كەشە سىرتقى ىستەر مينيسترلىگىندە پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆتىڭ توراعالىعىمەن جانە سىرتقى ىستەر ءمينيسترى ەرجان قازىحانوۆتىڭ قاتىسۋىمەن قازاقستانعا ينۆەستيتسيا تارتۋ جانە ينۆەستيتسيالىق جاعدايدى جاقسارتۋ ماسەلەسى بويىنشا وتىرىس بولىپ ءوتتى.
اتالعان كەزدەسۋدى وتكىزۋ تۋرالى باستاما پرەزيدەنت ن.نازارباەۆتىڭ جاقىندا ۇكىمەت مۇشەلەرى, ورتالىق مەملەكەتتىك ورگانداردىڭ باسشىلارى, «نۇر وتان» حدپ جانە «سامۇرىق-قازىنا» ۇاق قاتىسۋىمەن وتكەن كەڭەيتىلگەن وتىرىس بارىسىندا بەرگەن تاپسىرماسىن ورىنداۋ حاقىندا كوتەرىلگەن بولاتىن. وسى كەڭەيتىلگەن وتىرىستا ەلباسى شەتەل ينۆەستيتسياسى مەن يننوۆاتسياسىن ەلىمىزگە تارتۋدى ۇلتتىق ەكونوميكامىزدىڭ دامۋىن قامتاماسىز ەتۋدەگى باستى مىندەتتەردىڭ ءبىرى رەتىندە ايقىنداپ بەردى.
كەزدەسۋ شەڭبەرىندە قاتىسۋشىلار ەلىمىزدىڭ ينۆەستيتسيالىق ساياساتىن دامىتۋ جونىندە بارلىق مۇددەلى تاراپتاردىڭ ءتيىمدى ىنتىماقتاسۋىن قامتاماسىز ەتۋگە باعىتتالعان ۆەدومستۆوارالىق جۇمىس توبىن قۇرۋ ماسەلەسىن تالقىعا سالدى.