن بەرى ويىمدا ءجۇرگەن «ءىز» توبىن قۇردىم. ءبىر قىزىعى, ەڭ العاش توپ 2003 جىلى قۇرىلعاندا مۇشەلەرى كىلەڭ حانزۋ مۋزىكانتتارى ەدى. ولارعا قازاق ءاندەرىن, دومبىرادا ويناۋعا ۇيرەتۋ ءۇشىن كوپ كۇش-جىگەر جۇمسادىم. ناتيجەسىندە تانىمالدىعىمىز ارتتى. بىراق قازىرگى تاڭدا توبىمىزدىڭ مۇشەلەرى وزگەردى, ەسكى مۇشەلەرىنەن ءبىر عانا چجەن دۋ اتتى بارابانشى قالدى. «قىتايشا ءان سال» دەپ باستاپقىدا ايتىلعان ۇسىنىستار ءالى دە ايتىلىپ كەلەدى. بىراق جۇرەگىم قالامايدى», دەيدى.
سونىمەن مامىرجاننىڭ ەسىمى الەمدى قالاي جاۋلاپ الدى دەگەنگە كەلەيىك. ول 2008 جىلى بەيجىڭدە تانىمال پروديۋسەر روبين حاللەردى كەزدەستىرەدى. جىگىتتىڭ بويىنداعى جاستىق جالىن مەن داۋىسىنىڭ ادەمىلىگى ءارى ءان بىتكەننىڭ بايىرعى تابيعاتىن جوعالتپاي, ونى وسى زامانمەن ۇشتاستىرا ورىندايتىنى پروديۋسەردى قىزىقتىرىپ, ناتيجەسىندە لوندوننىڭ الەمگە ايگىلى «Real World Records» كومپانياسىنان العاشقى CD البومى جارىق كورەدى. بۇل دۇنيەجۇزىنىڭ تۇكپىر-تۇكپىرىندەگى دارىندى جاستاردىڭ عانا البومىن جازۋعا مۇمكىندىك بەرەتىن بىردەن-ءبىر كومپانيا بولىپ ەسەپتەلەدى. سوندىقتان ودان شىققان اندەردىڭ باعى جانىپ, تورتكۇل دۇنيەنى ارالاپ كەتەتىنى بار. رايىسحاننىڭ ۇلىنىڭ دا «Eagle» («بۇركىت») دەگەن اتپەن شىققان ءان البومىنىڭ باتىس ەۋروپاعا بىردەن جول تارتقانى – سونىڭ ايعاعى. البوم تۋرالى العاشقى جىلى لەبىزدەردىڭ ءبىرىن كانادانىڭ «National post» گازەتىنىڭ ءتىلشىسى ايتتى. «البومنىڭ اسەرى وتە كۇشتى. ءانشىنىڭ ءوزى قۇددى سۋرەتشى. ول ءان ارقىلى سۋرەت سالاتىنداي, تابيعاتتىڭ سۇلۋلىعى كوز الدىڭا ورناي قالادى». «بۇركىت» ءان البومىن ومىرگە الىپ كەلگەن كومپانيانىڭ نەگىزىن قالاۋشى پيتەر گابريەل: «مامەردىڭ كومپوزيتسياسىن تىلمەن ايتىپ جەتكىزۋ قيىن, وندا قۇدىرەتتى سيقىر بار», دەپتى. ءيا, ونىڭ قۇدىرەتتى ءارى سيقىرلى بولۋىنىڭ سەبەبىن ءبىر كەزدەگى كوشپەلى تىرلىكپەن عۇمىر وتكىزگەن قازاق رۋحىنىڭ ەركىندىگىنەن ىزدەگەن ءجون شىعار. ويتكەنى جيناققا «قارعاش-اي», «ەلىگايدان» باستاپ تۇگەلگە جۋىق حالىق اندەرى كىرگەن. تاعى ءبىر جاڭالىعى, البومداعى ەكى ءاندى مامىرجان جانە ونىڭ «ءىز» توبى شەتەلدىك تانىمال انشىلەر بەلا فلەكپەن جانە 2008 جىلى ومىردەن وزعان ەكتور زازۋمەن بىرگە ورىنداپتى.
ءسوز سوڭىندا ايتارىمىز, مامىرجان رايىسحان ۇلى قازىر دە 1,3 ميللياردتان استام حالقى بار, حالىق سانى جونىنەن الەمدەگى ەڭ ءبىرىنشى قالا بوپ ەسەپتەلەتىن, سوندىقتان مىڭنان تۇلپارلاردىڭ عانا ونەر اسپانىندا جۇلدىزىن جاعاتىن قاتال بەيجىڭدە تۇرادى, سوندا جۇمىس ىستەيدى. قازاق جىگىتىنىڭ باعىندىرار بيىگى ءالى دە الدا دەگەن ۇمىتتەمىز.
ايگۇل سەيىلوۆا.