...سەناتورلار ماقاتقا كەلدى
اۋىلداعى تۇرعىننىڭ ءبارى بىردەي ەلىمىزدە قابىلدانىپ جاتقان زاڭدارمەن جەتە تانىس ەمەس. وسى ماسەلە ءماجىلىس نە سەنات دەپۋتاتتارىنىڭ ءوڭىرلەردەگى كەزدەسۋىندە كەڭىرەك ەسكەرىلسە دەيسىڭ. ايتقانداي, كەشە سەناتتىڭ بيۋدجەت جانە قارجى كوميتەتىنىڭ توراعاسى قايرات يششانوۆ پەن سەناتور ءسارسەنباي ەڭسەگەنوۆ ماقات اۋدانىنا ارنايى اتباسىن بۇردى. اۋدان جۇرتشىلىعىمەن كەزدەسۋدە سەناتورلار ەلىمىزدەگى زاڭ شىعارۋ ماسەلەسىنە, ءاسىرەسە, سىبايلاس جەمقورلىقپەن كۇرەستىڭ ءپارمەندىلىگى ارتقانىنا توقتالدى. ال اۋدان اكىمى قيلىمعالي قاينەنوۆ قولعا الىنعان جۇمىستاردىڭ بارىسىنا شولۋ جاسادى.
سىبايلاس جەمقورلىقپەن كۇرەس بۇكىل قوعامدى الاڭداتسا, اۋدان تۇرعىندارىن وسىنداعى اۆتوكولىك جولدارىنىڭ جوندەلمەۋى, سونداي-اق, جۇمىسسىزدىق ءماسەلەسىنىڭ ءتۇپكىلىكتى شەشىم تاپپاعانى تولعاندىرادى.
جولداسبەك شوپەعۇل.
اتىراۋ وبلىسى.
* * *
...قارتتارعا قامقورلىق كورسەتىلدى
قىزىلوردا قالاسىنداعى «زەينەتكەرلەر مەن مۇگەدەكتەرگە ارنالعان الەۋمەتتىك قىزمەت كورسەتۋ ورتالىعى» جانىنان 10 ورىندىق جانە «قارتتار مەن مۇگەدەكتەرگە ارنالعان ينتەرنات-ءۇيى» جانىنان 40 ورىندىق كۇندىزگى ءبولىم اشىلدى. اتالمىش شارانىڭ اشىلۋ سالتاناتىنا وبلىس اكىمىنىڭ مىندەتىن اتقارۋشى ماديار الدوڭعاروۆ, وبلىستىق جانە قالالىق ارداگەرلەر كەڭەسىنىڭ توراعالارى س.شاۋحامانوۆ پەن ا.ابىلداەۆ قاتىستى.
«قارتتار مەن مۇگەدەكتەرگە ارنالعان ينتەرنات-ءۇيى» وسىعان دەيىن 180 ادامعا قىزمەت كورسەتىپ كەلگەن. ەندى بۇل قاتارعا 40 ادام قوسىلاتىن بولدى. ول ءۇشىن ارنايى 8,7 ميلليون تەڭگە ءبولىنىپ, 4,5 شتات قاراستىرىلعان. ال قالالىق وسىنداي مەكەمە جانىنان 10 ادامعا قوسىمشا ورىن اشىلدى. وعان 1,9 ميلليون تەڭگە ءبولىندى. وسىعان سايكەس جۇمىسقا قوسىمشا ادام الىندى.
ەرجان بايتىلەس.
قىزىلوردا وبلىسى.
* * *
...بىرلەسىپ جۇمىس جاساۋعا بەيىل تانىتتى
وڭتۇستىككە پولشا رەسپۋبليكاسىنىڭ الماتى قالاسىنداعى باس كونسۋلى جانە وكىلەتتى ەلشىسى ۆەسلاۆ وسۋحوۆسكي باستاعان دەلەگاتسيا رەسمي ساپارمەن كەلدى. وقو اكىمىنىڭ ءبىرىنشى ورىنباسارى بەرىك وسپانوۆتىڭ قابىلداۋىندا بولعان ەلشى پولشانىڭ وڭتۇستىك قازاقستان وبلىسىمەن ىسكەرلىك بايلانىس ورناتۋعا مۇمكىندىكتەرى مول ەكەندىگىن ايتتى.
ەكى تاراپتىڭ ەكى جاققا دا پايدالى اڭگىمەسىنىڭ ءبىر ءتۇيىنىندە بەرىك وسپانوۆ بۇرىنعى فوسفور زاۋىتى جانىنداعى ونەركاسىپ ايماعىنان پولياك كاسىپكەرلەرىنە بيزنەس قۇرىلىمدارىن اشۋعا كەڭەس بەردى.
باقتيار تايجان.
وڭتۇستىك قازاقستان وبلىسى.