وتكەن اپتانىڭ سوڭىنا قاراي مەملەكەت باسشىسى نۇرسۇلتان نازارباەۆ شىعىس قازاقستان وبلىسىندا جۇمىس ساپارىمەن بولىپ, وسكەمەن قالاسىنىڭ جانىنان «نۇرلى كوش» باعدارلاماسىنىڭ اياسىندا سالىنعان جاڭا اۋىلدا ورالمان اعايىندارمەن ءجۇزدەسكەنى بەلگىلى.
ناۋرىز مەرەكەسىنە وراي كەلگەن بۇل كەزدەسۋدە اۋىل تۇرعىندارى قازاقى سالت-سانامەن ۇلتتىق ويىن-ساۋىق, ءداستۇر-جورالعىلاردى كورسەتىپ, اۋىل ءىشىن ءان مەن كۇيگە بولەدى. ەلباسى ولارعا ەلىمىزدەگى كوشى-قون ساياساتى, الىس-جاقىن شەتەلدەردەن كوشىپ كەلگەندەرگە مەملەكەت تاراپىنان جاسالىپ جاتقان ءارتۇرلى الەۋمەتتىك قولداۋ تۋرالى, سونداي-اق قازاقستاننىڭ ەكونوميكالىق دامۋى ءجونىندە كەڭىنەن ءسوز قوزعاپ, اۋىل تۇرعىندارىمەن ەمەن-جارقىن اڭگىمەلەستى.
وسى كەزدەسۋگە قاتىسىپ, الىستان كەلگەن اعايىننىڭ اتىنان ەلباسىعا ارناپ لەبىزىن بىلدىرگەن ازاماتتىڭ ءسوزىن وقىرمان نازارىنا ۇسىنىپ وتىرمىز.
مارتەبەلى ەلباسى! مەن قىزايباي قۇرمانحان دەگەن كىسى بولامىن. موڭعوليادان كوشىپ كەلدىم. جاسىم جەتپىستىڭ بەسەۋىنە كەلدى.
سىزبەن ءبىر كەزدەسسەم دەپ ءىشتەي ارمان ەتۋشى ەدىم. ايتسام دەگەن ءسوزىم بار ەدى. قۇدايعا ءشۇكىر, سول تىلەگىم ورىندالىپ, مىنەكي, وزىڭىزبەن جۇزدەسۋدىڭ ءساتى ءتۇستى. ەندى سول ءسوزىمدى الدىڭىزدا اقتارسام دەيمىن.
اتا-بابامىز قازاقتىڭ دەربەس مەملەكەت, تاۋەلسىز ەل بولۋىن عاسىرلار بويى كوكسەپ وتكەنى ايان. اللاعا تاۋبە, سول بابالار ارمانى بۇگىندە ورىندالىپ وتىر. اتا-بابا ارمانىنا ءبىزدىڭ قولىمىزدى جەتكىزگەن, قازاق ەلىنىڭ كوك بايراعىن كوتەرىپ, تاۋەلسىزدىك الىپ بەرگەن ءسىزسىز, نۇرەكە!
قازاق جەكە تاۋەلسىز ەل بولدى دەگەندى ءبىز 1991 جىلدىڭ سوڭىندا موڭعوليادا ءجۇرىپ ەستىدىك. سىرتتا جۇرگەن اعايىن اتاجۇرتقا الاڭشىل, قۇلاعى تۇرىك, جانى نازىك كەلەدى. بۇل حاباردى ەستىگەن ءبىزدىڭ قۋانىشىمىزدا شەك جوق ەدى.
جۇرەكتە ۇيالاپ قالعان قارا تاس جىبىگەندەي بولدى. قانشا تويساڭ دا جۇمىرشاق جارىلماق جوق, قانشا قۋانساق تا جۇرەك توقتاماق جوق دەگەندەي, قۋانىشتان ەركەك باسىمىزبەن ەڭىرەپ جىبەرگەنىمىزدى نەسىن جاسىرايىن...
بۇل اڭساعان ارماننىڭ ورىندالعانى ەدى. نامىسىمىز وياندى, بويىمىزعا قان جۇگىردى, ەڭسەمىز كوتەرىلدى, رۋحىمىز سەرپىلدى.
مىنە, وسى ارماننىڭ بار تاۋقىمەتىن, بار قيىنشىلىعىن موينىڭىزعا الىپ, جارعاق قۇلاعىڭىز جاستىققا تيمەي ىسكە اسىرۋشى دا ءسىز بولدىڭىز.
قازاق ەلى تار جول, تايعاق كەشۋدەن ءوتىپ, جيىرما جىلدا ەكونوميكاسى مىقتى, الەۋەتى زور دەربەس مەملەكەتكە اينالدى. ءسويتىپ, ءسىز قازاقتىڭ دا, قازاقستاننىڭ دا ابىرويىن اسىرىپ, اتىن الەمگە تانىتتىڭىز. تاقىر جەردەن تاۋ ورناتقانداي بولىپ, بايتاق دالا توسىندە اسەم استانا سالدىردىڭىز. قازاقستاندى وزگەلەرمەن تەرەزەسى تەڭ, كەرەگەسى كەڭ وركەنيەتتى ەلدەردىڭ قاتارىنا قوستىڭىز. بۇل ۇلى تۇلعالاردىڭ عانا قولىنان كەلەتىن ءىس ەدى.
ءسىز, مىنەكي, 20 جىل بويى الەمدە تارىداي شاشىلعان قانداستارىڭىزدى قازاقستانعا جيناپ جاتىرسىز. «شىركىن-اي, ەلگە قايتساق» دەپ ءبىز دە ىشتەي كوكسەپ قوياتىنبىز. بىراق ول ارمانىمىزدىڭ جۇزەگە اسۋىنان گورى اسپانداعى اي جۋىق كورىنەتىن بىزگە. ءسويتىپ جۇرگەندە, قارتايعان شاعىمىزدا بولسا دا, مىنەكي, ءبىزدىڭ دە ارمانىمىز ورىندالدى, ويداعىمىز وڭىنان تۋدى.
سىرتتان كەلگەن اعايىن – ءبىز – تاۋەلسىزدىكتى ءتاتتى ۇعىم عانا ەمەس, ءتاڭىردىڭ سىيى دەپ قابىلدايمىز. تاۋەلسىزدىكتى باياندى ەتۋ ءۇشىن – ەڭ ءبىرىنشى حالىق سانىن كوبەيتۋ قاجەت دەپ ويلايمىز. ياعني, ءوزىمىزدىڭ قازاقتىڭ سانىن كوبەيتسەك دەپ كوكسەيمىز.
مەنىڭ جانىمحان دەگەن اعايىمنىڭ ۇرپاعى قازىر جەتپىستەن استى. مەن دە ءبىراز ۇرپاقتى جاننىڭ ءبىرىمىن. ءبىز, ءسويتىپ ءبىر اتانىڭ بالاسى وسكەمەنگە 72 ءۇي كوشىپ كەلىپ وتىرمىز. ۇرپاقتىڭ ءبىرازى موڭعوليادا قالدى, ءتۇبىندە ولار دا كەلەدى. تۇرمىسىمىز جاقسى, تىرشىلىك بار, جاعداي جامان ەمەس. شۇكىر, تاۋبە دەگەننەن باسقا ايتارىم جوق. سول ءۇشىن دە سىزگە ۇرپاعىمنىڭ اتىنان اق جۇرەكتەن العىسىمدى بىلدىرەمىن!
قۇرمەتتى ەلباسى! «ءوزىن-ءوزى باسقارعان ەر باقىتتى, ءوزىن-ءوزى بيلەگەن ەل باقىتتى» دەگەن ەكەن اتام قازاق. سول ايتقانداي, ءسىز سياقتى كەمەڭگەر باسشىسى بار قازاقستان حالقى – مىنا ءبىز باقىتتىمىز, ءبىز ءوزىمىز عانا ەمەس, كەلەر ۇرپاعىمىزبەن باقىتتىمىز دەپ بىلەمىن.
سوندىقتان, بۇگىندە ۇزىن سانى ميلليونعا جەتكەن ورالماندار اتىنان سىزگە زور دەنساۋلىق تىلەي وتىرىپ, قازاق ەلىن نۇرلى بولاشاققا باستاي بەرىڭىز دەمەكپىن.