ۋكراينانىڭ كيەۆ قالاسىندا شايبالى حوككەيدەن ەرلەر اراسىنداعى الەم چەمپيوناتىنىڭ ءبىرىنشى ديۆيزيونىندا ونەر كورسەتكەن كوماندالاردىڭ ويىندارى اياقتالدى.
سوڭعى ويىندارى سەنبى كۇنى وتكەن جارىستا قازاقستان قۇراماسى ءبىرىنشى ورىندى جەڭىپ الدى. وسى كۇنى قازاقستان حوككەيشىلەرى كيەۆتىڭ مۇز ايدىنىندا ۋكراينا قۇراماسىمەن كەزدەسىپ, جالعىز جولدامانىڭ ماسەلەسىن شەشتى. ءسويتىپ, 3:2 ەسەبىمەن ءبىزدىڭ پايدامىزعا شەشىلگەن ماتچتا اندرەي حومۋتوۆتىڭ جىگىتتەرى 2012 جىلى شۆەتسيا مەن فينليانديادا وتەتىن الەم چەمپيوناتىنىڭ توپ-ديۆيزيونىنا بەرىلەتىن جالقى جولداماعا يە بولدى.
جالپى, بيىلعى چەمپيوناتتا كوماندامىز تەك مۇمكىن بولعان بارلىق ۇپايدى جيناپ, جالعىز جولدامانى جەڭىپ الۋ ءۇشىن عانا ونەر كورسەتكەنىن اتاپ وتكەن ءجون. ۇلتتىق قۇراما كيەۆكە كەلمەس بۇرىن اۋەلى سلوۆاكيادا دايىندالىپ, سول جەردە وسى ەلدىڭ قومانداسىمەن جولداستىق كەزدەسۋ وتكىزدى. وسى كەزدەسۋدە حومۋتوۆتىڭ جىگىتتەرى الاڭ يەلەرىنە باسىمدىق تانىتىپ, الەم چەمپيوناتىنا زور قۇلشىنىسپەن اتتاندى. ۋكرايناعا كەلگەندە ۇلتتىق قۇرامانىڭ قاتارى تاعى بىرنەشە ويىنشىلارمەن تولىقتى. كوماندامىزعا رەسەيدە وينايتىن ۆيتالي كولەسنيك, دميتري ۋپپەر مەن ماكسيم سەمەنوۆ قوسىلدى. ءبىزدىڭ قۇراما العاشقى كەزدەسۋىن ەستونيا قۇراماسىنا قارسى ءوتكىزدى. بۇل ماتچتاعى ەسەپ 5:1 بولىپ ءبىزدىڭ پايدامىزعا شەشىلگەنىمەن, مۇز ايدىنىنداعى تارتىس وتە شيەلەنىستى جاعدايدا ءوتتى.
كەلەسى كەزدەسۋىن قازاقستان حوككەيشىلەرى ۇلىبريتانيا قۇراماسىمەن وتكىزىپ, ونى دا 2:1 ەسەبىمەن جەڭدى. بىراق بۇل جولعى جەڭىس ۇلتتىق قۇراماعا وڭايلىقپەن كەلمەدى. وسى ويىننىڭ الدىندا بريتاندىقتار الاڭ يەلەرىن جەڭىپ, ءبىرشاما سەنساتسيا تۋعىزعان ەدى. كەيىن بىلسەك, ۇلىبريتانيا ساپىندا كانادانىڭ حوككەيشىلەرى وينايتىن بولىپ شىقتى. دەگەنمەن, قۇرلىقتىق حوككەي ليگاسىندا شىڭدالىپ, تاجىريبە جيناقتاعان ءبىزدىڭ ويىنشىلار ۇلىبريتانيامەن وتكەن كەزدەسۋدە جەڭىسكە جەتە ءبىلدى. بريتاندىقتار مۇز ايدىنىندا وڭاي شاعىلاتىن جاڭعاق بولماسا دا ماتچتان كەيىن وتكەن ءباسپاسوز ءماسليحاتىندا قارسىلاستاردىڭ باس باپكەرى قازاقستان قۇراماسىنىڭ مىقتىلىق تانىتقانىن مويىندادى.
قازاقستان قۇراماسى ءوزىنىڭ ءۇشىنشى ويىنىن تاعى ءبىر بالتىق جاعالاۋى ەلىنە قارسى وتكىزدى. ليتۆا كومانداسى ءبىزدىڭ جىگىتتەرمەن كەزدەسۋ الدىندا پولشادان 5:1 ەسەبىمەن ۇتىلعان بولاتىن. سوندىقتان قازاقستان قۇراماسىنا ليتۆانداردى ءىرى ەسەپپەن جەڭۋ قيىنعا سوقپادى. وسى كەزدەسۋدە اندرەي حومۋتوۆتىڭ شاكىرتتەرى بارىن سالىپ, «ەرىنبەگەن» ويىنشىلاردىڭ ءبارى ءبىر-ءبىر شايبانىڭ اۆتورى اتاندى دەسە بولادى. بۇل ويىندا تالعات جايلاۋوۆ پەن ەۆگەني بۋماگين ەكى رەت, كونستانتين رومانوۆ, رومان ستارچەنكو جانە ماكسيم حۋدياكوۆ ءبىر-بىردەن شايبا سوقتى.
ودان كەيىن ءبىزدىڭ قۇرامانىڭ پولشا مەن ۋكراينا كوماندالارىنا قارسى وتكىزگەن ويىندارى قىزىقتى جانە تارتىستى ءوتتى. پولشامەن ويىندا ۇلتتىق قۇراما باس باپكەرىنە قارسىلاستارىن 4:2 ەسەبىمەن جەڭىپ, 50 جىلدىق مەرەيتويىنا سىي جاسادى. ماتچتا ماكسيم بەلياەۆ, رومان ساۆچەنكو, كونستانتين پۋشكارەۆ پەن ماكسيم سەمەنوۆ قارسىلاستار قاقپاسىندا شايبا تۋلاتتى.
قازاقستان قۇراماسىنىڭ ۋكرايناعا قارسى وتكىزگەن سوڭعى كەزدەسۋىندە كەلەسى جىلى وتەتىن الەم چەمپيوناتىنىڭ توپ-ديۆيزيونىنا بەرىلەتىن جالعىز جولدامانىڭ تاعدىرى شەشىلگەنىن جوعارىدا ايتتىق. بارلىق كەزەڭدەرى شيەلەنىستى جاعدايدا وتكەن ماتچتىڭ نەگىزگى ۋاقىتى تەڭ بولىپ اياقتالدى. قازاقستان قۇراماسى ءۇشىن وسى تەڭ ويىن دا جەتكىلىكتى ەدى. بىراق وۆەرتايمدا فەدور پوليششۋكتىڭ سوققان شايباسى قازاقستان قۇراماسىنا جەڭىس اكەلدى – 14 ۇپاي. ۇلىبريتانيا 12 ۇپايىمەن 2-ءشى, ۋكراينا 10 ۇپايىمەن ءۇشىنشى ورىندى قاناعات تۇتتى.
الەم چەمپيوناتىنىڭ سوڭىندا ۇلتتىق قۇرامانىڭ وسىنداي جەڭىسكە دەگەن جىگەرلىگىن, جالعىز جولدامانى يەلەنۋگە دەگەن زور قۇلشىنىسىن ەسكەرگەن جارىستىڭ ديرەكتوراتى كوماندانىڭ ويىنشىسى رومان ساۆچەنكونى چەمپيوناتتىڭ ۇزدىك قورعاۋشىسى اتاعىنا لايىق دەپ شەشتى. سول سياقتى ۋكراينالىق ولەكساندر ماتەرۋحين ۇزدىك شابۋىلشى اتانسا, بريتاندىق ستەفان مەرفي ۇزدىك قاقپاشى بولىپ تانىلدى.
داستان كەنجالين.
سۋرەتتە: قازاقستان ۇلتتىق قۇراماسى.