كوپشىلىك قاۋىمنىڭ پىكىرىنشە, جاسامپازدىقتىڭ ەڭ باستى بەينەسى تازالىق پەن رەتتىلىكتە اناعۇرلىم شىنايى, اناعۇرلىم جاراسىمدى كورىنەدى. كوزگە سۇيكىمدى كورىنەتىن سول ءبىر جاسامپازدىق استاناعا لايىقتاپ ايتىلعانداي دەسەك, ەشكىمنىڭ دە تالاسى بولا قويماس. سول ءۇشىن دە ەلوردالىق تۇرعىندار قاشاندا بولماسىن باس قالامىزدىڭ تازالىعىنا ايرىقشا كوڭىل بولەدى. وتكەن اپتانىڭ سوڭىندا بولعان جالپىقالالىق سەنبىلىك تە بۇل ايتقاندارىمىزعا تولىق دالەل بولا الادى.
سەنبىلىككە ەلوردالىق تۇرعىنداردىڭ ءبارى بەلسەندى قاتىستى. پرەزيدەنت اكىمشىلىگى, «نۇر وتان» حدپ, پرەمەر-مينيستر كەڭسەسى, پارلامەنت سەناتى مەن ءماجىلىسى دەپۋتاتتارى, استانا قالاسىنىڭ اكىمدىگى باستاعان بارلىق مەملەكەتتىك ورگاندار, جاۋاپكەرشىلىگى شەكتەۋلى سەرىكتەستىكتەر, بارلىق ساۋدا-ورىندارىنىڭ قىزمەتكەرلەرى قالانى اباتتاندىرۋ, كوگالداندىرۋ جانە سانيتارلىق تازالاۋ جۇمىستارىن ءبىر كىسىدەي اتقارىپ شىقتى. سەنبى كۇنى ەلوردا بۇرىنعىسىنان دا وزگەشە بەينەگە ەنىپ, قالانىڭ بەلسەندى قوزعالىس ىرعاعى الدەقايدا جىلدام جۇرە باستادى.
سەنبىلىكتىڭ ۇيىمداستىرىلۋى ەل تاۋەلسىزدىگىنىڭ 20 جىلدىعىنا جانە بۇۇ-نىڭ باس اسسامبلەياسى بەكىتكەن بۇكىلالەمدىك جەر كۇنىنە تىكەلەي بايلانىستى. «جاسىل جاپىراق – زەليونىي ليست» اكتسياسىنىڭ اياسىندا وتكەن سەنبىلىكتىڭ رەسپۋبليكانىڭ بارلىق ايماقتارىندا وتكىزىلۋىنىڭ دە وزىندىك ءمانى بار.
استانانىڭ تازالىعىن عانا ەمەس, ونىڭ كوگالداندىرۋ جۇمىسىنىڭ دا ورنى وزگەشە. سول ءۇشىن دە جىلداعىداي بيىل دا اعاش وتىرعىزۋ ءداستۇرى ءوز جالعاسىن تاپتى. ماسەلەن, قالانىڭ سارايشىق كوشەسىندە پرەزيدەنت اكىمشىلىگى, «نۇر وتان» حدپ, پرەمەر-مينيستر كەڭسەسى, قورشاعان ورتانى قورعاۋ مينيسترلىگىنىڭ وكىلدەرى, كۇيشى دينا جانە №39 كوشەلەردە شەتەل مەملەكەتتەرى ەلشىلىكتەرىنىڭ ديپلوماتتارى, «اراي» ساياباعىندا – جوعارعى سوت مۇشەلەرى, «ءبايتەرەك» مونۋمەنتىنىڭ الدىندا – باس پروكۋراتۋرانىڭ قىزمەتكەرلەرى كوشەتتەر وتىرعىزىپ, ءار اۋماقتىڭ تازالىعىنا وزدەرىنشە ۇلەس قوستى.
ال استانا قالاسىنىڭ اكىمدىگى بولسا بيىلعى تازالاۋ مەن اباتتاندىرۋ جۇمىستارىن قالانىڭ شەت اۋداندارىنداعى ايماقتاردان باستادى. سەنبىلىك پەن ايلىق شەڭبەرىندە وتىرعىزۋعا دايىندالعان 4307 اعاش پەن 25 مىڭ بۇتالاردىڭ باسىم بولىگىن كوكتال-1, كوكتال-2 ساياباقتارى مەن اللەيالارىندا جانە باسقا دا قالا ورتالىعىنان تىسقارى جاتقان اۋدانداردا ەگۋ جوسپارلانىپ وتىر. قالانى اباتتاندىرۋعا شاعىن جانە ورتا بيزنەس سۋبەكتىلەرى قىزمەتكەرلەرى بەلسەندى قاتىسىپ, استانا قالاسى اكىمدىگىنىڭ 30 ءساۋىر كۇنى جاسىل جەلەك ەگۋ ءجونىندەگى ۇندەۋىنە قولداۋ كورسەتۋى بيىلعى جىلدىڭ باستى جاڭالىعى بولدى. وسى ماقساتتا «استانا-كوگالداندىرۋ» اق 2240 كوشەت دايىنداپ قويدى.
بيىلعى ەلورداداعى سەنبىلىككە 80 مىڭنان استام ادام شىقسا, 300-دەن اسا كولىك پەن وزگە دە ارنايى تەحنيكالار جۇمىلدىرىلدى. بيىلعى تازالىق ايلىعىندا 190 لاس ورىن مەن 1285 تەكشە مەتر قوقىس شىعارىلىپ, جيىلعان ءۇيىندى تولىعىمەن جويىلۋى ءتيىس.
«الداعى 3-4 جىل ىشىندە ەلوردا حالقى 1 ميلليوندىق مەجەگە جەتىپ قالۋى ىقتيمال. ءبىزدىڭ ەلدە ىشكى ميگراتسيا وتە بەلسەندى جۇرۋدە. جىل سايىن قالامىزدا 50 مىڭعا جۋىق ادام تۇراقتى تىركەلەدى. بۇگىنگى تاڭدا ەلوردادا 800 مىڭنان استام تۇرعىن بار. بۇل ماسەلە ءبىزدىڭ كوڭىلىمىزدى قالاداعى, ءبىرىنشى كەزەكتە, الەۋمەتتىك نىسان قۇرىلىستارىنا ۇلكەن ءمان بەرۋ قاجەتتىگىنە اۋدارتادى. بىلتىرعى جىلدىڭ وزىندە استاناعا 3 مىڭنان استام مەكتەپ جاسىنداعى بالالار كەلگەن. سول ءۇشىن دە مەكتەپ پەن بالاباقشالاردىڭ ماسەلەلەرى بارىنەن دە بۇرىن تۇرۋى ءتيىس. ال 2020 جىلعا دەيىن قالادا 38 مەكتەپ سالىنۋى ءتيىس. وسى باعدارلاما شەڭبەرىندە ءبىز جۇمىس جاساپ كەلەمىز. ەلوردادا ءۇش اۋسىممەن وقيتىن مەكتەپەر ءالى دە بولسا بار. ەكى-ءۇش جىل ىشىندە بۇل ماسەلەنىڭ دە باسى اشىلۋعا ءتيىس», – دەدى ي. تاسماعامبەتوۆ جۋرناليستەرگە بەرگەن سۇحباتىندا.
اراي ۇيرەنىشبەكقىزى.
جۇلدىز ءبايدىلدا.
-----------------------------
سۋرەتتەردى تۇسىرگەن ورىنباي بالمۇرات.