اتىراۋ جۇرتشىلىعى ايتىپ كەلمەيتىن اپاتتىڭ زاردابى قانداي بولارىن جاقسى بىلەدى. ءوڭىردە 1993 جىلعى كوكتەمدە قىزىلقوعا, جىلىوي اۋداندارى سۋ تاسقىنىنان قاتتى زارداپ شەكتى. سول كەزدە ەلىمىزدىڭ ءار تۇكپىرىنەن كومەك كەلدى. ەندى سونداي اپاتتىڭ زاردابىن كورشىلەس باتىس قازاقستان وبلىسىنداعى اعايىننىڭ كورۋى بارشانى قينالتۋدا. مۇندايدا قانداي كومەك تە ارتىق ەتپەيدى.
ءار مەكەمە ۇجىمى, ءار وتباسى كومەك قولىن سوزعىسى كەلەدى. اتىراۋ وبلىسىنىڭ سۋديالارى ءبىر كۇندىك جالاقىلارىن, ياعني 750 000 مىڭ تەڭگەنى باتىس قازاقستان وبلىسىندا اشىلعان قايىرىمدىلىق قورىنا اۋداردى. ال وبلىستىق ءماسليحات دەپۋتاتتارى كەزەكتەن تىس سەسسيادا باتىسقازاقستاندىقتارعا 100 ميلليون تەڭگە كولەمىندە قارجىلاي كومەك كورسەتۋ جونىندەگى ۇسىنىستى قۋاتتادى. سەسسياعا قاتىسقان وبلىس اكىمىنىڭ ءبىرىنشى ورىنباسارى بولات ءداۋكەنوۆتىڭ ايتۋىنشا, اتىراۋ وبلىسى تەك قارجىلاي قولداۋ بەرۋمەن شەكتەلىپ قالمايدى. بۇعان قوسا باتىس قازاقستان وبلىسىنا قۇرىلىس ماتەريالدارى, جانار-جاعارماي جىبەرىلەدى.
جولداسبەك شوپەعۇل.
اتىراۋ وبلىسى.